ხარისხის უზრუნველყოფის სამსახურის ხელმძღვანელი, ასოცირებული პროფესორი მერაბ ხალვაში აჭარის უმაღლესი საბჭოს დეპუტატებთან გიორგი მასალკინთან, დავით ბაციკაძესთან და ირაკლი ჯაშთან ერთად, ჩეხეთის რესპუბლიკაში იმყოფებოდა. ერთკვირიანი ვიზიტი მიზნად ისახავდა ბათუმის შოთა რუსთაველის სახელმწიფო უნივერსიტეტში აგრარული და სიცოცხლის შემსწავლელ მეცნიერებათა განვითარების ხელშეწყობას. პრაღის სიცოცხლის შემსწავლელ მეცნიერებათა უნივერსიტეტის (CULS) აგრობიოლოგიის, კვების პროდუქტებისა და ბუნებრივი რესურსების, სატყეო საქმეთა და ხე-ტყის რესურსების მართვის ფაკულტეტებისა და საერთაშორისო ურთიერთობების ოფისის ხელმძღვანელთან პროფესორ იარომირ ნემეცთან გამართულ შეხვედრებზე დაიგეგმა სამომავლო თანამშრომლობის მიმართულებები. მხარეებმა შეიმუშავეს თანამშრომლობის მემორანდუმის პროექტი, რომელიც ითვალისწინებს სტუდენტებისა და პროფესორ-მასწავლებლების გაცვლას, ერთობლივ სამეცნიერო მუშაობას, სემინარებისა და კონფერენციების მოწყობას. შეთანხმების თანახმად, მომავალი სასწავლო წლიდან, ქართველი სტუდენტები და მაგისტრები 6 თვით ან ერთი წლით აღნიშნულ უმაღლეს სასწავლებელში უფასოდ ისწავლიან.

ბათუმის შოთა რუსთაველის სახელმწიფო უნივერსიტეტის ხარისხის უზრუნველყოფის სამსახურმა ბსუ–ს აკადემიურ და წარმომადგენლობით საბჭოებს 2013–2014 სასწავლო წლის პირველი სემესტრის სტუდენტთა ელექტრონული ფორმით ჩატარებული გამოკითხვის შედეგები წარუდგინა. გამოკითხვაში მონაწილეობა მიიღო სტუდენტთა საერთო რაოდენობის თითქმის 50 %. კითხვარში დასმული კითხვები ძირითადად უნივერსიტეტის აკადემიურ და მატერიალურ სფეროს ეხებოდა.

სოციალურ მეცნიერებათა, ბიზნესისა და სამართალმცოდნეობის ფაკულტეტის ხარისხის უზრულველყოფის სამსახურის უფროსი პროფ. ასიკო ცინცაძე, ხარისხის უზრუნველყოფისა ინტერნაციონალიზაციისა და კონკურენტუნარიანობის განვითარების მიმართულებით გამოცდილების და შედეგების გაზიარების მიზნით, დაესწრო ქუთაისის უნივერსიტეტში პროექტ ,,ინტერნაციონალიზაციისა და უმაღლეს განათლებაში ხარისხის უზრუნველყოფის შედარებითობის ხელშეწყობა” (PICQA) ფარგლებში ჩატარებულ შეხვედრას, სადაც მოსმენილი იქნა პროქტში მონაწილე უცხოელ პარტნიორთა და ქუთაისის უნივერსიტეტის წარმომადგენლების მოხსენებები პროექტის შედეგების ანალიზსა და აკრედიტაციის პროცესის პრობლემების შესახებ საქართველოში.

განათლების ფაკულტეტის ხარისხის უზრულველყოფის სამსახურის უფროსი ასოც.პროფ. ნანა მაკარაძე დაესწრო გერმანიაში, ქ. დრეზდენში, ტემპუსის საგრანტო პროექტის „ინდივიდუალური საჭიროების მქონე ადამიანების საზოგადოებაში ინტეგრირება“ (,,Access to Inclusive Education and Social Integration (ASPIRE)” N530345-TEMPUS-1-2012-1-GE-TEMPUS-JPHES) ფარგლებში ჩატარებული კონსორციუმის მეორე შეხვედრას.

კობლენცის უნივერსიტეტში (University of Koblenz-Landau, გერმანია) ტემპუსის PICQA–ს პროექტის ფარგლებში ჩატარდა პროექტის მონაწილეთა შემაჯამებელი შეხვედრა. შეხვედრას ესწრებოდა საბუნებისმეტყველო მეცნიერებათა და ჯანდაცვის ფაკულტეტის ხარისხის უზრუნველყოფის სამსახურის უფროსი ლეილა ახვლედიანი, რომელმაც შეხვედრის მონაწილეებს ბათუმის უნივერსიტეტის გამოცდილება გაცნო დამსაქმებელთან და საწარმოსთან თანამშრომლობის პრაქტიკისა და პერსპექტივების მიმართებით.