ახალი ამბები

ქართული ენის დღე ბათუმის შოთა რუსთაველის სახელმწიფო უნივერსიტეტში რამდენიმე ღონისძიებით აღინიშნა. გაიმართა სახელმწიფო ენის დეპარტამენტის მიერ შემუშავებული დოკუმენტების - „2021 – 2030 წლების სახელმწიფო ენის ერთიანი პროგრამა (სტრატეგია)“ და „2021-2022 წლების სამოქმედო გეგმის“ განხილვა. ჰუმანიტარულ მეცნიერებათა ფაკულტეტის ასოცირებულმა პროფესორმა ნანა ცეცხლაძემ და პროფესორმა მაია კიკვაძემ სტუდენტებს სახელმწიფო ენის სტრატეგია და განვითარების პოლიტიკის დოკუმენტი გააცნეს. დისკუსიაში ონლაინ რეჟიმში მონაწილეობა მიიღეს სახელმწიფო ენის დეპარტამენტის სამეცნიერო-საგანმანათლებლო პროგრამების სამსახურის უფროსმა თინათინ ბოლქვაძემ და სახელმწიფო ენის ფუნქციონირების ზედამხედველობის სამსახურის უფროსმა მარინე ბერიძემ.

ბათუმის შოთა რუსთაველის სახელმწიფო უნივერსიტეტში ჩატარდა საჯარო ლექცია და დისკუსია თემაზე: „ევროკავშირის ძირითადი ღირებულებები და გაწევრიანების პროცედურა“. ღონისძიება გახსნა ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა. შეხვედრა ორგანიზებული იყო ბსუ-ს ჟან მონეს კათედრის მიერ ინგლისური ენის სასწავლო ცენტრ Eti Holding-თან თანამშრომლობით საჯარო სკოლის მოსწავლეებისთვის. ღონისძიებაში მონაწილეობა მიიღეს საჯარო სკოლის 40-მდე მოსწავლემ და მასწავლებლებმა. ჟან მონეს კათედრის ხელმძღვანელმა, პროფესორმა მალხაზ ნაკაშიძემ ისაუბრა ევროკავშირის ძირითადი ღირებულებების, ასევე ევროკავშირში გაწევრიანების პროცედურის შესახებ.

9 აპრილის ტრაგედიიდან 33 წელი გავიდა. ბათუმის შოთა რუსთაველის სახელმწიფო უნივერსიტეტის სტუდენტები, რექტორი, პროფესორ-მასწავლებლები, საზოგადოების წარმომადგენლები გმირთა ხეივანში შეიკრიბნენ, მემორიალი ყვავილებით შეამკეს და საქართველოს დამოუკიდებლობისთვის დაღუპულთა ხსოვნას პატივი მიაგეს.

ბათუმის შოთა რუსთაველის სახელმწიფო უნივერსიტეტის სტუდენტებმა და პროფესორ-მასწავლებლებმა 1989 წლის 9 აპრილს მთავრობის სასახლესთან საქართველოს დამოუკიდებლობისათვის დაღუპული გმირები გაიხსენეს. უნივერსიტეტის ფოიეში 9 აპრილის ღამის ამსახველი ფოტო-ვიდეო ქრონიკის ჩვენება მოეწყო. ღონისძიების მონაწილეებმა 33 წლის წინ განვითარებულ მოვლენებსა და ისტორიული დღის მნიშვნელობაზე ისაუბრეს, 9 აპრილს რუსთაველის გამზირზე თავისუფლებისთვის ბრძოლის იდეას და უკრაინაში მიმდინარე მოვლენებს შორის გაავლეს პარალელი.

სპორტის საერთაშორისო დღე ბათუმის შოთა რუსთაველის სახელმწიფო უნივერსიტეტში სპორტის სხვადასხვა სახეობაში მინი ტურნირის ჩატარებით აღინიშნა. სტუდენტების და პროფესორ-მასწავლებლების მონაწილეობით პირველობა გაიმართა ჭადრაკში, შაშში, ბილიარდში, მაგიდის ჩოგბურთსა და მკლავჭიდში. სპორტის საერთაშორისო დღე გაეროს გენერალური ასამბლეის გადაწყვეტილებით, 2014 წლიდან აღინიშნება და მსოფლიოში მშვიდობის დამკვიდრებისა და განვითარებისკენაა მიმართული. სპორტული შეჯიბრება ბსუ-ს სტუდენტთა კარიერული განვითარების, კულტურისა და სპორტის დეპარტამენტის ორგანიზებით და აჭარის ჭადრაკისა და მკლავჭიდის ფედერაციების მხარდაჭერით გაიმართა.