ახალი ამბები

2020 წლიდან სს „ბაზისბანკი“ ბსუ-ს ფუტსალის ოფიციალური მხარდამჭერი გახდა. ბათუმის შოთა რუსთაველის სახელმწიფო უნივერსიტეტში ფუტსალის გუნდს სს „ბაზისბანკისგან“ საჩუქრად გუნდის წევრებისა და დამხმარე პერსონალის სათამაშო ფორმები გადაეცა. ბსუ-ს ფუტსალის გუნდი 2012 წელს დაარსდა და სხვადასხვა ჩემპიონატში აქტიურად ღებულობდა მონაწილეობას. ბოლო სამი წლის განმავლობაში გუნდი საქართველოს ფუტსალის უმაღლეს ლიგაში თამაშობს. „ბაზისბანკი“ უმაღლეს საგანმანათლებლო დაწესებულებასთან უკვე 15 წელია თანამშრომლობს, ხოლო 2020 წლიდან სპორტისა და ჯანსაღი ცხოვრების წესის პოპულარიზაციის ხელშეწყობის მიზნით ბსუ-ს ფუტსალის ოფიციალური სპონსორი გახდა.

5 თებერვალი წიგნის საჯაროდ კითხვის მსოფლიო დღეა. ბათუმის შოთა რუსთველის სახელმწიფო უნივერსიტეტის ბიბლიოთეკაში ბსუ-ს ლექტორის თამარ ნიკურაძის წიგნის „ციგრიტი“ საჯარო კითხვა მოეწყო. შეხვედრა ინტერაქტიულ რეჟიმში წარიმართა, ავტორმა ბსუ-ს სტუდენტთან ქეთი ცინცაძესთან ერთად წიგნიდან ამონარიდები წაიკითხა და სტუმრებს პერსონაჟების, გეოგრაფიული სახელებისა და გამოგონილი დაავადებების შესახებ სახალისო დავალებები მისცა.

შოთა რუსთაველის საქართველოს ეროვნული სამეცნიერო ფონდის ფუნდამენტური კვლევების 2020 წლის სახელმწიფო სამეცნიერო გრანტების კონკურსის შედეგები ცნობილი. კონკურსში გამარჯვება მოიპოვა ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის პროფესორ ნანა ხახუტაიშვილისა და ასოცირებულ პროფესორ ზაზა შაშიკაძის სამეცნიერო პროექტებმა: „კოლხეთის უძველესი რკინის მეტალურგიის ინტერდისციპლინარული კვლევები“ და „ორი ოსმალური დავთარი და დოკუმენტები ბათუმის შესახებ“.

ბათუმის შოთა რუსთაველის სახელმწიფო უნივერსიტეტის რექტორი მერაბ ხალვაში კომპანია „ტელევიკის“ სასწავლო განყოფილების ხელმძღვანელს, დირკ ვერბეკესა და ევროკომისიის სინქრონული თარგმანის საპატიო გენერალურ დირექტორს, ნოელ მიულს შეხვდა. ევროკავშირის ინოვაციური საკომუნიკაციო ტექნოლოგიების მწარმოებელი კომპანია „ტელევიკი“ ბათუმის შოთა რუსთაველის სახელმწიფო უნივერსიტეტთან თანამშრომლობს სინქრონული თარგმანის ინფრასტრუქტურული და პროგრამული განვითარების მიზნით. ბსუ-ში უკვე წარმატებით განხორციელდა ინფრასტრუქტურული პროექტი აჭარის ავტონომიური რესპუბლიკის მთავრობისა და განათლების, კულტურისა და სპორტის სამინისტროს მხარდაჭერით.

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა და გერმანული არასამთავრობო ორგანიზაციის „ბერგჰოფის ფონდი“ კავკასიის პროგრამის დირექტორმა ოლივერ ვოლესმა თანამშრომლობის მემორანდუმს მოაწერეს ხელი. მემორანდუმის მიზანია მხარეებმა ითანამშრომლონ საქართველოში არსებული ეთნო-პოლიტიკური კონფლიქტების თემატიკით დაინტერესებული სტუდენტების ცოდნის, კრიტიკული აზროვნების ამაღლებაზე. შეუქმნან მათ შესაბამისი სასწავლო-სადისკუსიო სივრცე, რომელიც დაეხმარებათ მათ ისწავლონ და განავითარონ თავიანთი ცოდნა და უნარ-ჩვევები აღნიშნულ საკითხებში, ხელი შეუწყონ საგანმანათლებლო პროგრამების შესაბამისი სასწავლო კურსების განვითარებას და პროგრამების შემუშავებას.