შოთა რუსთაველის საქართველოს ეროვნული სამეცნიერო ფონდის ფუნდამენტური კვლევების 2017 წლის სახელმწიფო სამეცნიერო გრანტების კონკურსში გამარჯვება მოიპოვა ბათუმის შოთა რუსთაველის სახელმწიფო უნივერსიტეტის პროფესორ კახაბერ სურგულაძისა და მკვლევარ ირინა ვარშალომიძის სამეცნიერო პროექტებმა: „კათოლიკობა და კათოლიკეები საქართველოში XIX-XXI საუკუნეებში (ისტორია, კულტურა, თანამედროვეობა)“ და „ხარიტონ ახვლედიანის სახელობის აჭარის მუზეუმი დაცული მონეტების კატალოგი“.

იუნესკოს მიერ დაწესებულ მეცნიერების მსოფლიო დღესთან დაკავშირებით საქართველოს მეცნიერებათა აკადემიამ საპატიო სიგელებით დააჯილდოვა სხვადასხვა დარგის საუკეთესო მეცნიერები. აკადემიის პრეზიდენტმა, აკადემიკოსმა გიორგი კვესიტაძემ უნივერსიტეტის ნიკო ბერძენიშვილის ინსტიტუტს დირექტორს, აკადემიურ დოქტორს როინ მალაყმაძეს სამეცნიერო მიღწევებისათვის საპატიო სიგელი გადასცა. ბათუმის შოთა რუსთაველის სახელმწიფო უნივერსიტეტი როინ მალაყმაძეს ულოცავს წარმატებას.

აჭარის საარქივო სამმართველოში ნიკო ბერძენიშვილის ინსტიტუტის ფოლკლორის, დიალექტოლოგიისა და ემიგრანტული ლიტერატურის კვლევის განყოფილების უფროსმა შუშანა ფუტკარაძემ საჯარო ლექცია წაიკითხა ილია ჭავჭავაძის ცხოვრებასა და შემოქმედებაზე. მეცნიერმა საზოგადოებას გააცნო მწერლისა და საზოგადო მოღვაწის ნაკლებად ცნობილი თუ დღემდე უცნობი საარქივო მასალები და მისი აჭარისადმი ზრუნვის დეტალები. საჯარო ლექცია ილია ჭავჭავაძის დაბადებიდან 180 და გარდაცვალებიდან 110 წლისთავს მიეძღვნა.

13–15 ოქტომბერს თურქეთის ქალაქ სინოპში, სინოპის უნივერსიტეტის არქეოლოგიის დეპარტამენტის ინიციატივით ჩატარდა საერთაშორისო კონფერენცია სინოპისა და შავი ზღვის არქეოლოგიის საკითხებზე, რომელშიც სხვადასხვა ქვეყნის მეცნიერებთან ერთად მონაწილეობდა ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის მთავარი მეცნიერი თანამშრომელი ნინო ინაიშვილი. მკვლევარმა კონფერენციაზე წარადგინა ბსუ უნივერსიტეტის რექტორის მერაბ ხალვაშის ერთობლივი მოხსენება „სინოპური ამფორები კოლხეთში“. კონფერენციის დასასრულს გაიმართა მრგვალი მაგიდა, რომელმაც იმსჯელა სინოპისა და შავი ზღვის არქეოლოგიის პრობლემების შესწავლის ხელშეწყობის მიზნით სხვადასხვა ინსტიტუციებს შორის კავშირების განვითარებაზე.

საფრანგეთის, თურქეთის რამდენიმე უნივერსიტეტისა და ბათუმის შოთა რუსთაველის სახელმწიფო უნივერსიტეტის ორგანიზებით 2016–17 წლებში ჩატარდა ვორკშოფების სერია თემაზე: „ანატოლიის მდინარეები დასავლეთსა და აღმოსავლეთს შორის: ღერძები და საზღვრები (ადამიანისა და გარემოს გეოგრაფიული, ეკონომიკური და კულტურული ინტერაქცია ანტიკურ ხანაში)“. ანკარისა (2016 წლის 17–20 ნოემბერი) და ბათუმის (2017 წლის 4–7 აპრილი) ვორკშოფების შემდეგ, 29–30 სექტემბერს საერთაშორისო ვორკშოფს სტამბულსა და ინეზში (ანტიკური ხანის აინოსი) ანატოლიის კვლევის ფრანგულმა ინსტიტუტმა და სტამბულის უნივერსიტეტმა უმასპინძლეს.