ახალი ამბები

საზოგადოებრივი ჯანდაცვის ცენტრალური რეფერალური ლაბორატორიის დირექტორი ანა ჟვანია და ამერიკის ვოლტერ რიდის საჯარისო კვლევითი ინსტიტუტის წარმომადგენელი, მედიცინის მეცნიერებათა დოქტორი არტურ ლიონსი შოთა რუსთაველის სახელმწიფო უნივერსიტეტის რექტორს, პროფესორ ალიოშა ბაკურიძეს, სამეცნიერო ცენტრის მკვლევრებსა და პროფესორ-მასწავლებლებს შეხვდნენ. სამეცნიერო ცენტრის მიმართულებების ხელმძღვანელებმა სტუმრებს სამეცნიერო-კვლევითი საქმიანობის შედეგები წარუდგინეს. გაცნობითი ხასიათის შეხვედრაზე განისაზღვრა სამომავლო თანამშრომლობის მიმართულებები, დაიგეგმა ერთობლივი სამეცნიერო კვლევების წარმოება და ერთობლივი პროექტების განხორციელება. რსუ-ს დოქტორანტებს ცენტრის ბაზაზე ტრენინგები და სასწავლო კურსები ჩაუტარდებათ. უახლესი აპარატურითა და ტექნოლოგიებით აღჭურვილი ქართულ-ამერიკული ლაბორატორია ერთადერთია კავკასიაში და მიზნად ისახავს რეგიონში საერთაშორისო პარტნიორობის გაძლიერებასა და ინფექციური დაავადებების გავრცელების წინააღმდეგ ბრძოლას.

პროფესორების ზაზა შაშიკაძისა და მირიან მახარაძის წიგნის ,,აჭარის ლივის ვრცელი და მოკლე დავთრები’’ წარდგინება გაიმართა. ნაშრომი შოთა რუსთაველის ეროვნული სამეცნიერო ფონდის გრანტის (№A27-09) ფარგლებში მომზადდა და პროფესორ ნოდარ შენგელიას რედაქტორობით გამოიცა. მკვლევრებმა სამეცნიერო მიმოქცევაში შემოიტანეს მნიშვნელოვანი მეცნიერული ღირებულების მასალები. ნაშრომში წარმოდგენილია სამეცნიერო წრეებისათვის უცნობი, თურქეთის არქივებში დაცული დოკუმენტები - დავთრები და ოსმალობის პერიოდის აჭარის შესახებ დღემდე გამოუქვეყნებელი ისტორიული წყაროები. გამოკვლევას დართული აქვს ოსმალური ტექსტები, თარგმანი, კომენტარები და დოკუმენტების ფოტოასლები. წიგნი განკუთვნილია აღმოსავლეთმცოდნეობის დარგში მომუშავე მეცნიერებისთვის, სპეციალისტებისათვის, ისტორიკოსებისა და სხვა დაინტერესებული პირებისათვის.

რსუ-ს სააქტო დარბაზში ბათუმის საჯარო და კერძო სკოლების მეთორმეტე კლასელებისათვის ღია კარის დღე ჩატარდა. მომავალ სტუდენტებს მიესალმა და წარმატებები უსურვა რექტორმა, პროფესორმა ალიოშა ბაკურიძემ. შოთა რუსთაველის სახელმწიფო უნივერსიტეტი აბიტურიენტებს სტუდენტებმა დავით ბენდელიანმა და სოფო უმეთაძემ წარუდგინეს. ახალგაზრდებმა აკრედიტებული უმაღლესი სასწავლებლის საგანმანათლებლო პროგრამებზე, საუნივერსიტეტო ცხოვრებაზე, უცხოეთში სწავლების პირობებზე, სტიპენდიებსა და სოციალურ პროგრამებზე ისაუბრეს. აბიტურიენტებთან შეხვედრა კონცერტით დასრულდა, რომელშიც უმაღლეს საგანმანათლებლო დაწესებულებასთან არსებული ქორეოგრაფიული ანსამბლი „ტბეთი“, მხიარულთა და საზრიანთა ნაკრები „კარიკატურა“, ვაჟთა ფოლკლორული, გოგონათა ვოკალური და თანამედროვე ცეკვების ანსამბლი „M-style 13“ მონაწილეობდნენ.

შოთა რუსთაველის სახელმწიფო უნივერსიტეტის რექტორი, პროფესორი ალიოშა ბაკურიძე ტრადიციულად სტუდენტებს შეხვდა და სასწავლო წლის სიახლეებთან ერთად სამომავლო გეგმები გააცნო. ცვლილებებია სტიპენდიების დანიშვნისა და სწავლის საფასურის გადახდის წესში. იგეგმება საეტაპო გამოცდების ჩატარება და რსუ-ს მატერიალურ-ტექნიკური ბაზის გაუმჯობესება. რექტორმა ყურადღება გაამახვილა ასევე უცხოეთის გაცვლით პროგრამებზე, სტუდენტურ ცხოვრებასა და სტუდენტთა დასაქმების პროგრამაზე. შეხვედრა კითხვა-პასუხის რეჟიმში წარიმართა და პროფესორმა ალიოშა ბაკურიძემ ახალგაზრდების აქტუალურ შეკითხვებს უპასუხა. განათლებისა და მეცნიერებათა ფაკულტეტის შემდეგ რექტორი ეტაპობრივად ყველა ფაკულტეტის სტუდენტს შეხვდება.

ბათუმის, ხელვაჩაურის, ქობულეთის, ლანჩხუთის, ოზურგეთის, ჩოხატაურის, ფოთის, ზუგდიდის კერძო და საჯარო სკოლების მეთორმეტე კლასის მოსწავლეებისა და აბიტურიენტებისათვის შოთა რუსთაველის სახელმწიფო უნივერსიტეტის პროფესორ-მასწავლებლებმა და სტუდენტებმა ღია კარის დღე გამართეს. მომავალ სტუდენტებს უმაღლესი საგანმანათლებლო დაწესებულების სასწავლო პროგრამები, პრიორიტეტები, ისტორია, სწავლების პირობები, გაცვლითი პროგრამები, სტიპენდიები, სოციალური პროგრამები და სიახლეები წარუდგინეს. აბიტურიენტებს უმაღლესი სასწავლებლის შესახებ სრული ინფორმაციის მისაღებად ბუკლეტები დაურიგეს.