ახალი ამბები

ბათუმის შოთა რუსთაველის სახელმწიფო უნივერსიტეტში პირველი რექტორის, ხუსეინ ნაკაიძის ბიუსტი ბსუ-ს რექტორმა, პროფესორმა მერაბ ხალვაშმა ხუსეინ ნაკაიძის შვილიშვილთან, ზურაბ ნაკაიძესთან ერთად საზეიმოდ გახსნა. ღონისძიებას აჭარის ა.რ. განათლებისა და კულტურის მინისტრი მაია ხაჯიშვილი, აჭარის ა. რ. უმაღლესი საბჭოსა და ბათუმის საკრებულოს წევრები, პროფესორ-მასწავლებლები, ხუსეინ ნაკაიძის ოჯახის წევრები, ნათესავები და საზოგადოების წარმომადგენლები ესწრებოდნენ. ხუსეინ ნაკაიძემ სამწლიანი (1935-1938) მოღვაწეობის პერიოდში დიდი ამაგი დასდო ბათუმის ინსტიტუტის ჩამოყალიბებისა და განვითარების საქმეს. ინსტიტუტის მხოლოდ პირველ გამოშვებას დაესწრო, რადგან საბჭოთა რუსეთის რეპრესიებმა შეიწირა და 1938 წელს „მავნებლის“, „ხალხის მტრის“ ბრალდებით სალექციო აუდიტორიიდან გაიყვანეს და დახვრიტეს.

ბათუმის შოთა რუსთაველის სახელმწიფო უნივერსიტეტის ბავშვთა უფლებების ცენტრში იუნისეფის წარმომადგენელებთან შეხვედრა გაიმართა. გაეროს ბავშვთა ფონდის წარმომადგენელმა საქართველოში ღასან ხალილმა და ბსუ-ს რექტორმა, პროფესორმა მერაბ ხალვაშმა ბსუ-ს ბავშვთა უფლებების ცენტრის საქმიანობა შეაჯამეს და სამომავლო გეგმებზე ისაუბრეს. ღონისძიების ფარგლებში ასევე გაიმართა დისკუსია ცენტრის განვითარების და მდგრადობის სტრატეგიის შესახებ. ბავშვთა უფლებების ცენტრი ბათუმის სახელმწიფო უნივერსიტეტში 2021 წელს დაარსდა, სადაც შემუშავდა საგანმანათლებლო მასალები და იმართება ტრენინგები, საჯარო ლექციები და დისკუსიები ბავშვთა უფლებების საკითხებზე.

ბათუმის შოთა რუსთველის სახელმწიფო უნივერსიტეტის 22 სტუდენტი „Erasmus+“-ის გაცვლითი პროგრამის ფარგლებში, ევროპის წამყვან უნივერსიტეტებში სასწავლებლად გაემგზავრება. სხვადასხვა ფაკულტეტის სტუდენტები ერთი სემესტრის განმავლობაში განათლებას მიიღებენ გერმანიის, ესპანეთის, რუმინეთის, პორტუგალიის, საბერძნეთის, ბულგარეთის, სლოვაკეთის, პოლონეთის, ლიეტუვას, ლატვიისა და თურქეთის უნივერსიტეტებში. ბსუ-ს რექტორი, პროფესორი მერაბ ხალვაში და ადმინისტრაციის ხელმძღვანელი მერაბ დიასამიძე „Erasmus+“-ის პროექტში გამარჯვებულ სტუდენტებს შეხვდნენ, პროექტში გამარჯვება მიულოცეს, სერტიფიკატები გადასცეს და წარმატებები უსურვეს.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის აღმოსავლეთმცოდნეობის დეპარტამენტის საერთაშორისო სამეცნიერო ელექტრონულ ჟურნალ „აღმოსავლეთმცოდნეობის მაცნეს“ (E-ISSN 2720-8168; ISSN 2587-490X) ევროპის საცნობარო ინდექსი ჰუმანიტარულ და სოციალურ მეცნიერებებისთვის -ERIHPlUS-ი მიენიჭა. საერთაშორისო სამეცნიერო ჟურნალი აღმოსავლეთმცოდნეობის მაცნე დაარსდა 2018 წელს ბსუ-ს ჰუმანიტარულ მეცნიერებათა ფაკულტეტის აღმოსავლეთმცოდნეობის დეპარტამენტის ბაზაზე.

ბათუმის შოთა რუსთველის სახელმწიფო უნივერსიტეტში 2022 წელს განსახორციელებელი მიზნობრივი სამეცნიერო პროექტების შედეგების განხილვა გაიმართა. ბსუ-ში მიზნობრივი სამეცნიერო-კვლევითი პროექტები 2016 წლიდან ხორციელდება. წლების მიხედვით პროექტების რაოდენობა მზარდია. 2018 წლიდან ცალკე გამოცხადდა კონკურსი ახალგაზრდა მკვლევარებისთვის. პროექტები მნიშვნელოვანია იმითაც, რომ მასში მონაწილეობენ სტუდენტები. კვლევის შედეგების გამოქვეყნება მაღალრეიტინგულ სამეცნიერო ბაზების ჟურნალებში პროექტის აუცილებელი პირობაა. დღემდე, ბსუ-ში ორმოცი სამეცნიერო კვლევითი პროექტი გახორციელდა, გამოქვეყნდა ორმოცდაათზე მეტი სამეცნიერო პუბლიკაცია და დაიბეჭდა რამდენიმე მონოგრაფია.