ახალი ამბები

აბიტურიენტებისათვის ბათუმის შოთა რუსთაველის სახელმწიფო უნივერსიტეტმა ღია კარის დღეები დაიწყო. ბსუ-ს პროფესორ-მასწავლებლებმა და სტუდენტებმა ბათუმისა და ქობულეთის 30-მდე საჯარო და კერძო სკოლაში გამართულ საინფორმაციო შეხვედრებზე მეთორმეტე კლასის მოსწავლეებს უნივერსიტეტის საგანმანათლებლო პროგრამები, საუნივერსიტეტო ცხოვრება, სოციალური პროგრამები, სტიპენდიები, გაცვლითი პროგრამები, სიახლეები და ინფრასტრუქტურა გააცნეს. საინფორმციო შეხვედრის დასარულების შემდეგ, აბიტურიენტებს ბსუ-ს სამახსოვრო საჩუქრები გადაეცათ. 2024-2025 სასწავლო წელს, ბათუმის შოთა რუსთაველის სახელმწიფო უნივერსიტეტში 36 საბაკალავრო საგანმანათლებლო პროგრამაზე 1 590 პირველკურსელი ჩაირიცხება.

აჭარის ტურიზმისა და კურორტების დეპარტამენტის ორგანიზებით გიდების პირველი საერთაშორისო კონფერენცია გაიმართა. მეორე პანელური სესიის „ტურიზმი და მუზეუმები - მუზეუმი როგორც კულტურული მემკვიდრეობისა და ისტორიის საცავი“ მუშაობაში მონაწილეობა მიიღო ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა. რექტორმა ისაუბრა აჭარის რეგიონში ტურიზმის განვითარებაში ბათუმის შოთა რუსთველის სახელმწიფო უნივერსიტეტის შეტანილ წვლილზე, ტურიზმის ფაკულტეტის როლზე, რომელიც ტურისტული მომსახურების საერთაშორისო სტანდარტების დამკვიდრებას უწყობს ხელს და უცხოელ პარტნიორებთან ერთად ამზადებს ტურიზმისა და მასპინძლობის დარგისათვის მაღალკვალიფიციურ სპეციალისტებს. ასევე ხაზი გაუსვა ბსუ-ს მკვლევრების მონაწილეობით განხორციელებულ სამეცნიერო პროექტებს.

ბათუმის შოთა რუსთაველის სახელმწიფო უნივერსიტეტში ზამთრის სკოლა „ევროკავშირში გაწევრიანების პოლიტიკური კრიტერიუმები და ევროპეიზაცია“ გაიხსნა. სკოლა ტარდება „ერაზმუს+“-ის პროგრამის ფარგლებში, ევროკავშირის მიერ დაფინანსებული ჟან მონეს მოდულის „ევროკავშირში გაწევრიანების პოლიტიკური კრიტერიუმები და საქართველოს, მოლდოვასა და უკრაინის ევროპეიზაციის“ ფარგლებში, რომელიც იურიდიული და სოციალურ მეცნიერებათა ფაკულტეტზე ხორციელდება 2023 წლიდან. მოდული მიზნად ისახავს ევროკავშირის ღირებულებების პოპულარიზაციას, ევროკავშირის შესახებ კვლევებისა და სწავლების განვითარების ხელშეწყობის გზით. მოდულის კოორდინატორია ბსუ-ს პროფესორი, ჟან მონეს კათედრის ხელმძღვანელი მალხაზ ნაკაშიძე.

12-15 თებერვალს, თბილისში, ამერიკის შეერთებული შტატების საელჩოს მიერ დაფინანსებული საგრანტო პროგრამის - „უნივერსიტეტების შესაძლებლობების განვითარების პროგრამის“ (UCBP) - ფარგლებში, ოთხდღიანი სემინარი გაიმართა აშშ-სა და საქართველოს შორის კვლევითი თანამშრომლობის შესაძლებლობის გაზრდის საკითხებზე. სემინარებს უძღვებოდნენ უმაღლესი განათლების ექსპერტები აშშ-ის ეროვნული სამეცნიერო აკადემიიდან, ჩიკაგოს, იელის, ციურიხის, კინგს კოლეჯის, და ბეირუთში ამერიკული უნივერსიტეტებიდან. პროგრამას ადმინისტრირებას უწევს საერთაშორისო განათლების ამერიკული საბჭოები აშშ-ის საუნივერსიტეტო კვლევის ადმინისტრატორთა ეროვნულ საბჭოსთან (NCURA) თანამშრომლობით.

პოლიტიკის მეცნიერების დოქტორს, პარის ლოდრონის ზალცბურგის უნივერსიტეტის მეცნიერ-მკვლევარს, ფრანც კოკს ბათუმის შოთა რუსთაველის სახელმწიფო უნივერსიტეტის აკადემიურმა საბჭომ საპატიო დოქტორის წოდება მიანიჭა. დოქტორ ფრანც კოკს დიდი წვლილი მიუძღვის ბსუ-ს ინტერნაციონალიზაციისა და საერთაშორისო პროექტების განხორციელებაში. მეცნიერ-მკვლევარი ფრანც კოკი არის ზალცბურგის უნივერსიტეტის პოლიტიკის მეცნიერების პროგრამის ხელმძღვანელი, ზალცბურგის, ტირანას, ლუბლიანას, სკოპიეს, სარაევოს და სხვა პოლიტიკურ მეცნიერებებში საერთო სამაგისტრო პროგრამის - PoSIG და კონსორციუმის აღმასრულებელი დირექტორი, ზალცბურგის უნივერსიტეტის პოლიტიკის მეცნიერების დეპარტამენტის საერთაშორისო ურთიერთობების, სტუდენტთა კონსულტირებისა და „ერაზმუს+“-ის ოფისის კოორდინატორი, ხელმძღვანელობს ზალცბურგის ეკოენერგიის გაცვლის ასოციაციას.