ყირგიზეთის ეროვნულ აგრარულ უნივერსიტეტში გაიმართა Erasmus +-ის (574099-EPP-1-2016-1-IT-EPPKA2-CBHE-SP – PAWER) - „ინტერრეგიონული მობილობის დახვეწა და შესაბამისობის, მართებულობისა და ხარისხის უზრუნველყოფა“ პროექტის მეხუთე საკოორდინაციო შეხვედრა. ღონისძიებაში მონაწილეობა მიიღეს ბსუ-ში PAWER-ის პროექტის მენეჯერი, ზუსტ მეცნიერებათა და განათლების ფაკულტეტის დეკანი, ასოცირებული პროფესორი ლელა თურმანიძე და უფროსი მასწავლებელი, პროექტის მონაწილე ლია დავითაძე. შეხვედრის მონაწილეებმა განიხილეს პროექტის ფარგლებში მიღწეული შედეგები, თითოეული პარტნიორი უნივერსიტეტის ხედვა საერთაშორისო და რეგიონული მობილობის პროცესში არსებული გამოწვევების, პროცესის გამჭვირვალობის, სანდოობისა და ხარისხის გასაუმჯობესებლად. დაიგეგმა აქტივობები პროექტის შემდგომი განვითარებისთვის.

ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტის კიბერ უსაფრთხოების ბანაკი გაიხსნა. კიბერ-უსაფრთხოების ბანაკი ბათუმის ამერიკული კუთხისა და ბათუმის სახელმწიფო უნივერსიტეტის ერთობლივი პროექტია, რომელიც 16-დან 25 წლამდე ახალგაზრდებს ინტენსიურ, 90-საათიან, სასწავლო კურსს თავაზობს. ბანაკის მონაწილეები პროფესიონალი ტრენერების დახმარებით თეორიულ და პრაქტიკულ ცოდნას მიიღებენ, რაც მათ საშუალებას მისცემს იცოდნენ მეტი ონლაინ რისკების, პირადი ინფორმაციის დაცვისა და სპეციალური კომპიუტერული პროგრამის შესახებ.

ბათუმის შოთა რუსთაველის სახელმწიფო უნივერსიტეტში აკადემიკოს ალექსანდრე ხარაზიშვილის საჯარო ლექციების ციკლი დაიწყო თემაზე: „ლექციები სიმრავლეთა თეორიაში, ზომის თეორიასა და კომბინატორულ გეომეტრიაში“. მომხსენებელი ხუთი დღის განმავლობაში სტუდენტებსა და პროფესორ-მასწავლებლებს თანამედროვე მათემატიკის განვითარებადი დარგების: სიმრავლეთა თეორიის, კომბინატორიული გეომეტრიისა და ზომის თეორიის აქტუალურ საკითხებს გააცნობს. ლექციების ციკლი აჭარის ა.რ. განათლების, კულტურისა და სპორტის სამინისტროს უმაღლესი განათლების ხელშეწყობის ქვეპროგრამის ფარგლებში იმართება.

ტრენერმა პაატა პაპავამ ბათუმის შოთა რუსთაველის სახელმწიფო უნივერსიტეტში ტრენინგი ჩაატარა თემაზე: „Office PowerPoint-ის სლაიდების გამოყენება ეფექტური სწავლებისათვის“. სხვადასხვა ფაკულტეტის პროფესორ-მასწავლებლები გაეცნენ სლაიდების, როგორც ეფექტური სასწავლო რესურსის ძირითად დანიშნულებას, განსაზღვრეს ეფექტური სასწავლო სლაიდების საკვანძო მახასიათებლები, გამოიმუშავეს ეფექტური სასწავლო სლაიდის მომზადების მიდგომები და ხერხები. ორდღიანი სწავლება მიზნად ისახავდა ისეთი აქტუალური საკითხების განხილვას, როგორიცაა: სწავლებისა და სწავლის ხარისხის გაუმჯობესების საშუალება, სლაიდების გამოყენებასთან დაკავშირებული საფრთხე (ბარიერები ინტერაქციაში, აქტიურ სწავლაში, კრიტიკულ ანალიზში, უკუკავშირში).

ლანჩხუთის სოფელ ჩიბათის საჯარო სკოლის სამოქალაქო განათლების მასწავლებელი, საქართველოს მასწავლებლის ეროვნული ჯილდოს მფლობელი, 2019 წლის „მასწავლებლის გლობალური ჯილდოს“ ფინალისტი, ვარკის ფონდისა და გლობალური ჯილდოს ელჩი ლადო აფხაზავა ბათუმის შოთა რუსთაველის სახელმწიფო უნივერსიტეტის სტუდენტებს შეხვდა და სემინარი ჩაატარა თემაზე: „ლიდერობა“. ლადო აფხაზავამ განათლების მნიშვნელობა, სამოქალაქო თვითშეგნებისა და პასუხისმგებლობის საკითხები ახალგაზრდებს საკუთარ მოსწავლეებთან ურთიერთობის მაგალითებითა და ინტერაქციული დავალებებით გაუზიარა.