ახალი ამბები

შოთა რუსთაველის სახელმწიფო უნივერსიტეტში კურსდამთავრებულთა საზეიმო გაცილება მოეწყო. ახალგაზრდებს უნივერსიტეტის რექტორმა, პროფესორმა ალიოშა ბაკურიძემ, წმინდა ეკატერინეს სახელობის ტაძრის წინამძღვარმა, დეკანოზმა მამა შიომ, რექტორის მოადგილეებმა ნათია წიკლაშვილმა, ირაკლი ბარამიძემ, დეკანებმა და პროფესორ-მასწავლებლებმა გზა დაულოცეს და წარმატებები უსურვეს. უმაღლესი სასწავლებელი წელს 499-მა სტუდენტმა დაამთავრა. წარჩინებული სწავლისა და სტუდენტურ ცხოვრებაში შეტანილი წვლილისათვის 87 კურსდამთავრებულს სიგელები გადაეცა. კურსდამთავრებულთა საზეიმო გაცილება კონცერტით დასრულდა, რომელშიც მონაწილეობა მიიღეს უნივერსიტეტის ქორეოგრაფიულმა ანსამბლმა ,,ტბეთმა“, გოგონათა და ვაჟთა ვოკალურმა ანსამბლმა, ბავშვთა ქორეოგრაფიულმა ანსამბლმა და უმაღლესი სასწავლებლის სხვა შემოქმედებითმა ჯგუფებმა.

დასრულდა შოთა რუსთაველის სახელმწიფო უნივერსიტეტის სტუდენტთა სამეცნიერო ცენტრის მიერ ორგანიზებული „სტუდენტთა სამეცნიერო კონფერენცია - 2011“. ათდღიან კონფერენციაში ბაკალავრიატის, მაგისტრატურისა და დოქტორანტურის საფეხურის 129 სტუდენტი მონაწილეობდა. სამართლის, ეკონომიკური მიმართულების, ფსიქოლოგიის, საერთაშორისო ურთიერთობათა, ქართული ენისა და ლიტერატურის, ისტორიის, ქიმიის, ბიოლოგიის, ფიზიკის, გეოგრაფიის, ჯანდაცვის, ინფორმაციული ტექნოლოგიების, პედაგოგიკის, ფილოსოფიის, ევროპეისტიკის, სლავისტიკისა და აგრარული ტექნოლოგიების სექციებში წარმოდგენილი საუკეთესო ნაშრომები სტუდენტთა და ახალგაზრდა მეცნიერთა შრომებში დაიბეჭდება, ხოლო კონფერენციის ყველა მონაწილეს სერტიფიკატი გადაეცემა.

ლიუბლიანას უნივერსიტეტის დელეგაცია საპასუხო ვიზიტით შოთა რუსთაველის სახელმწიფო უნივერსიტეტის ეწვია. სლოვენიის უმაღლესი სასწავლებლის საგარეო ურთიერთობათა დეპარტამენტის უფროსი კატია სერიაკი და ფარმაციის ფაკულტეტის წარმომადგენლები რსუ-ს რექტორსა და სხვადასხვა სპეციალობის პროფესორ-მასწავლებლებს შეხვდნენ და თანამშრომლობის საკითხებზე შეთანხმდნენ. ახალი სასწავლო წლიდან ეკონომიკის, ფარმაციის, ქიმიისა და მათემატიკის სპეციალობის მაგისტრანტები და დოქტორანტები გაცვლითი პროგრამის ფარგლებში ლიუბლიანას უნივერსიტეტში ისწავლიან, ხოლო პროფესორ-მასწავლებლები სტაჟირებას გაივლიან. ვიზიტის ფარგლებში ლიუბლიანას უნივერსიტეტის ფარმაციის ფაკულტეტის პროფესორმა სტანე სრჩიჩიმ საჯარო ლექცია წაიკითხა თემაზე: „ტაბლეტის გარსის ერთგვაროვანი სისქის გრუნტირების შესწავლა დასახვევი გენერატორის საშუალებით“.

№50-ე აუდიტორიაში შოთა რუსთაველის სახელმწიფო უნივერსიტეტისა და ისტორიის მასწავლებელთა საქართველოს ასოციაციის ორგანიზებით ისტორიულ მეცნიერებათა სწავლების მეთოდოლოგიის კაბინეტი გაიხსნა. რსუ-ს რექტორმა, პროფესორმა ალიოშა ბაკურიძემ, ისტორიის მასწავლებელთა საქართველოს ასოციაციის პრეზიდენტმა ნანა ციხისთავმა და ამავე ასოციაციის აჭარის რეგიონული ორგანიზაციის ხელმძღვანელმა მადონა მიქელაძემ კაბინეტის გახსნისას მის მნიშვნელობასა და სამომავლო გეგმებზე ისაუბრეს. კაბინეტის პირველი სამუშაო დღე სემინარს სახელწოდებით: „ზოგადსაგანმანათლებლო სკოლებში ისტორიის სწავლების მდგომარეობა თანამედროვე ეტაპზე და განვითარების პერსპექტივები“ დაეთმო. ასევე გაიმართა გიორგი კიკნაძის წიგნის „საქართველოს ისტორიის“ და ჟურნალ „ისტორიკოსის“ პრეზენტაცია.

საფრანგეთის სამედიცინო აკადემიის აკადემიკოსმა, INSERMI-ის კვლევითი ცენტრის დირექტორმა, მარი ოდილე რეტორემ შოთა რუსთაველის სახელმწიფო უნივერსიტეტში საჯარო ლექცია წაიკითხა თემაზე: „სამედიცინო გენეტიკის აქტუალური საკითხები და გენეტიკურ დაავადებებთან ბრძოლის სამართლებრივი და ეთიკური ასპექტები“. მკვლევარმა პროფესორ-მასწავლებლებსა და სტუდენტებს ბიოეთიკაში მიმდინარე კვლევის შედეგები და ადამიანის გენეტიკის, დაუნიზმისა და ადამიანის ცხოვრებაში თანამედროვე ტექნიკის როლის მნიშვნელობასთან დაკავშირებული საკითხები გააცნო.