ახალი ამბები

ახალგაზრდობის საერთაშორისო დღე ბათუმში რამდენიმე ღონისძიებით აღინიშნა. აჭარაში ახალგაზრდობის რეგიონული ცენტრი ამოქმედდა და საოცრებათა პარკში ახალგაზრდობის ფესტივალი გაიმართა. ბათუმის შოთა რუსთაველის სახელმწიფო უნივერსიტეტის სტუდენტებმა და პროფესორ-მასწავლებლებმა მონაწილეობა მიიღეს ახალგაზრდობის ფესტივალში. ბსუ-მ ღონისძიებაზე წარადგინა სამრეწველო ინოვაციების ლაბორატორიაში სტუდენტების მიერ დამზადებული პროექტები. ცნობილი შენობების მაკეტები, კონსტრუქციები, ხელნაკეთი ნივთები, ასევე ფიზიკა-მათემატიკისა და კომპიუტერულ მეცნიერებათა მიმართულების სტუდენტების მიერ დამზადებული ხელსაწყოები, რომელიც ფაბლაბის ხელშეწყობით შეიქმნა. მოწყობილობით შესაძლებელია გარემოსა და ნივთიერების ფიზიკურ-ქიმიური პარამეტრების განსაზღვრა და სხვადასხვა საინტერესო ექსპერიმენტის ჩატარება.

განათლების ხარისხის განვითარების ეროვნული ცენტრის ორგანიზებით, ბათუმის შოთა რუსთაველის სახელმწიფო უნივერსიტეტში მოდულური/დუალური პროგრამების განხორციელების შეფასების საკითხებზე ტრენინგი ტარდება. პროფესიული საგანმანათლებლო პროგრამების განმახორციელებელი სასწავლებლების ხელმძღვანელები და ხარისხის მენეჯერები სამი დღის განმავლობაში ისეთ აქტუალურ საკითხებს გაეცნობიან, როგორიცაა: რა არის და როგორ ხორციელდება თვითშეფასება და რა სახის კრიტერიუმებია გასათვალისწინებელი დაწესებულების სასწავლო და სხვა პროცესების სტანდარტებთან შესაბამისობის დასადგენად.

ბათუმის შოთა რუსთაველის სახელმწიფო უნივერსიტეტმა თაფლის ფესტივალში მიიღო მონაწილეობა. ფესტივალზე ბსუ-ს პროფესიული საგანმანათლებლო პროგრამა „მეფუტკრის“ სტუდენტებმა, ლექტორთან მანანა ბოლქვაძესთან და პროფესიული პროგრამების მართვისა და უწყვეტი განათლების ცენტრის დირექტორთან მადონა მიქელაძესთან ერთად, უნივერსიტეტის ბაზაზე არსებულ საფუტკრე მეურნეობაში წარმოებული თაფლი წარადგინეს. სტუდენტები სასწავლო პრაქტიკის ფარგლებში ფუტკრის მოვლის წესებსა და მეფუტკრეობის პროდუქტების წარმოებას სწავლობენ.

ბსუ-ს მორიგი წარმატება ინტერნაციონალიზაციის მიმართულებით. ერასმუს+ ინსტიტუციური თანამშრომლობის პროექტების (CBHE) შერჩევის შედეგები გამოქვეყნდა. ქართული უნივერსიტეტების მონაწილეობით 6 პროექტი დაფინანსდა, აქედან ოთხი ბსუ-ს ჩართულობით.

2008 წლის რუსეთ-საქართველოს ომში დაღუპული გმირის, ბათუმის შოთა რუსთაველის სახელმწიფო უნივერსიტეტის სტუდენტის, ვახტანგ გორგასლის I ხარისხის ორდენოსან ამირან მამალაძის საფლავი უმაღლესი საგანმანათლებლო დაწესებულების რექტორმა მერაბ ხალვაშმა, აჭარის ა.რ. განათლების კულტურისა და სპორტის მინისტრმა მაია ხაჯიშვილმა, სტუდენტებმა და პროფესორ-მასწავლებლებმა გვირგვინით შეამკეს. უნივერსიტეტელებმა კიდევ ერთხელ პატივი მიაგეს საქართველოს ტერიტორიული მთლიანობისათვის დაღუპული მებრძოლის ხსოვნას და მის ღვაწლზე ისაუბრეს.