ახალი ამბები

ბსუ-ს ეკონომიკისა და ბიზნესის ფაკულტეტის 25 წლის იუბილესადმი მიძღვნილ ღონისძიებათა ციკლის ფარგლებში ჩატარდა ივანე ჯავახიშვილის სახელობის თბილისის სახელმწიფო უნივერსიტეტის პროფესორის, ბსუ-ს საპატიო დოქტორის, აკადემიკოს ვლადიმერ პაპავას საჯარო ლექცია თემაზე „სანქციონომიკა: მსოფლიო ეკონომიკის არქიტექტურის ცვლილება და საქართველოს გამოწვევები“. საჯარო ლექციას ბათუმის შოთა რუსთაველის სახელმწიფო უნივერსიტეტის სტუდენტები, პროფესორ-მასწავლებლები და მკვლევრები ესწრებოდნენ. აკადემიკოსმა ვლადიმერ პაპავამ ლექციაზე მსოფლიო ეკონომიკის სიახლეებთან მიმართებაში საქართველოს ეკონომიკის აქტუალური საკითხები განიხილა.

ბათუმის შოთა რუსთველის სახელმწიფო უნივერსიტეტის ტურიზმის ფაკულტეტის 80 სტუდენტი მიზნობრივი პროგრამის „სტუდენტების საერთაშორისო პრაქტიკა გერმანიის ტურიზმის ინდუსტრიის ორგანიზაციებში“ ფარგლებში, სამთვიან პრაქტიკას გერმანიის მაღალი კლასის სასტუმროებში გაივლის და გაეცნობა სასტუმროს ძირითადი სტრუქტურული ერთეულის ფუნქციონირებას. საერთაშორისო პრაქტიკა გერმანიის შვერინის ბალტიკის კოლეჯსა და ბათუმის შოთა რუსთაველის სახელმწიფო უნივერსიტეტს შორის გაფორმებული მემორანდუმისა და აჭარის ავტონომიური რესპუბლიკის მთავრობის პროგრამული დაფინანსების საფუძველზე ხორციელდება.

ფრანგული ინსტიტუტის დირექტორი პიერ კლუე „ფრანკოფონია 2022-ის“ დღეების ფარგლებში, ბათუმის შოთა რუსთაველის სახელმწიფო უნივერსიტეტის რექტორს, პროფესორ მერაბ ხალვაშს შეხვდა. შეხვედრაზე მხარეებმა მრავალწლიანი თანამშრომლობა შეაჯამეს, განხორცილებული და მიმდინარე საგანმანათლებლო-კულტურული პროექტები შეაფასეს და ფრანკოფონიის საუნივერსიტეტო სააგენტოს (AUF) პროექტებში მონაწილეობის მნიშვნელობაზე ისაუბრეს. დაიგეგმა ევროპეისტიკის დეპარტამენტთან ერთად პროექტების განხორციელება და გაცვლით პროგრამებში მონაწილეობა. ბსუ-ში ასევე ფრანგულ-გერმანული კვირეული ჩატარდება, რომელიც 30 მაისს დაიწყება და 11 ივნისს დასრულდება.

ბსუ-ში „ინტელექტუალური ვიქტორინის“ გაზაფხულის სეზონის პირველი ტური და შემოდგომის სეზონის გამარჯვებული გუნდების დაჯილდოების ცერემონია გაიმართა. რექტორმა, პროფესორმა მერაბ ხალვაშმა, რექტორის მოადგილემ, პროფესორმა თამარ სირაძემ და ვიქტორინის ორგანიზატორმა, პროფესორმა გიორგი მასალკინმა 2021 წლის შემოდგომის სეზონის გამარჯვებული გუნდები დააჯილდოვეს. შემოდგომის სეზონში სხვადასხვა ფაკულტეტის სტუდენტებისაგან დაკომპლექტებული 30 გუნდი მონაწილეობდა.

ღია კარის დღეების ფარგლებში ბათუმის, ქედის, ხელვაჩაურის, მახინჯაურისა და ქობულეთის საჯარო და კერძო სკოლებში ბათუმის შოთა რუსთაველის სახელმწიფო უნივერსიტეტის წარდგენა გაიმართა. პროფესორ-მასწავლებლებმა და სტუდენტებმა მეთორმეტე კლასის მოსწავლეებს უნივერსიტეტის საგანმანათლებლო პროგრამები, სერვისები, სტუდენტური ცხოვრება, სოციალური და გაცვლითი პროგრამები გააცნეს. მომავალ სტუდენტებს წარმატებები უსურვეს და საინფორმაციო ბროშურებთან ერთად სამახსოვრო საჩუქრები გადასცეს.