ახალი ამბები

ბათუმის დიგიტალური ჰუმანიტარიის IX საერთაშორისო საზაფხულო სკოლა „ციფრული რუსთველოლოგია“ გაიხსნა ბათუმის შოთა რუსთაველის სახელმწიფო უნივერსიტეტში. ციფრული რუსთველოლოგიის საზაფხულო სკოლა საქართველოში პირველად ტარდება და მასში მონაწილეობს საქართველოს სხვადასხვა უმაღლესი საგანმანათლებლო დაწესებულების სამივე საფეხურის 20-მდე სტუდენტი. ღონისძიება მიზნად ისახავს მსმენელებისთვის თეორიული ცოდნის გაღრმავებასთან ერთად, პრაქტიკული უნარ-ჩვევების გამომუშავებას, რაც მათ საშუალებას მისცემს, ჩაერთონ „ვეფხისტყაოსნის“ მულტილინგვური პარალელური კორპუსის“ შექმნაში.

ბათუმის შოთა რუსთაველის სახელმწიფო უნივერსიტეტის რექტორს მერაბ ხალვაშს თსუ-ს რექტორმა გიორგი შარვაშიძემ ივანე ჯავახიშვილის სახელობის თბილისის სახელმწიფო უნივერსიტეტთან წარმატებული და ნაყოფიერი თანამშრომლობისათვის საიუბილეო მედალი გადასცა. თსუ მედალს ანიჭებს საქართველოს ან უცხო ქვეყნის მოქალაქეს, რომელსაც განსაკუთრებული დამსახურება მიუძღვის ივანე ჯავახიშვილის სახელობის თბილისის სახელმწიფო უნივერსიტეტის სამეცნიერო და სასწავლო პროცესის განვითარებასა და უნივერსიტეტებს შორის სამეცნიერო–კვლევითი საქმიანობის ხელშეწყობაში.

ბათუმის შოთა რუსთაველის სახელმწიფო უნივერსიტეტმა რექტორთა მუდმივმოქმედ კონფერენციას უმასპინძლა თემაზე: „Covid19-ით გამოწვეული კრიზისის დაძლევის გზები და მისი გავლენა ინკლუზიისა და თანასწორობის უზრუნველყოფაზე“. ივანე ჯავახიშვილის სახელობის თბილისის სახელმწიფო უნივერსიტეტის ორგანიზებით გამართულ კონფერენციაზე უმაღლესი განათლების სფეროში კორონავირუსით გამოწვეულ კრიზისის დაძლევის გზებზე და ახალი სასწავლო წლის დაწყებასთან დაკავშირებულ ადმინისტრაციულ სირთულეებზე ისაუბრეს. კონფერენციას თბილისის სახელმწიფო უნივერსიტეტის რექტორი, რექტორთა მუდმივმოქმედი კონფერენციის თავმჯდომარე გიორგი შარვაშიძე, განათლების ხარისხის განვითარების ეროვნული ცენტრის დირექტორი თამარ მახარაშვილი და უმაღლესი საგანმანათლებლო დაწესებულებების რექტორები ესწრებოდნენ.

ბათუმის შოთა რუსთაველის სახელმწიფო უნივერსიტეტში USAID-ის საბაზისო განათლების პროგრამის დირექტორი - ნენსი პარკსის, USAID-ის განათლების სპეციალისტის მედეა კაკაჩიას და USAID-ის საბაზისო განათლების პროგრამის უნივერსიტეტებთან თანამშრომლობის კოორდინატორის ანა აბულაძის სამუშაო ვიზიტი გაიმართა. შეხვედრა მიზნად ისახავდა ბსუ-ს მიერ USAID-ის საბაზისო განათლების პროგრამის ეფექტურად განხორციელების ხელშეწყობის უზრუნველყოფას. სტუმრები უნივერსიტეტის რექტორის მოადგილეს თამარ სირაძეს, ადმინისტრაციისა და პროგრამის წარმომადგენლებს შეხვდნენ.

ევროკომისიის გადაწყვეტილებით, ბათუმის შოთა რუსთაველის სახელმწიფო უნივერსიტეტი Jean Monnet პროგრამის გამარჯვებულია ბსუ-ს პროექტი „ევროპის კავშირის ძირითადი ღირებულებები: დემოკრატია, კანონის უზენაესობა და ადამიანის უფლებების დაცვა", რომელიც წარადგინა მალხაზ ნაკაშიძემ. საერთაშორისო კონკურსის საფუძველზე, ბსუ-ს იურიდიული და სოციალურ მეცნიერებათა ფაკულტეტის ასოცირებული პროფესორი მალხაზ ნაკაშიძე Jean Monnet-ის პროფესორი გახდა და მიენიჭა Jean Monnet-ის კათედრის ხელმძღვანელის სტატუსი 3 წლის ვადით.