ტრენერმა პაატა პაპავამ ბათუმის შოთა რუსთაველის სახელმწიფო უნივერსიტეტში ტრენინგი ჩაატარა თემაზე: „Office PowerPoint-ის სლაიდების გამოყენება ეფექტური სწავლებისათვის“. სხვადასხვა ფაკულტეტის პროფესორ-მასწავლებლები გაეცნენ სლაიდების, როგორც ეფექტური სასწავლო რესურსის ძირითად დანიშნულებას, განსაზღვრეს ეფექტური სასწავლო სლაიდების საკვანძო მახასიათებლები, გამოიმუშავეს ეფექტური სასწავლო სლაიდის მომზადების მიდგომები და ხერხები. ორდღიანი სწავლება მიზნად ისახავდა ისეთი აქტუალური საკითხების განხილვას, როგორიცაა: სწავლებისა და სწავლის ხარისხის გაუმჯობესების საშუალება, სლაიდების გამოყენებასთან დაკავშირებული საფრთხე (ბარიერები ინტერაქციაში, აქტიურ სწავლაში, კრიტიკულ ანალიზში, უკუკავშირში).

ლანჩხუთის სოფელ ჩიბათის საჯარო სკოლის სამოქალაქო განათლების მასწავლებელი, საქართველოს მასწავლებლის ეროვნული ჯილდოს მფლობელი, 2019 წლის „მასწავლებლის გლობალური ჯილდოს“ ფინალისტი, ვარკის ფონდისა და გლობალური ჯილდოს ელჩი ლადო აფხაზავა ბათუმის შოთა რუსთაველის სახელმწიფო უნივერსიტეტის სტუდენტებს შეხვდა და სემინარი ჩაატარა თემაზე: „ლიდერობა“. ლადო აფხაზავამ განათლების მნიშვნელობა, სამოქალაქო თვითშეგნებისა და პასუხისმგებლობის საკითხები ახალგაზრდებს საკუთარ მოსწავლეებთან ურთიერთობის მაგალითებითა და ინტერაქციული დავალებებით გაუზიარა.

ბათუმის შოთა რუსთაველის სახელმწიფო უნივერსიტეტში, ივანე ჯავახიშვილის სახელობის თბილისის სახელმწიფო უნივერსიტეტში, საქართველოს ტექნიკურ უნივერსიტეტსა და აკაკი წერეთლის სახელმწიფო უნივერსიტეტში, გერმანიის მთავრობის მხარდაჭერით ახალი სამაგისტრო საგანმანათლებლო პროგრამა „პროფესიული განათლება და ადამიანური რესურსების განვითარება“ ამოქმედდება. 2019 წლის 8-12 აპრილს ივანე ჯავახიშვილის თბილისის სახელმწიფო უნივერსიტეტში პროფესორ-მასწავლებელთა ტრენინგი გაიმართა, რომელიც მიზნად ისახავდა ახალი სამაგისტრო პროგრამის განმახორციელებელი პროფესორ-მასწავლებლების გადამზადებას. ტრენინგში ბსუ-ს წარმომადგენლებმაც მიიღეს მონაწილეობა. ტრენინგს უძღვებოდა მაინცის იოჰანეს გუტენბერგის სახელობის უნივერსიტეტის პროფესორი, დოქტორი მარკუს მ. ბიონერი.

საქართველოს ტექნიკური უნივერსიტეტის პროფესორმა, სხვადასხვა საერთაშორისო აკადემიისა და საბჭოს წევრმა პაატა კერვალიშვილმა ბათუმის შოთა რუსთაველის სახელმწიფო უნივერსიტეტში სემინარი ჩაატარა. პროფესორმა პაატა კერვალიშვილმა ზუსტ და საბუნებისმეტყველო მეცნიერებათა ფაკულტეტის პროფესორ-მასწავლებლებს, ახალგაზრდა მკვლევარებსა და სტუდენტებს „კვანტური ბიოლოგიისა“ და „კვანტურ საინფორმაციო ტექნოლოგიების“ უახლოესი კვლევების შედეგები გააცნო.

ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტისა და „ამერიკული კუთხის“ ორგანიზებით ბსუ-ში ტექნოლოგიური ნამუშევრების გამოფენა გაიმართა. წარმოდგენილი იყო „ამერიკული კუთხის“ პროექტ „ვირტუალური რეინჯერების “ მონაწილეების მიერ შექმნილი სხვადასხვა სახის ინოვაციური გამოგონებები და ტექნოლოგიური ნამუშევრები.