ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის დირექტორი როინ მალაყმაძე, ფოლკლორის, დიალექტოლოგიისა და ემიგრანტული ლიტერატურის კვლევის განყოფილების უფროსი შუშანა ფუტკარაძე და სპეციალისტი შორენა ფუტკარაძე 15-19 აპრილს დაესწრნენ თურქეთში კავკასიის (ყარსის) უნივერსიტეტის დაარსების 25 წლისადმი მიძღვნილ ღონისძიებებს. მკვლევარებმა მონაწილეობა მიიღეს „კავკასიის უნივერსიტეტების სამეცნიერო-კულტურული ფესტივალში“. ვიზიტის ფარგლებში შეხვედრა გაიმართა უნივერსიტეტის რექტორთან, ისტორიისა და ქართული ფილოლოგიის მიმართულების აკადემიურ პერსონალთან და სტუდენტებთან. მხარეები სამომავლო გეგმებზე შეთანხმდნენ და ხელი მოეწერა კავკასიის უნივერსიტეტთან „მევლანას“ გაცვლითი პროგრამის თანამშრომლობის მემორანდუმს.

სასტუმრო „რედისონში“ ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის სამეცნიერო-პოპულარული და საზოგადოებრივი ჟურნალის - „მაჭახელი“ საიუბილეო ნომრის პრეზენტაცია, ჟურნალისტ გოდერძი შარაშიას დოკუმენტური ფილმის - „მაჭახელას ქართველები“ ჩვენება და ზემო მაჭახელში (თურქეთი) გადაღებული ფოტოების გამოფენა გაიმართა. ჟურნალის მეათე ნომერი ეძღვნება მაჭახელას ეროვნული პარკის საქმიანობას, ხეობის ისტორიისა და ეთნოგრაფიის აქტუალური საკითხებს, არსებულ სიახლეებსა და საზოგადოებისათვის სხვა მნიშვნელოვან პრობლემებს. ღონისძიება გაეროს განვითარების პროგრამის (UNDP) და გლობალური გარემოსდაცვითი ფონდის (GEF) მხარდაჭერით პროექტის - „აჭარის დაცული ტერიტორიების გაფართოება და მართვის დახვეწა“ ფარგლებში ჩატარდა.

ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის ბიბლიოთეკის სამკითხველო დარბაზში ისტორიისა და არქეოლოგიის განყოფილების მთავარმა მეცნიერმა თანამშრომელმა გიორგი თავამაიშვილმა ჩაატარა სემინარი თემაზე: „თამბაქო და გვიანი შუასაუკუნეების ოსმალური ჩიბუხები“. მკვლევარმა განიხილა აღმოსავლური (ე. წ. „ოსმალური“) თიხის ჩიბუხები, რომლებიც აღმოჩენილია როგორც დღევანდელი თურქეთის, ასევე, ყოფილი ოსმალეთის იმპერიის გავლენის ქვეშ მყოფი ქვეყნების ტერიტორიაზე. ამ ნაკეთობათა ათასობით ნიმუში ნაპოვნია საქართველოშიც, მეტწილად, სამხედრო-სტრატეგიული ობიექტების - ციხე-სიმაგრეების გათხრების დროს, სადაც კონკრეტულ პერიოდში ოსმალური ელემენტი იყო წარმოდგენილი.

ნიკო ბერძენიშვილის ინსტიტუტის მკვლევარებმა 2017 წელს, სტამბოლის ქართულ სავანეში განხორციელებული სამეცნიერო ექსპედიციების შედეგები წარმოადგინეს. ექსპედიციის წევრებმა ქართველ კათოლიკეთა სტამბოლის ეკლესია-მონასტერთან არსებულ ბიბლიოთეკასა და არქივში დღემდე უცნობი, თურქეთ-საქართველოს კულტურული ურთიერთობის უახლესი ისტორიისათვის საინტერესო წყაროები აღმოაჩინეს. მათგან აღსანიშნავია დამოუკიდებელი საქართველოს მთავრობის წარმომადგენელთა მიერ შექმნილი ოფიციალური ხასიათის ბარათები, მუსლიმან ქართველთა ლეგიონთან დაკავშირებული ისტორიული წყაროები, სიმონ მდივნის დღიურები და 1924 წლის აგვისტოს აჯანყების მომზადებასთან არსებული ჩანაწერები.

ბსუ-ს ნიკო ბერძენიშვილის ინსტიტუტის ბიბლიოთეკის სამკითხველო დარბაზში, ისტორიისა და არქეოლოგიის განყოფილების უფროსმა, ემერიტუს პროფესორმა ბიჭიკო დიასამიძემ ჩაატარა სემინარი თემაზე: „საქართველოს სამოციქულო მართლმადიდებელი ეკლესიის უწმინდესი სინოდის 2012 წლის 5 ივლისის განჩინება“.