ახალი ამბები

ბათუმის შოთა რუსთაველის სახელმწიფო უნივერსიტეტმა ანკარის ბაშქენთის უნივერსიტეტის დელეგაციას უმასპინძლა. ბაშქენთის უნივერსიტეტის სამედიცინო ცენტრების დირექტორი ალი ჰაბერალი, უცხოელ პაციენტებთან ურთიერთობის დეპარტამენტის დირექტორი ებრუ აივაზოღლუ სოი და უცხოელ პაციენტებთან ურთიერთობის დეპარტამენტის დირექტორის მოადგილე თურჰან ნამაზოვი ბსუ-ს რექტორს, პროფესორ მერაბ ხალვაშს, ადმინისტრაციის ხელმძღვანელ ნიკა ჩხარტიშვილს, ფაკულტეტების დეკანებს, პროფესორ-მასწავლებლებსა და სტრატეგიული განვითარებისა და საგარეო ურთიერთობათა დეპარტამენტის წარმომადგენლებს შეხვდნენ.

ბათუმის შოთა რუსთაველის სახელმწიფო უნივერსიტეტში ახალი სასწავლო წელი დაიწყო. პირველკურსელებს სასწავლო წლის დაწყება უნივერსიტეტის რექტორმა მერაბ ხალვაშმა, ფაკულტეტების დეკანებმა და პროფესორ-მასწავლებლებმა მიულოცეს და წარმატებები უსურვეს. პირველკურსელებისათვის გამართულ საინფორმაციო შეხვედრებზე სტუდენტებმა დეტალური ინფორმაცია მიიღეს სწავლის პირობებისა და სტუდენტური სერვისების შესახებ. 2022-2023 სასწავლო წლისთვის ბსუ-ს საბაკალავრო საგანმანათლებლო პროგრამები პირველკურსელებით სრულად დაკომპლექტდა, ერთიანი ეროვნული გამოცდებით ბსუ-ში 1380 პირველკურსელი ჩაირიცხა. საბაკალავრო პროგრამების შევსების მაჩვენებელი გასული წლებისაგან განსხვავებით რეკორდულად გაიზარდა და შეადგენს 98,6 %-ს. 156%-ით მოიმატა ასევე სახელმწიფო სასწავლო გრანტის მქონე აბიტურიენტთა რიცხვმა.

ბათუმის შოთა რუსთაველის სახელმწიფო უნივერსიტეტის ჯაზ ბენდმა ბულგარეთში, ქალაქ ნესებირიში გამართულ საერთაშორისო ფესტივალში "KARNOLSKY" ნომინაციაში - "საუკეთესო ჯაზ ბენდი" პირველი ადგილი დაიკავა. მუსიკალურ ფესტივალში სხვადასხვა ქვეყნის 60-მდე შემოქმედებითი ჯგუფი მონაწილეობდა. უნივერსიტეტი ულოცავს ბენდ „OFF SIDE”-ს გამარჯვებას და წარმატებებს უსურვებს.

ბსუ-ს დოქტორანტი როლანდ შავაძე 2022 წლის მასწავლებლის ეროვნული ჯილდოს 5 ფინალისტს შორისაა. როლანდ შავაძემ ბათუმის შოთა რუსთაველის სახელმწიფო უნივერსიტეტის განათლების ფაკულტეტის სამაგისტრო პროგრამა „განთლების ადმინისტრირება“ 2017 წელს დაასრულა. ბსუ-ში სწავლის პერიოდში ისარგებლა „Erasmus+“-ის გაცვლითი პროგრამით და ერთი სემესტრი სწავლობდა ბულგარეთის რუსეს უნივერსიტეტში, ხოლო 2019 წელს დაასრულა ბსუ-ს მასწავლებლის მომზადების საგანმანათლებლო პროგრამა. ამჟამად, მასწავლებლის ეროვნული ჯილდოს ფინალისტი უნივერსიტეტში მოწვეული ლექტორი და ჰუმანიტარულ მეცნიერებათა ფაკულტეტის ლინგვისტიკის სადოქტორო საგანმანათლებლო პროგრამის დოქტორანტია.

ბათუმის შოთა რუსთაველის სახელმწიფო უნივერსიტეტში პირველკურსელთა რეგისტრაცია დაიწყო. რეგისტრაციის პარალელურად სტუდენტები საკონსულტაციო ცენტრში ღებულობენ დეტალურ ინფორმაციას უნივერსიტეტში მოქმედ სამართლებრივ რეგულაციებზე, სწავლის საფასურის გადახდის წესზე, გაცვლით პროგრამებზე, სოციალურ პროექტებზე, სტიპენდიებსა და შემოქმედებით წრეებზე. პირველკურსელთა რეგისტრაცია გრძელდება 14 სექტემბრის ჩათვლით.