ბათუმის შოთა რუსთაველის სახელმწიფო უნივერსიტეტში ვეტერანთა დღე რამდენიმე ღონისძიებით აღინიშნა. რექტორმა მერაბ ხალვაშმა, სტუდენტებმა, პროფესორ-მასწავლებლებმა და საზოგადოების წარმომადგენლებმა გმირთა ხეივანში ეროვნული გმირის ჟიული შარტავას მემორიალი გვირგვინით შეამკეს. ბსუ-ს სტუდენტების მონაწილეობით გაიმართა ამირან მამალაძის ხსოვნისადმი მიძღვნილი ყოველწლიური ტურნირის ფინალური მატჩი ფეხბურთში, ასევე პირველობა ქუჩის კალათბურთსა და მაგიდის ჩოგბურთში. ფეხბურთის ტურნირში პირველობისათვის გუნდები: „ბსუ-ს ვირტუოზები“ და „1:0“ იბრძოდნენ. შეჯიბრის გარდამავალი თასი „ბსუ-ს ვირტუოზებს“ გადაეცა. ღონისძიების ფარგლებში კინოთეატრ აპოლოში შედგა ფილმის „შინდისის გმირების“ ჩვენება და დისკუსია სტუდენტებისა და ომის ვეტერანების მონაწილეობით.

გერმანული კომპანიის Majorel-ის წარმომადგენლები ბათუმის შოთა რუსთაველის სახელმწიფო უნივერსიტეტის სხვადასხვა სპეციალობის სტუდენტებს შეხვდნენ. ახალგაზრდები შეხვედრაზე ორგანიზაციის საქმიანობასა და სამომავლო პერსპექტივებს გაეცნენ. კომპანიის მიზანია, გერმანული ენის მცოდნე სტუდენტებისა და კურსდამთავრებულების დასაქმება მაღალანაზღაურებად ვაკანსიებზე.

ბათუმის შოთა რუსთაველის სახელმწიფო უნივერსიტეტში დისკუსია გაიმართა თემაზე: „ნივთიერება დამოკიდებულების, მათ შორის აზარტულ თამაშებზე დამოკიდებულების პრევენცია“. დისკუსია ილიას სახელმწიფო უნივერსიტეტის პროფესორმა, ადიქტოლოგიის ინსტიტუტის დირექტორმა, ფსიქოლოგმა, ექსპერტმა, მკვლევარმა დარეჯან ჯავახიშვილმა წარმართა. ღონისძიების ფარგლებში სხვადასხვა სპეციალობის სტუდენტები არსებულ საკითხებთან დაკავშირებულ აქტუალურ საკითხებს გაეცნენ. დისკუსია პროექტის: ნივთიერება დამოკიდებულების, მათ შორის აზარტულ თამაშებზე დამოკიდებულების პრევენცია“ ფარგლებში გაიმართა, რომელსაც ფონდი „გლობალური ინიციატივა ფსიქიატრიაში - თბილისი“ დაავადებათა კონტროლის ეროვნული ცენტრის მხარდაჭერით ახორციელებს.

27 სექტემბერი სოხუმის დაცემის დღეა. ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა და სტუდენტებმა, მთავრობის წევრებთან ერთად, გმირთა ხეივანში ჟიული შარტავას მემორიალი ყვავილებით შეამკეს და საქართველოს ტერიტორიული მთლიანობისთვის დაღუპული გმირების ხსოვნას პატივი კიდევ ერთხელ მიაგეს. ბსუ-ს სტუდენტებმა სოხუმის დაცვისთვის ბრძოლაში დაღუპულთა ხსოვნის საპატივცემულოდ სტუდენტური ტურნირი გამართეს ქუჩის კალათბურთში, მაგიდის ჩოგბურთში, მკლავჭიდისა და ფრენბურთში.

ბათუმის შოთა რუსთაველის სახელმწიფო უნივერსიტეტის მუსიკალური ბენდი საერთაშორისო არტ ფესტივალ-კონკურსის „ნესებრის თანავარსკვლავედი - 2019-ის“ გრან პრის მფლობელია. ფესტივალ-კონკურსი 20-25 აგვისტოს ბულგარეთში, ქალაქ ნესებირში გაიმართა და მასში ევროპის სხვადასხვა ქვეყნის შემოქმედებითი ჯგუფები მონაწილეობდა. ბათუმის შოთა რუსთაველის სახელმწიფო უნივერსიტეტის რექტორი მერაბ ხალვაში ბენდის წევრებთან ერთად მის ხელმძღვანელს კალისტრატე ცინცაძეს შეხვდა, ფესტივალში წარმატებულად მონაწილეობა მიულოცა და მადლობა გადაუხადა უნივერსიტეტისა და ქართული ხელოვნების პოპულარიზაციისათვის.