ახალი ამბები

ხელვაჩაურის რაიონულ სასამართლოში შოთა რუსთაველის სახელმწიფო უნივერსიტეტის სამართალმცოდნეობის სპეციალობის III და IV კურსის სტუდენტების მონაწილეობით იმიტირებული სასამართლო პროცესი გაიმართა. რაიონული სასამართლოს შვიდმა სტაჟიორმა სტუდენტმა მიწის საკითხთან დაკავშირებული ადმინისტრაციული წარმოების დავა მოსარჩლის სასარგებლოდ გადაწყვიტეს და ბათილად ცნეს ხელვაჩაურის საკუთრების უფლების აღიარების კომისიის მიერ გამოცემული ინდივიდუალური სამართლებრივი აქტი. ხელვაჩაურის რაიონული სასამართლოს თავმჯდომარემ დავით მამისეიშვილმა, რსუ-ს სოციალურ მეცნიერებათა, ბიზნესისა და სამართალმცონდეობის ფაკულტეტის დეკანმა, პროფესორმა ადამ მახარაძემ, პროფესორ-მასწავლებლებმა და მოსამართლეებმა იმიტირებული სასამართლო პროცესი დადებითად შეაფასეს და სამომავლო თანამშრომლობის მიმართულებებზე ისაუბრეს.

ფილოსოფიის საერთაშორისო დღის აღსანიშნავად შოთა რუსთაველის სახელმწიფო უნივერსიტეტში სამეცნიერო რესპუბლიკური კონფერენცია „ფილოსოფიის თანამედროვე პრობლემები“გაიმართა. სამეცნიერო სესია რსუ-ს ფილოსოფიის დეპარტემენტის ორგანიზებით იუნესკოს პროგრამის ეგიდით მესამედ ჩატარდა და ცნობილი ფილოსოფოსის ზურაბ კაკაბაძის 85 წლის იუბილეს მიეძღვნა. სხვადასხვა უმაღლესი სასწავლებლის პროფესორ-მასწავლებლებმა განიხილეს თანამედროვე ფილოსოფიის მნიშვნელოვანი საკითხები. აჭარის უმაღლესი საბჭოს თავმჯდომარემ, ფილოსოფიის მეცნიერებათა დოქტორმა, პროფესორმა მიხეილ მახარაძემ მოხსენება წარმოადგინა თემაზე: „ადამიანი თანამედროვე ქართულ აზროვნებაში“. კონფერენციის ფარგლებში ფილოსოფოსმა, თსუ-ს პროფესორმა თეიმურაზ მთიბელაშვილმა ღია ლექცია წაიკითხა მერაბ მამარდაშვილის ფილოსოფიურ შეხედულებებზე.

დასრულდა შოთა რუსთაველის სახელმწიფო უნივერსიტეტის საინჟინრო-ტექნოლოგიური ფაკულტეტის პირველობა ინტელექტუალურ თამაშში „რა“? სად? როდის?“. ფაკულტეტის თასის მოსაპოვებლად სხვადასხვა უმაღლესი სასწავლებლის 100-ზე მეტი სტუდენტი იბრძოდა. პირველობა 20 მონაწილე გუნდს შორის რსუ-ს სოციალურ მეცნიერებათა, ბიზნესისა და სამართალმცოდნეობის გუნდმა „ეპისტემ“ მოიპოვა. მეორე ადგილიც ამავე ფაკულტეტის გუნდმა „გრინჩიმ“ დაიკავა, ხოლო მესამე საპრიზო ადგილის მფლობელი საინჟინრო-ტექნოლოგიური ფაკულტეტის გუნდი გახდა. გამარჯვებული მოთამაშეები თასითა და სიგელებით დააჯილდოვდნენ.

ERASMUS MUNDUS-ისა და TEMPUS-ის პროექტების კოორდინატორმა, შოთა რუსთაველის სახელმწიფო უნივერსიტეტის ასოცირებულმა პროფესორმა ლელა თურმანიძემ უნივერსიტეტის რექტორს, დეპარტამენტის ხელმძღვანელებსა და სამეცნიერო ცენტრის წარმომადგენლებს ევროკომისიის 2011 წლის საგრანტო კონკურსით დაფინანსებული პროექტების ანგარიში წარუდგინა. კორდინატორმა შეხვედრაზე კოლეგებს ასევე გააცნო Erasmus Mundus Action 2 Lot 7 ALRAKIS - აკადემიური გაცვლის პროგრამის მიზნები, პრინციპები, კონსორციუმის წევრი უნივერსიტეტები, კონკურსში მონაწილეობის მსურველთა შერჩევისა და საგრანტო პროექტების განხორციელების პირობები. ხელშეკრულების თანახმად, მობილობის პროცესი 2012 წლის გაზაფხულიდან დაიწყება.

შოთა რუსთაველის სახელმწიფო უნივერსიტეტის, მარბურგის ფილიპსის უნივერსტეტისა და ფონდ "ფოლკსვაგენის" ორგანიზებით საერთაშორისო სიმპოზიუმი გაიხსნა თემაზე: „სახელმწიფოსა და სამართლებრივი პრაქტიკის გამოცდილება კავკასიაში - ანთროპოლოგიური პერსპექტივები კანონსა და პოლიტიკაში“. საერთაშორისო კონფერენცია გამოყენებითი ანთროპოლოგიის აქტუალურ საკითხებს ეძღვნება და ხელს შეუწყობს იურიდიული და პოლიტიკური ანთროპოლოგიის პოპულარიზაციას. ქართველი, გერმანელი, ინგლისელი, უნგრელი, პოლონელი, რუსი ანთროპოლოგები სამი დღის განმავლობაში კვლევის მეთოდებს, სასწავლო და კვლევით პროცესებში სხვადასხვა ქვეყნებში მოღვაწე ანთროპოლოგების ჩართვასა და დარგის სხვა მნიშვნელოვან საკითხებს განიხილავენ.