ახალი ამბები

ბათუმის შოთა რუსთაველის სახელმწიფო უნივერსიტეტში USAID-ის პროგრამის „სამართლის უზენაესობის ხელშეწყობა – ეროვნულ და ადგილობრივ დონეზე“ წარდგენა გაიმართა. ღონისძიება გახსნეს USAID-ის საქართველოს მისიის დირექტორმა პიტერ ვიბლერმა, აღმოსავლეთ-დასავლეთის მართვის ინსტიტუტის ვიცე-პრეზიდენტმა მარკ დიტრიხმა, ბსუ-ს რექტორმა, პროფესორმა მერაბ ხალვაშმა, სასამართლოების, ადგილობრივი და საერთაშორისო ორგანიზაციების წარმომადგენლებმა. პროგრამის მიზანია, კანონის უზენაესობის გაძლიერება მართლმსაჯულების ინსტიტუტების დამოუკიდებლობისა და ეფექტიანობის ხელშეწყობის, საზოგადოების ყველა ფენისთვის მართლმსაჯულებაზე უკეთესი ხელმისაწვდომობის უზრუნველყოფის და ზემოაღნიშნულ ინსტიტუტებზე მოქალაქეთა და ინსტიტუციური ზედამხედველობის გაძლიერების გზით.

ერაზმუსის პროექტის, რურდის (RURD – Role of Universities in the Regional Development) მონაწილეები ბსუ-დან 29-31 მარტს სანტიაგო დე კომპოსტელას უნივერსიტეტში (USC) იმყოფებოდნენ სამუშაო ვიზიტით. პროექტის მონაწილეებს უნივერსიტეტის რექტორი, პროფესორი ანტონიო ლოპესი და ვიცე-კანცლერები მიესალმნენ. ვიზიტის ფარგლებში უნივერსიტეტების წარმომადგენლებმა პროექტის „უნივერსიტეტების როლი რეგიონის განვითარებაში“ მიმდინარეობა შეაფასეს და სამომავლო გეგმებზე იმსჯელეს.

ბათუმის შოთა რუსთაველის სახელმწიფო უნივერსიტეტს პოლონეთის ბიალისტოკის უნივერსიტეტის დელეგაცია ეწვია. დელეგაციის წევრები, პროფესორები: ოლეგ ლატიშონოკი, რედაქტორი იაროსლავ ივანიუკი, მაჩეი კროტოფილი, დოროტა მიხალუკი, ევგენიუშ მირონოვიჩი, ტომაშ ბლაშჩაკი, მალგოჟზატა ვიეჟხოვსკა ბსუ-ს სტუდენტებსა და პროფესორ მასწავლებლებს შეხვდნენ. სტუმრებს ბსუ-ს რექტორი, პროფესორი მერაბ ხალვაში მიესალმა და ორ ქვეყნას შორის არსებულ მრავალწლიან თანამშრომლობასა და სამომავლო პერსპექტივებზე ისაუბრა.

აჭარის ა.რ. მთავრობის გადაწყვეტილებით 1000-ზე მეტ სტუდენტს, რომელთაც მოცემული მომენტისთვის აქვთ ფინანსური დავალიანება და მათი სოციალური ქულა 150 000-მდეა, დაუფინანსდება სწავლის გადასახადი. სტუდენტთა დახმარების პროგრამისათვის ბიუჯეტიდან 800 ათასი ლარი გამოიყოფა. პროგრამაში ბათუმის შოთა რუსთაველის სახელმწიფო უნივერსიტეტის 500-მდე სტუდენტი ჩაერთვება.

ბათუმის შოთა რუსთაველის სახელმწიფო უნივერსიტეტი აბიტურიენტებისათვის ბათუმის საჯარო და კერძო სკოლებში ღია კარის დღეებს მართავს. საინფორმაციო შეხვედრებზე პროფესორ-მასწავლებლებმა მეთორმეტე კლასის მოსწავლეებს უნივერსიტეტის საგანმანათლებლო პროგრამები, საუნივერსიტეტო ცხოვრება, სოციალური პროგრამები, სტიპენდიები, გაცვლითი პროგრამები და სიახლეები გააცნეს. შეხვედრის დასასრულს, აბიტურიენტებს ბსუ-ს საინფორმაციო ბუკლეტები და სამახსოვრო საჩუქრები გადაეცათ. 2022-2023 სასწავლო წელს, ბათუმის შოთა რუსთაველის სახელმწიფო უნივერსიტეტში 32 საბაკალავრო საგანმანათლებლო პროგრამაზე 1 360 პირველკურსელი ჩაირიცხება.