ახალი ამბები

ბათუმის შოთა რუსთაველის სახელმწიფო უნივერსიტეტის სტუდენტებმა საქართველოს საუნივერსიტეტო ჩემპიონატში „ინტელექტმარათონი“ გაიმარჯვეს. ბსუ-ს ინტელექტუალებმა ტურნირის სამივე საპრიზო ადგილი დაიკავეს, პირველობა გუნდ „ქსენოფობია გოიმობას“ ერგო, მეორე ადგილი - გუნდ „უქემერიონს“ და მესამე ადგილი - გუნდ „რეაქტუნზს“. ჩემპიონატში სხვადასხვა უნივერსიტეტის 30-მდე გუნდი მონაწილეობდა, ბსუ-დან შიდა საუნივერსიტეტო ტურნირის 6 საუკეთესო გუნდი ასპარეზობდა. საქართველოს საუნივერსიტეტო ჩემპიონატის გამარჯვებულებს სიგელები და სამახსოვრო საჩუქრები გადაეცათ. ინტელექტუალური მარათონი ბათუმის საზღვაო აკადემიის ორგანიზებით სასტუმრო „ჰილტონში“ ჩატარდა.

„ღია მეცნიერების“ კვირეულის ფარგლებში, საქართველოს განათლებისა და მეცნიერების სამინისტროსა და აჭარის ა.რ. განათლების, კულტურისა და სპორტის სამინისტროს ეგიდითა და ბათუმის შოთა რუსთაველის სახელმწიფო უნივერსიტეტის ორგანიზებით, ბსუ-ს სამეცნიერო-კვლევითი ინსტიტუტების მეცნიერ-თანამშრომლები და მკვლევრები მეცნიერებაში შეტანილი მნიშვნელოვანი წვლილისა და ხანგრძლივი ნაყოფიერი საქმიანობისთვის სიგელებით დაჯილდოვდნენ.

ბათუმის შოთა რუსთაველის სახელმწიფო უნივერსიტეტში სტუდენტთა ნახატების გამოფენა მოეწყო. გამოფენაზე წარმოდგენილი იყო სხვადასხვა ფაკულტეტის სტუდენტების: ელდარ ფუტკარაძის, დიანა ნაკაიძის, ანი არძენაძის, ვეფხვია აბაშიძის, ანდრო თავართქილაძის, ვახო გორგილაძის, დალილა მიქელაძის, ლინდა ჭედიას, რუთი მალაყმაძისა და ნუკრი თურმანიძის 50-მდე ნახატი. ღონისძიება მიზნად ისახავდა მოყვარული მხატვრების მხარდაჭერას და მათი შემოქმედების პოპულარიზაციას. გამოფენა ბსუ-ს სტუდენტთა კარიერული განვითარების, კულტურისა და სპორტის დეპარტამენტთან არსებული ფოტო-ვიდეო ხელოვანთა სტუდენტური კლუბის ორგანიზებით გაიმართა.

ბათუმის შოთა რუსთველის სახელმწიფო უნივერსიტეტსა და პედაგოგთა კავშირ „განათლება და სამყაროს“ შორის თანამშრომლობის მემორანდუმი გაფორმდა. დოკუმენტი ითვალისწინებს ერთობლივი სამეცნიერო პროექტების განხორციელებას და კონფერენციების, ვორქშოფების, სემინარებისა და საჯარო ლექციების ჩატარებას. მემორანდუმის გაფორმების შემდეგ, პედაგოგთა კავშირ „განათლება და სამყაროს“ ორგანიზებით ქართულ-აფხაზური ურთიერთობებისადმი მიძღვნილი დოკუმენტური ფილმის ჩვენება და დისკუსია გაიმართა.

ბათუმის შოთა რუსთაველის სახელმწიფო უნივერსიტეტში ნიდერლანდების სამეფოსა და საქართველოს შორის დიპლომატიური ურთიერთობების დამყარების 30 წლისადმი მიძღვნილი XVI-XVIII საუკუნეების იმ ჰოლანდიური რუკებისა და გრავიურების გამოფენა გაიხსნა, სადაც საქართველო და ქართველები არიან ასახული. გამოფენა ნიდერლანდების სამეფოს საგანგებო და სრულუფლებიანმა ელჩმა საქართველოში მააიკე ვან კოლდამმა და ბსუ-ს რექტორმა, პროფესორმა მერაბ ხალვაშმა გახსნეს და გამოფენის მნიშვნელობაზე ისაუბრეს.