14-18 ივლისს ნიკო ბერძენიშვილის მეცნიერ თანამშრომლები სამეცნიერო მივლინებით ქობულეთის რაიონის სოფლებში: ხუცუბანი, სამება, კოხი, ჭახათი, ზენითი, დაგვა, ჩაქვისთავი იმყოფებოდნენ. მკვლევარებმა აღრიცხეს ამ სოფლებში არსებული მატერიალური კულტურის ძეგლები, კარ-მიდამოები, ტრადიციული საცხოვრებელი და სამეურნეო ნაგებობები, ჭურჭელი, სამუშაო იარაღები, საგზაო ნაგებობები და ა.შ. ექსპედიციის მონაწილეებმა დააფიქსირეს და ჩაიწერეს მასალა ჩაქვისთავში მდებარე უნიკალური საცხოვრებელი სახლის ე.წ. ბეჟანიძეების სასახლის შესახებ. საინტერესო მასალა გამოვლინდა არამატერიალური კულტურის ისეთ ელემენტებზე როგორიცაა: ქორწინება (ნიშნობა, საქორწინო რიტუალი, ახალ პატარძალთან შეხვედრა, მზითeვი), ახალშობილის მოვლა, სახლის მშენებლობა (საძირკველში სხვადასხვა მაგიური ნივთის ჩაგდება, შესაწირავი, ბაირაღის აღმართვა, ნადი).

მალხაზ სიორიძის 60 წლის იუბილესადმი მიძღვნილი საერთაშორისო სამეცნიერო კონფერენცია გაიმართა ბათუმის შოთა რუსთაველის სახელმწიფო უნივერსიტეტში. ქართველმა, უკრაინელმა, პოლონელმა მკვლევრებმა სამეცნიერო ნაშრომი წარმოადგინეს ისტორიის აქტუალურ საკითხებზე და ბოლო პერიოდში წარმოებული კვლევის შედეგები შეაჯამეს. ასევე იმსჯელეს ისეთ თემებზე, როგორიცაა: 1921 წლის ყარსის ხელშეკრულება, ეროვნული საბჭოს მოღვაწეობა უმაღლესი საკანონმდებლო ხელისუფლების ორგანიზაციებისათვის (1918 წ. მაისი - 1919 წ. იანვარი), კონფესიური და ტერიტორიული პრობლემები ამიერკავკასიაში, ფლორიან ზელინსკი - XIX საუკუნეში კავკასიაში გადასახლებული პოლონელი შეთქმულნი, ევროკავშირის შექმნის სათავეებთან ქართველებიც იდგნენ და სხვ.

ბათუმის შოთ რუსთაველის სახელმწიფო უნივერსიტეტის ნიკო ბერძენიშვილის ინსტიტუტის მეცნიერ-თანამშრომლებმა მონაწილეობა მიიღეს ქუთაისის აკაკი წერეთლის უნივერსიტეტში გამართულ სამეცნიერო კონფერენციაში. ლადო ასათიანის დაბადებიდან 100 წლისადმი მიძღვნილ ეროვნულ სამეცნიერო სესიაზე ინსტიტუტის ფოლკლორის, დიალექტოლოგიისა და ემიგრანტული ლიტერატურის კვლევის განყოფილების მთავარმა მეცნიერ-თანამშრომელმა ელზა ფუტკარაძემ ნაშრომი წარადგინა თემაზე: „თბილისი და ფიროსმანი ლადო ასათიანის პოეზიაში“, ხოლო უფროსმა მეცნიერ-თანამშრომელმა ნაილე მიქელაძემ მოხსენება „წუთისოფლის რაობის განცდა ლადო ასათიანის პოეზიაში“ წაიკითხა.

ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის ფოლკლორის, დიალექტოლოგიისა და ემიგრანტული ლიტერატურის კვლევის განყოფილების მთავარი მეცნიერ-თანამშრომლის ნანი გუგუნავას 80 წლისადმი მიძღვნილი საიუბილეო სხდომა გაიმართა. მკვლევარს იუბილე მიულოცეს, წარმატებები უსურვეს და მის ღვაწლზე ისაუბრეს უნივერსიტეტის რექტორმა მერაბ ხალვაშმა, აჭარის ა.რ. განათლების, კულტურისა და სპორტის მინისტრმა ინგა შამილიშვილმა, მკვლევრებმა და პროფესორ-მასწავლებლებმა. ღვაწლმოსილ მეცნიერსა და პედაგოგს წარმატებული პროფესიული საქმიანობისათვის ბსუ-ს რექტორმა სიგელი და სამახსოვრო საჩუქარი გადასცა. ნანი გუგუნავა ემიგრანტი მწერლებისა და სოციოლოგების შემოქმედებას იკვლევს.

ნიკო ბერძენიშვილის ინსტიტუტის ფოლკლორის, დიალექტოლოგიისა და ემიგრანტული ლიტერატურის კვლევის განყოფილების უმცროსმა მეცნიერ-თანამშრომელმა მონაწილეობა მიიღო აკაკი შანიძის დაბადებიდან 130 წლისადმი მიძღვნილ სამეცნიერო კონფერენციაში. მკვლევარმა კოლეგებს მოხსენება წარუდგინა თემაზე: „კაპანდიბის განმარტებისათვის“. ორდღიანი კონფერენციის თემატიკა მრავალფეროვანი იყო, მოიცავდა როგორც უცნობ მასალებს მეცნიერის პირადი არქივიდან, ასევე მეცნიერის სამოღვაწეო დარგებსა და მიმართულებებს; წარმოჩენილი იყო აკაკი შანიძის ღვაწლი ქართული გრამატიკული აზრის განვითარების ისტორიაში, მისი კვლევითი მეთოდოლოგიები და შედეგები, რაც განსაკუთრებულ მნიშვნელობას ანიჭებს მის მეცნიერულ მემკვიდრეობას.