ტურიზმის ფაკულტეტის „ტურიზმის“ საბაკალავრო პროგრამის პირველი სასწავლო წლის სტუდენტები სასწავლო ვიზიტით პეტრას ისტორიულ-არქეოლოგიურ კომპლექსში იმყოფებოდნენ. ვიზიტი პროგრამით გათვალისწინებული სასწავლო კურსის - „მხარეთმცოდნეობის” ფარგლებში ჩატარდა და მისი მიზანი იყო სტუდენტების ცოდნის გაღრმავება რეგიონული ისტორიული რესურსების შესახებ. სტუდენტებს ადგილზე საშუალება მიეცათ, შეესწავლათ პეტრას ისტორიული მნიშვნელობა და გაეგოთ მემკვიდრეობის მართვის საკითხები, რაც მნიშვნელოვნად განავითარებს სტუდენტების თეორიულ ცოდნასა და პროფესიული უნარ-ჩვევებს.

ტურიზმისა და სასტუმრო აღჭურვილობის მე-15 საერთაშორისო გამოფენის „EBIT 2024-ის’’ სტაჟირებაში მონაწილე ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის სტუდენტებს ბსუ-ს რექტორი მერაბ ხალვაში, საქართველოს საერთაშორისო ინვესტორთა ასოციაციის თავმჯდომარე ოსმან ჩალიშქან-მჟავანაძე, ბსუ-ს ადმინისტრაციის ხელმძღვანელი მერაბ დიასამიძე და ტურიზმის ფაკულტეტის დეკანი ირაკლი კორძაია შეხვდნენ. ახალგაზრდებს ფორუმში აქტიური მონაწილეობისათვის მადლობა გადაუხადეს და სერტიფიკატები გადასცეს. სტუდენტები გამოფენაში წარმატებული მონაწილეობისათვის საქართველოს საერთაშორისო ინვესტორთა ასოციაციისა და საერთაშორისო გამოფენებისა და ღონისძიებების კომპანია „ექსპო ბათუმის" მხარდაჭერით, სექტემბერში ისტორიულ კაბადოკიას ეწვევიან.

პარიზში გამართულ სამეცნიერო კონფერენციაში „ტურიზმის მიერ გამოწვეული განახლება, ურბანიზაცია და რეფორმები - საქართველოს შემთხვევა“ მონაწილეობა მიიღეს ტურიზმის ფაკულტეტის დეკანის მოადგილე დინარა ფაღავამ და ტურიზმის ფაკულტეტის ტურიზმის დეპარტამენტის ასისტენტ პროფესორმა ნარგიზ ფალავანდიშვილმა. კონფერენციაზე მონაწილეებმა წარადგინეს ამავე ფაკულტეტის ასისტენტ პროფესორების, ნინო დევაძისა და ნათია ბერიძის თანაავტორობით მომზადებული სამეცნიერო ნაშრომი „მდგრადი ტურიზმი და ნარჩენების მართვის ოპტიმიზაცია ქ. ბათუმში“. სამეცნიერო სესია გაეროს მსოფლიო ტურიზმის ორგანიზაციის, საფრანგეთის საგარეო საქმეთა სამინისტროს და საფრანგეთში საქართველოს საელჩოს მხარდაჭერით, ასევე კავკასიის ტურიზმის სკოლისა და სორბონის უნივერსიტეტის თანამშრომლობით გაიმართა.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტს ტურიზმის ექსპერტი, გერმანიის მასპინძლობის საერთაშორისო ინსტიტუტის ხელმძღვანელი და ბსუ-ს საპატიო დოქტორი, პროფესორი გერალდ ვეტცელი ეწვია. ვიზიტის ფარგლებში პროფესორმა გერალდ ვეტცელმა შეხვედრა ჩაატარა ტურიზმის სფეროში პერსონალის კვალიფიკაციის, სამოგზაურო ფორმალობებისა და კულტურათაშორისი კომუნიკაციის საკითხებზე იმ სტუდენტებთან, რომლებიც სამი თვის განმავლობაში გერმანიაში სტაჟირებისთვის გაემგზავრებიან.

“ტურიზმის მენეჯმენტის” სამაგისტრო პროგრამის სტუდენტებისთვის საერთაშორისო სასტუმროს მენეჯმენტის ლექცია ჩატარდა. ყოველწლიურ შეხვედრას სასტუმროს ბიზნესისა და მასპინძლობის აქტუალურ საკითხებზე ბსუ-ს საპატიო დოქტორი, „Solutions Holding GmbH” აღმასრულებელი დირექტორი, გერმანიის სასტუმროს კონგრესის მრჩეველთა საბჭოს წევრი, პროფესორი შტეფან გერჰარდი ატარებს. ორდღიანი ლექცია მოიცავს სასტუმროს საერთაშორისო ბიზნესის, გლობალური ტენდენციებისა და სასტუმროს მეგატრენდების საკითხებს.