ახალი ამბები

აჭარის განათლების, კულტურისა და სპორტის მინისტრმა გია აბულაძემ შოთა რუსთაველის სახელმწიფო უნივერსიტეტის სტუდენტებს მიზნობრივი პროგრამა „ვასწავლოთ მომავალი წარმატებისათვის“ წარუდგინა და პროექტში შეტანილი ცვლილებები გააცნო. 2012 სასწავლო წლიდან კონკურსის წესით შერჩეული მასწავლებლები ხელფასის გარდა, აჭარის განათლების, კულტურისა და სპორტის სამინისტროსაგან დამატებით გაზრდილ ანაზღაურებას მიიღებენ 400 ლარის ოდენობით. ასევე ისარგებლებენ დაზღვევის პროგრამით და უფასოდ ჩაერთვებიან პროფესიული გადამზადების კურსებში. კონკურსში მონაწილეობის მიღება უმაღლესი განათლების მქონე პირებთან ერთად, დამამთავრებელი კურსის სტუდენტებსაც შეუძლიათ.

შოთა რუსთაველის სახელმწიფო უნივერსიტეტში ტურიზმის ფაკულტეტისა და ტურიზმის ინდუსტრიის წარმომადგენლების I კონფერენცია გაიმართა. რსუ-ს რექტორმა, პროფესორმა ალიოშა ბაკურიძემ და ტურიზმის ფაკულტეტის დეკანმა, პროფესორმა როსტომ ბერიძემ ტურიზმის დეპარტამენტის, სასტუმროებისა და ტურისტული სააგენტოების ხელმძღვანელებს ახლადშექმნილი ფაკულტეტის შესაძლებლობები და სამომავლო გეგემები გააცნეს. კონფერენციის ფარგლებში გაიმართა ვორქშოფი, რომლის მიზანი იყო სამომავლო თანამშრომლობის პრიორიტეტების განსაზღვრა და ერთობლივი პროექტების შემუშავება. ტურიზმის ფაკულტეტისა და ტურიზმის ინდუსტრიის ორგანიზაციების ინტეგრაცია ხელს შეუწყობს ტურიზმისა და მასპინძლობის დარგისათვის მაღალკვალიფიციური, კონკურენტუნარიანი და საერთაშორისო სტანდარტების სპეციალისტების მომზადებას.

რსუ-ს 509-ე და 511-ე აუდიტორიებს ცნობილი მეცნიერის, ფიზიკოსისა და საზოგადო მოღვაწის ხუსეინ ხალვაშის სახელი მიენიჭა. ღვაწლმოსილი მკვლევრის საიუბილეო სხდომაზე პროფესორ-მასწავლებლებმა, სტუდენტებმა, კოლეგებმა, ნათესავებმა და მეგობრებმა კიდევ ერთხელ გაიხსენეს მისი მიღწევები და განვლილი გზა. ხუსეინ ხალვაშის 100 წლის იუბილეს მიეძღვნა სამეცნიერო კონფერენცია თემაზე: „თანამედროვე ფიზიკის აქტუალური პრობლემები - ბათუმი 2012“. კონფერენციის მონაწილეებმა შოთა რუსთაველის სამეცნიერო ფონდის მიერ დაფინანსებული სამეცნიერო საგრანტო პროექტის „ბათუმის საზღვაო პორტის აკვატორიის ეკოლოგიური მონიტორინგი ლაზერული სპექტროსკოპიის მეთოდით და ტალღური პროცესების შესწავლა რეალურ გარემოში“ (GNSF/STO8/5-451) კვლევის შედეგები შეაჯამეს და სამომავლო გეგმებზე ისაუბრეს.

შოთა რუსთაველის სახელმწიფო უნივერსიტეტმა საგამოფენო ცენტრ ექსპო-ჯორჯიაში გამართულ ”განათლების საერთაშორისო გამოფენა 2012”- ში მიიღო მონაწილეობა. რსუ-ს სტუდენტებმა და განათლებისა და მეცნიერებათა ფაკულტეტის დეკანის მოადგილემ ინგა შამილიშვილმა ყველა დაინტერესებულ პირს უმაღლესი საგანმანათლებლო დაწესებულების სასწავლო პროგრამები, სწავლების პირობები, სტუდენტური ცხოვრება, გაცვლითი და სოციალური პროგრამები გააცნეს. დაიგეგმა თანამშრომლობის დამყარება საქართველოსა და უცხოეთის უმაღლეს სასწავლებლებთან, ერთობლივი პროექტების განხორციელება და სტუდენტთა და პროფესორ-მასწავლებელთა სტაჟირება. განათლების კვირეული 23 თებერვალს გაიხსნა და მასში საქართველოს 81 საგანმანათლებლო დაწესებულების, 13 უცხოური უნივერსიტეტის, კოლეჯისა და უმაღლესი სკოლის საგანმანათლებლო პროგრამები იყო წარმოდგენილი. განათლების საერთაშორისო გამოფენა საქართველოს განათლებისა და მეცნიერების სამინისტროსა და თბილისის მერიის ორგანიზებით გაიმართა.

საბჭოთა ოკუპაციის კვირეულის ფარგლებში შოთა რუსთაველის სახელმწიფო უნივერსიტეტის ისტორიის, არქეოლოგიისა და ეთნოლოგიის დეპარტამენტისა და სტუდენტთა სამეცნიერო ცენტრის ორგანიზებით სამეცნიერო სესია გაიმართა. პროფესორ-მასწავლებლებმა მოხსენებები წარმოადგინეს ისეთ მნიშვნელოვან საკითხებზე, როგორიცაა: „1921 წლის 25 თებერვალი“, „1921 წლის თებერვალი და საერთაშორისო საზოგადოებრიობა“ და „1921 წლის 25 თებერვალი ქართულ მწერლობაში“. განიხილეს იმ დროისათვის საქართველოში არსებული პოლიტიკური, ეკონომიკური და სოციალური მდგომარეობა, ანექსიის გამომწვევი მიზეზები და კიდევ ერთხელ პატივი მიაგეს 1921 წლის 25 თებერვალს სამშობლოს ერთიანობისათვის დაღუპულ გმირთა ხსოვნას. სამეცნიერო სესია ოკუპაციის ამსახველი ფოტო-კოლაჟითა და ინტელექტუალური თამაშით დასრულდა, რომელშიც ბათუმის საჯარო და კერძო სკოლების მოსწავლეები მონაწილეობდნენ. გამარჯვებულ გუნდებს სერტიფიკატები და სამახსოვრო საჩუქრები გადასცეს.