ახალი ამბები

ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა და აჭარის ა.რ. დასაქმების სააგენტოს დირექტორმა თემურ კახიძემ თანამშრომლობის მემორანდუმს მოაწერეს ხელი. მემორანდუმი ხელს შეუწყობს საგანმანათლებლო პროგრამების გაუმჯობესებას, შრომის ბაზრის მოთხოვნებთან უფრო მეტად დაახლოებას, სტუდენტების პროფესიული უნარ-ჩვევების განვითარებას და დასაქმების სააგენტოს თანამშრომელთა კვალიფიკაციის ამაღლებას. ღონისძიების ფარგლებში აჭარის ა.რ. დასაქმების სააგენტოს დირექტორმა თემურ კახიძემ დეკანებსა და სტუდენტებს 2022 წლის სტუდენტთა დასაქმების ხელშეწყობის მიზნობრივი ქვეპროგრამა წარუდგინა. პროგრამა მიზნად ისახავს ბსუ-ს სტუდენტებისთვის სხვადასხვა მიმართულებით სასწავლო, თეორიული და პრაქტიკული უნარების კურსის გავლას. სწავლის პარალელურად სტუდენტების დასაქმების ხელშემწყობი ღონისძიებების გატარებასა და სტუდენტებში შრომითი უნარების განვითარებას შემდგომი დასაქმების მიზნით.

საქართველოს განათლებისა და მეცნიერების მინისტრის მოადგილემ ნუნუ მიცკევიჩმა და ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა ბსუ-ში Horizon Europe-ის საგრანტო ოფისი გახსნეს. ღონისძიებაზე სიტყვით გამოსვლისას რექტორმა მერაბ ხალვაშმა პროექტის აქტუალობაზე ისაუბრა, საქართველოს განათლებისა და მეცნიერების სამინისტროს მხარდაჭერისთვის მადლობა გადაუხადა და აღნიშნა, რომ სამინისტროს ხელშეწყობით უნივერსიტეტში არაერთი სამეცნიერო პროექტი ხორციელდება. მათ შორის მნიშვნელოვანი პროექტებია: „ცოდნისა და აკადემიური კულტურის გაცვლა ჰუმანიტარულ სფეროში შავი ზღვის რეგიონში, XVIII-XXI საუკუნეების ბოლოს“ და „ციფრული ინოვაციების დანერგვა სკოლებში რეგიონული ინოვაციური ჰაბებისა და მენტორინგის მოდელის საშუალებით”.

ბათუმის შოთა რუსთაველის სახელმწიფო უნივერსიტეტის ეზოში, სტუდენტთა ინიციატივით მანიფესტაცია - ბსუ-ს სტუდენტთა ხმა ევროკავშირს გაიმართა. მანიფესტაცია მიზნად ისახავდა ფართო აუდიტორიისათვის, საქართველოს მოქალაქეებისა და საერთაშორისო პარტნიორებისათვის სტუდენტების ევროკავშირში გაწევრიანების მზაობისა და კეთილგანწყობის გაცნობას. მანიფესტაციას ბსუ-ს რექტორი, პროფესორი მერაბ ხალვაში, ადმინისტრაციის ხელმძღვანელი ნიკა ჩხარტიშვილი და პროფესორ-მასწავლებლები შეუერთდნენ. სტუდენტებმა წარმოადგინეს მოსაზრებები და ის გამოწვევები, რაც ხელს უშლის საქართველოს ევროინტეგრაციას. ღონისძიების დასრულების შემდეგ ახალგაზრდებმა ევროპის მოედნის მიმართულებით მსვლელობა მოაწყვეს.

ბსუ-ში ევროკავშირის მიერ დაფინანსებული „ერაზმუს+“-ის KA2-ის პროგრამის პროექტის „საქართველოს უმაღლეს საგანმანათლებლო დაწესებულებებში სამეცნიერო კვლევების განვითარების ხელშეწყობა” (HERD-ის) შემაჯამებელი კონფერენცია გაიმართა. კონფერენცია გახსნეს ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა, პროექტის კოორდინატორმა, ივანე ჯავახიშვილის სახელობის თბილისის სახელმწიფო უნივერსიტეტის რექტორის მოადგილემ სამეცნიერო დარგში ნინო ოკრიბელაშვილმა და პროექტის პარტნიორი საჯარო უწყებების წარმომადგენლებმა - საქართველოს განათლებისა და მეცნიერების მინისტრის მოადგილემ ნუნუ მიცკევიჩმა და შოთა რუსთაველის საქართველოს ეროვნული სამეცნიერო ფონდის გენერალურმა დირექტორმა ჯაბა სამუშიამ.

ბათუმის შოთა რუსთაველის სახელმწიფო უნივერსიტეტი აკადემიურ კეთილსინდისიერებასთან დაკავშირებულ პირველ საერთაშორისო კონფერენციას მასპინძლობს. კონფერენციაში „აკადემიური კეთილსინდისიერება და დისტანციური სწავლება საგანგებო სიტუაციის დროს - ქართული უმაღლესი საგანმანათლებლო დაწესებულებების პერსპექტივიდან“ საქართველოს და უცხოეთის სხვადასხვა უნივერსიტეტის წარმომადგენლები მონაწილეობენ. კონფერენციის ძირითადი თემაა პანდემიის პირობებში შექმნილი საგანგებო მდგომარეობით გამოწვეული ვითარება, ონლაინ სწავლების პროცესი და მათ ჭრილში აკადემიური კეთილსინდისიერების პრინციპები. წარმოდგენილი მოხსენებები გაერთიანდა რამდენიმე პანელში: სტუდენტების მოტივაცია ონლაინ სწავლების დროს; სწავლის შედეგების შეფასება; აკადემიური პრინციპების დარღვევა და უცხო ენის სწავლების სპეციფიკა.