ბსუ-ს საბუნებისმეტყველო მეცნიერებათა და ჯანდაცვის ფაკულტეტის ჯანდაცვის მიმართულების პროფესორ-მასწავლებლები და სტუდენტები „თეთრი ხალათების“ აქციას შეუერთდნენ და საოკუპაციო რეჟიმის მიერ უკანონოდ დაკავებულ ექიმს, ვაჟა გაფრინდაშვილს სოლიდარობა გამოუცხადეს.
შოთა რუსთაველის საქართველოს ეროვნული სამეცნიერო ფონდმა „ახალგაზრდა მეცნიერების კვლევების გრანტით დაფინანსების კონკურსის’’ 2019 წლის სახელმწიფო პროგრამის ფარგლებში გამოცხადებული სამეცნიერო-კვლევითი საგრანტო კონკურსის შედეგები გამოაქვეყნა. საგრანტო კონკურსში გამარჯვება მოიპოვეს ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტის მკვლევარების ორმა პროექტმა: „Pectobacterium და Dickeya სახეობებით გამოწვეული კარტოფილის ბაქტერიული დაავადებების შესწავლა საქართველოში“ (სამეცნიერო პროექტის ხელმძღვანელი ფიტოპათოლოგიისა და ბიომრავალფეროვნების ინსტიტუტის მეცნიერი თანამშრომელი მაკა მურადაშვილი) და „ლურჯი მოცვის (Vaccinium ulininosum) პროგრესირებადი სოკოვანი დაავადებების შესწავლა დასავლეთ საქართველოში“ პროექტის ხელმძღვანელი ფიტოპათოლოგიისა და ბიომრავალფეროვნების ინსტიტუტის მეცნიერი თანამშრომელი ლია ქოიავა).
გრაცის სახელმწიფო უნივერსიტეტის პროფესორმა თომას კრუსმანმა ბათუმის შოთა რუსთაველის სახელმწიფო უნივერსიტეტში ლექცია წაიკითხა თემაზე: „სისხლის სამართლის კანონმდებლობის ევროპეიზაცია და მისი როლი ადამიანის უფლებების დაცვის ჭრილში“. პროფესორმა თომას კრუსმანმა იურიდიული და სოციალურ მეცნიერებათა ფაკულტეტის სტუდენტებსა და პროფესორ-მასწავლებლებს გააცნო ისეთი აქტუალური საკითხები, როგორიცაა აღმოსავლეთ ევროპის ქვეყნების კანონმდებლობის, კონკრეტულად სისხლის სამართლის კანონმდებლობის ჰარმონიზაცია ევროკავშირის კანონმდებლობასთან და მისი გავლენა ადამიანის უფლებების დაცვის საკითხებზე.
ესტონეთის რესპუბლიკის ელჩმა საქართველოში კაი კაარელსონმა, გაეროს ბავშვთა ფონდის წარმომადგენელმა საქართველოში ღასან ხალილმა, აჭარის ა.რ. განათლების, კულტურისა და სპორტის მინისტრმა მაია ხაჯიშვილმა და ბსუ-ს რექტორმა მერაბ ხალვაშმა ბათუმის შოთა რუსთაველის სახელმწიფო უნივერსიტეტში განათლების რეფორმის საკითხებზე კონფერენცია გახსნეს. აჭარის ა.რ. განათლების, კულტურისა და სპორტის მინისტრმა მაია ხაჯიშვილმა აჭარაში განათლების რეფორმის მიმდინარეობაზე ისაუბრა, ესტონეთის ელჩმა საქართველოში კაი კაარელსონმა სესიის მონაწილეებს ესტონეთის განათლების სისტემის გამოცდილება გაუზიარა, ხოლო იუნისეფის წარმომადგენელმა საქართველოში დოქტორ ღასან ხალილმა თავის მოხსენებაში ბავშვთა უფლებებზე დაფუძნებული განათლების მნიშვნელობაზე გაამახვილა ყურადღება. ბსუ-ს პროფესორმა ლელა თავდგირიძემ კონფერენციაზე მოხსენება წარადგინა უმაღლეს განათლებაში გაეროს ბავშვთა ფონდის, ესტონეთისა და საქართველოს საპარტნიორო პროგრამის შედეგების შესახებ.
ბათუმის შოთა რუსთაველის სახელმწიფო უნივერსიტეტის სტუდენტური დასის „თეატრონის“ სპექტაკლი „არტ-ხელოვნება“ ბათუმის სტუდენტური თეატრების საერთაშორისო ფესტივალის „დებიუტის“ ჟიურის რჩეულ სპექტაკლად დასახელდა. სპექტაკლი ფრანგი დრამატურგის იასმინა რისეს პიესის მიხედვით რეჟისორმა როინ დვალმა დადგა. ტრაგიკომედიური ჟანრის ერთმოქმედებიან პიესა „არტ ხელოვნებაში“ წარმოდგენილია მეგობრებს შორის გაუცხოების, ჭეშმარიტების ძიების და თანამედროვე ხელოვნების ნიმუშების აღქმის პრობლემატიკა. ბათუმის სტუდენტური თეატრების საერთაშორისო ფესტივალი „დებიუტი“ აჭარის ა. რ. განათლების, კულტურისა და სპორტის სამინისტროს ფინანსური მხარდაჭერით მეორედ გაიმართა.
