ახალი ამბები

განათლებისა და მეცნიერებათა ფაკულტეტის სტუდენტებმა დიაბეტის დღე რამდენიმე ღონისძიებით აღნიშნეს. ახალგაზრდა მედიკოსთა კავშირის წევრებმა კლინიკური თერაპიის დეპარტამენტის მხარდაჭერით უმაღლესი სასწავლებლის 100 პროფესორ-მასწავლებელს დიაბეტზე სკრინინგი ჩაუტარეს და ოთხი დაავადებული გამოავლინეს. აქციის ფარგლებში გაიმართა დიაბეტის დღისადმი მიძღვნილი კონფერენცია. მომავალმა ექიმებმა მოხსენებები დაავადების სპეციფიკაზე, გამომწვევ მიზეზებზე, პრობლემებზე, მისი მართვისა და მკურნალების მეთოდებზე წარმოადგინეს. დიაბეტის დღე მსოფლიოს ჯანდაცვის ორგანიზაციამ და დიაბეტის საერთაშორისო ფედერაციამ 1991 წელს დააარსეს. სტატისტიკური მონაცემებით, ამ სნეულებით 300 მილიონი ადამიანია დაავადებული.

სასტუმრო ,,რედისონში“ ბათუმთან დამეგობრებული ქალაქების ახალგაზრდული ფესტივალი გაიხსნა. ღონისძიება სტუდენტთა საერთაშორისო დღეს ეძღვნება და მასში ჩართული არიან დამეგობრებული ქალაქების (იალტა, ვანაძორი, კუშადასი, ტერნოპოლი, მარბელა, ტრაპიზონი) ახალგაზრდები და ახალგაზრდული შემოქმედებითი ჯგუფები. ფესტივალი ქალაქ ბათუმის მერმა რობერტ ჩხაიძემ, რსუ-ს რექტორმა, პროფესორმა ალიოშა ბაკურიძემ, ქალაქ ბათუმის მერიის ახალგაზრდულ საქმეთა განყოფილების ხელმძღვანელმა თამაზ დარჩიძემ და სიმფეროპოლის უნივერსიტეტის პრორექტორმა ვლადიმერ კაზარინმა გახსნეს. კვირეულში სხვადასხვა ქვეყნის უმაღლესი სასწავლებლების სტუდენტებთან ერთად შოთა რუსთაველის სახელმწიფო უნივერსიტეტის სტუდენტებიც მონაწილეობენ. ბათუმთან დამეგობრებული ქალაქების ახალგაზრდული კვირეული მიზნად ისახავს ნიჭიერი ახალგაზრდების გაცნობას, გამორჩეული სტუდენტების წარმოჩენას, სტუდენტური ცხოვრების მხარდაჭერასა და კულტურული კავშირების გაღრმავებას.

საერთაშორისო განათლების ცენტრის ორგანიზებით შოთა რუსთაველის სახელმწიფო უნივერსიტეტში ამერიკული განათლების დღე გაიმართა. საგანმანათლებლო პროგრამების კოორდინატორებმა თეა კუჭუხიძემ, თამარ ქარჩავამ, ეკა ყუფუნიამ და თეონა დალაქიშვილმა სტუდენტებს, პროფესორ-მასწავლებლებსა და საჯარო სკოლის მოსწავლეებს ამერიკის შეერთებული შტატების გაცვლითი პროგრამები და უცხოეთში სწავლის პირობები გააცნეს. საერთაშორისო განათლების ცენტრის პროექტები ბათუმის ოფისის ხელმძღვანელმა ნინო ინაიშვილმა წარმოადგინა. ასევე შედგა ბულგარეთის ამერიკული უნივერსიტეტის პრეზენტაცია და დისკუსია საბაკალავრო და სამაგისტრო პროგრამებზე.

ქალაქ გენტში პროექტის „უნივერსიტეტი-საწარმო თანამშრომლობის შესაძლებლობების გაძლიერება კომპეტენზიებზე დაფუძნებული სწავლების გზით სომხეთში, საქართველოსა და უკრაინაში“ პირველი საორგანიზაციო შეხვედრა გაიმართა. პროექტში მონაწილე რსუ-ს, საქართველოს ტექნიკური უნივერსიტეტის, სომხეთის, უკრაინის, ბელგიის, გერმანიის, საფრანგეთისა და ბრიტანეთის უნივერსიტეტების წარმომადგენლებმა სამომავლო გეგმები და ერთობლივი პროექტები განიხილეს. შეხვედრაზე პროექტის კოორდინატორმა, ასოცირებულმა პროფესორმა ლელა თურმანიძემ შოთა რუსთაველის სახელმწიფო უნივერსიტეტის ისტორია, სტრუქტურა, შესაძლებლობები, გამოწვევები წარადგინა და საგანმანათლებლო და კვლევით პროგრამებში დამსაქმებლების ჩართულობაზე ისაუბრა. პროექტი ითვალისწინებს ევროპული უნივერსიტეტების გამოცდილების გაზიარებას, პარტნიორ უმაღლეს სასწავლებლებში ცენტრებისა და ბიზნესის განვითარების ლაბორატორიების დაფუძნებას.

საინჟინრო-ტექნოლოგიური ფაკულტეტის ასოცირებული პროფესორების ეთერ ნიჟარაძისა და ნორა მამულაიშვილის სახელმძღვანელოს ,,ნავთობისა და გაზის ქიმია“ და ეთერ ნიჟარაძის მონოგრაფიის ,,ციტრუსის წვენის ფალსიფიკაციის პრობლემა და მისი მოგვარების მეთოდები“ პრეზენტაცია ჩატარდა. წიგნში ,,ნავთობისა და გაზის ქიმია“ მოცემულია ნავთობისა და გაზის გადამუშავების ძირითადი თერმული, თერმოკატალიზური პროცესები და სხვა მნიშვნელოვანი საკითხები. დამხმარე სახელმძღვანელოში ,,ციტრუსის წვენის ფალსიფიკაციის პრობლემა და მისი მოგვარების მეთოდები“ აღწერილია ავტორის მიერ შემუშავებული ციტრუსის წვენის ანალიზის მეთოდები, რომლებიც აპრობირებულია საქართველოს შინაგან საქმეთა სამინისტროს საექსპერტო - კრიმინალურ განყოფილებაში და რეკომენდებულია საარბიტრაჟო პრაქტიკაში გამოსაყენებლად.