კორონავირუსთან დაკავშირებით მოქმედი უწყებათაშორისი საკოორდინაციო საბჭოსა და ბსუ-ს ადმინისტრაციის გადაწყვეტილებით, ბათუმის შოთა რუსთაველის სახელმწიფო უნივერსიტეტში სასწავლო პროცესი, სწავლების სამივე საფეხურზე, როგორც დისტანციურ, ასევე სააუდიტორიო ფორმატში განახლდება 1-ლი ოქტომბრიდან. უცვლელი რჩება სტუდენტთა ადმინისტრაციული და აკადემიური რეგისტრაციის ვადები.
დღეს, ბათუმის შოთა რუსთაველის სახელმწიფო უნივერსიტეტში კოვიდუსაფრთხოების წესების დაცვით პირველკურსელთა რეგისტრაცია დაიწყო. რეგისტრაციის პარალელურად სტუდენტები საკონსულტაციო ცენტრში ღებულობენ დეტალურ ინფორმაციას უნივერსიტეტში მოქმედ სამართლებრივ რეგულაციებზე, სწავლის საფასურის გადახდის წესზე, საერთაშორისო ურთიერთობებსა და გაცვლით პროგრამებზე, სოციალურ პროექტებსა და სტიპენდიებზე, შემოქმედებით და სპორტულ წრეებზე.
რეგისტრაცია გრძელდება 16 სექტემბრის ჩათვლით.
ერაზმუს+-ის მხარდაჭერით განხორციელებული პროექტის „ინოვაციები კურიკულუმში სოციალური ჩართულობის მხარდასაჭერად“ (Curriculum Innovation for Social Inclusion - CISI) ფარგლებში ბათუმის შოთა რუსთაველის სახელმწიფო უნივერსიტეტში პროექტის ჩართული ქართველი პარტნიორების სამუშაო შეხვედრები ტარდება. ხუთი დღის განმავლობაში შეხვედრების მონაწილეები სამუშაო ჯგუფების მიერ მომზადებულ ახალ სასწავლო კურსებს და დაგეგმავენ დისტანციური მუშაობის შემდგომ ნაბიჯებს. ასევე გაანალიზებული იქნება პროექტის განხორციელებაზე COVID19 ის გავლენა და დროული რეაგირების მექანიზმები.
ბსუ-ში სამი დღის განმავლობაში მიმდინარეობდა CODFREURCOR-ის (ცენტრალური და აღმოსავლეთ ევროპის უნივერსიტეტების ჰუმანიტარულ მეცნიერებათა ფრანკოფონიური სადოქტორო კოლეჯი) მე-8 საერთაშორისო კონფერენცია „ეროვნული ლიტერატურა თარგმანში“. კონფერენციის ორგანიზატორები იყვნენ ბსუ-ს ჰუმანიტარულ მეცნიერებათა ფაკულტეტი და ილიას სახელმწიფო უნივერსიტეტის კვლევითი ცენტრი: რომანული ურთიერთგაგება, ინტერტექსტუალური დიალოგი. კონფერენცია ჩატარდა აჭარის განათლების, კულტურისა და სპორტის სამინისტროს ფინანსური მხარდაჭერით.
ბათუმის შოთა რუსთაველის სახელმწიფო უნივერსიტეტის ფუტსალის გუნდი გიორგი შაქარაშვილის სახელობის ოთხთა ტურნირის „შაქარას თასი - 2020“ მინი ფეხბურთში გამარჯვებულია. ტრაგიკულად დაღუპული ფეხბურთელის სახელობის პირველობა ბათუმის ბულვარის სპორტულ მოედანზე, 30-31 აგვისტოს ჩატარდა და მასში მონაწილეობდნენ: ბსუ-ს ფუტსალის გუნდი, ბათუმის „ბათუმი“, ბათუმის საზღვაო აკადემია და თბილისური გუნდი „შაქარას მეგობრები“. პირველ დღეს ბსუ-ს გუნდმა წარმატებით დაიწყო ასპარეზობა და ანგარიშით 2-0 დაამარცხა ბათუმის საზღვაო აკადემიის გუნდი, ხოლო „შაქარას მეგობრებმა" 2-0 სძლია ბათუმის „ბათუმს“.ფინალურ მატჩში ბსუ-ს გუნდი „შაქარას მეგობრებს“ დაუპირისპირდა და ძირითადი დრო ანგარიშით 3-3 დასრულდა. დამატებით პენალტების სერიაში ბსუ-ს გუნდმა ანგარიშით 3:2 გაიმარჯვა და „შაქარას თასი“ მოიპოვა.
