ახალი ამბები

ბათუმის შოთა რუსთაველის სახელმწიფო უნივერსიტეტის სტუდენტებისთვის „ერაზმუს+“-ის გაცვლითი პროგრამის პრეზენტაცია გაიმართა. ბსუ-ს სტრატეგიული განვითარებისა და საგარეო ურთიერთობათა დეპარტამენტის უფროსის მოადგილემ, „ერაზმუს+“-ის გაცვლითი პროგრამების კოორდინატორმა ნანა ყურშუბაძემ სხვადასხვა ფაკულტეტის სტუდენტებს საერთაშორისო გაცვლითი პროგრამის განხორციელების წესები და კონკურსის ჩატარების პირობები გააცნო. პრეზენტაციის დასრულების შემდეგ „ერაზმუს+“-ის გაცვლითი პროგრამების კოორდინატორმა სტუდენტების შეკითხვებს უპასუხა.

ბათუმის შოთა რუსთაველის სახელმწიფო უნივერსიტეტში ოდესის VIII საერთაშორისო ლიტერატურული ფესტივალის ფარგლებში ჰუმანიტარულ მეცნიერებათა ფაკულტეტის სტუდენტებისთვის მთარგმნელ კატია ვოლტერსის მთარგმნელობითი მასტერკლასი გაიმართა თემაზე: „დანაკარგი და შენაძენი თარგმანში“. ღონისძიება ბსუ-ს ჰუმანიტარულ მეცნიერებათა ფაკულტეტის დეკანმა პროფესორმა მარინე გიორგაძემ გახსნა და ლიტერატურული ფესტივალის ჩატარების მნიშვნელობაზე ისაუბრა. მთარგმნელმა კატია ვოლტერსმა ინტერაქციულ ღონისძიებაზე ახალგაზრდებს მთარგმნელობით შემოქმედებით პროცესზე ესაუბრა, საკუთარი გამოცდილება გაუზიარა და მათ შეკითხვებს უპასუხა. მასტერკლასს მოდერატორობას უწევდა ბსუ-ს ჰუმანიტარულ მეცნიერებათა ფაკულტეტის ასისტენტ პროფესორი მარიამ კორინთელი.

ზურა მხეიძემ ბსუ-ს სტუდენტებისთვის საჯარო ლექცია წაიკითხა თემაზე: „თვითმოტივაცია, როგორც წარმატების წინაპირობა“. ცნობილი ფსიქოლოგი მსმენელებს თვითმოტივაციის ამაღლებასა და მასთან დაკავშირებულ ფსიქოლოგიურ გამოწვევებზე ესაუბრა. მომხსენებელმა საუბრისას ყურადღება გაამახვილა ასევე წარმატებისკენ მიმავალ გზაზე შექმნილ ემოციურ დაბრკოლებებსა და მათი გადაჭრის გზებზე. პროფესორ ზურა მხეიძის შეფასებით, ადამიანები დამოუკიდებლად ქმნიან თავის ცხოვრებას და ყველა პრობლემა არასწორი კომუნიკაციის საფუძველზე იქმნება; იმის მიხედვით, თუ როგორია კომუნიკაცია საკუთარ თავთან, ადამიანი ან ბედნიერად გრძნობს თავს ან ვერა; მისი არჩევანია, თუ როგორ კონცეფციას შეიმუშავებს სამყაროსთან ურთიერთობისას, ცხოვრების სწავლა შესაძლებელია. ლექციის დასრულების შემდეგ, პროფესორმა ზურა მხეიძემ სტუდენტების შეკითხვებს უპასუხა.

სოხუმის დაცემიდან 29 წელი გავიდა. ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა, სტუდენტებმა და პროფესორ-მასწავლებლებმა საქართველოს ერთიანობისთვის ბრძოლაში დაღუპულ გმირებს პატივი მიაგეს და საქართველოს თავისუფლებისთვის დაღუპულთა საძმო საფლავი გვირგვინით შეამკეს. ბსუ-ში სახელმწიფო დროშა დილიდან დაშვებულია. სამხედრო დაპირისპირება აფხაზეთში 1992 წლის 14 აგვისტოს დაიწყო. კონფლიქტი ქართულ სამთავრობო ჯარებსა და აფხაზ სეპარატისტთა ძალებს შორის 13 თვესა და 13 დღეს გრძელდებოდა.

ბსუ-ში პროფესიული გადამზადების პროგრამის „ლაბორატორიული ჯანმრთელობა და უსაფრთხოება“ წარდგენა გაიმართა და თანამედროვე აპარატურით აღჭურვილი ლაბორატორიული ჯანმრთელობის და უსაფრთხოების სასწავლო ლაბორატორია გაიხსნა. ჯანმრთელობის და უსაფრთხოების სასწავლო ლაბორატორიაში გადამზადდა აჭარის რეგიონის 10 ადგილობრივი კადრი - ტრენერი და შეიქმნა ქართულენოვანი სახელმძღვანელო. პროექტის ფარგლებში დაგეგმილია 250 მსმენელის გადამზადება, მათ შორის, ბსუ-ს ბაზაზე გადამზადდება 50 მსმენელი.