ბათუმის შოთა რუსთაველის სახელმწიფო უნივერსიტეტში ნატოს გენერალური მდივნის მოადგილის როუზ გიოტმიოლერის ვიზიტი შედგა. ვიზიტის ფარგლებში საგარეო საქმეთა სამინისტროს ნატოსა და ევროკავშირის შესახებ საინფორმაციო ცენტრის დირექტორი თამარ წულეისკირი ბსუ-ს რექტორს მერაბ ხალვაშს შეხვდა და მადლობა გადაუხდა ღონისძიების მასპინძლობისა და ცენტრის აქტიური მხარდაჭერისთვის.
ბათუმის შოთა რუსთაველის სახელმწიფო უნივერსიტეტში ბაკალავრიატის, მაგისტრატურის, დოქტორანტურის სტუდენტებისა და პროფესორ-მასწავლებლებისთვის საინფორმაციო შეხვედრა გაიმართა ERASMUS+ის გაცვლითი პროგრამის შესახებ. ბსუ-ს სტრატეგიული განვითარებისა და საგარეო ურთიერთობათა დეპარტამენტის უფროსის მოადგილემ ნანა ყურშუბაძემ გაცვლით პროგრამებში მონაწილეობის მსურველებს უცხოეთის უმაღლეს საგანმანათლებლო დაწესებულებებში სწავლების პირობები გააცნო და კონკურსში მონაწილეობისათვის საჭირო დოკუმენტაციის, პარტნიორი უნივერსიტეტების, ვადებისა და სტიპენდიების შესახებ მიაწოდა ინფორმაცია.
აჭარის ავტონომიური რესპუბლიკის საკონსტიტუციო ცვლილებების საყოველთაო-სახალხო განხილვა გაიმართა ბათუმის შოთა რუსთაველის სახელმწიფო უნივერსიტეტში. უმაღლესი საბჭოს თავმჯდომარემ დავით გაბაიძემ საკანონმდებლო ორგანოს წევრებთან ერთად სტუდენტებს, პროფესორ-მასწავლებლებსა და საზოგადოების წარმომადგენლებს კონსტიტუციური კანონის პროექტები გააცნო, რაც პროპორციულ საარჩევნო სისტემაზე გადასვლას ითვალისწინებს. კანონპროექტების განხილვისას ყურადღება გამახვილდა პროპორციულ სისტემაზე, ბუნებრივ ბარიერზე, პარტიული სიების დაკომპლექტების პრინციპებზე, ბლოკებად გაერთიანებასა და საკანონმდებლო ორგანოში მუნიციპალიტეტის წარმომადგენლების მანდატების რაოდენობაზე.
ბათუმის შოთა რუსთაველის სახელმწიფო უნივერსიტეტში ნატოს გენერალური მდივნის მოადგილის როუზ გიოტმიოლერის შეხვედრა გაიმართა დასავლეთ საქართველოს უმაღლესი სასწავლებლების სტუდენტებთან. უნივერსიტეტში გამართულ შეხვედრაზე ნატოს გენერალური მდივნის მოადგილემ ნატო-საქართველოს ურთიერთობებზე, უსაფრთხოების კუთხით მსოფლიოში არსებულ გამოწვევებზე, მათთან გამკლავების მექანიზმებზე ისაუბრა და სტუდენტების შეკითხვებს უპასუხა. შეხვედრის დასასრულს ბსუ-ს რექტორმა მერაბ ხალვაშმა როუზ გიოტმიოლერს სტუმრობისთვის მადლობა გადაუხადა და უნივერსიტეტისგან საჩუქრად წიგნი „აჭარის საგანძური“ და ბსუ-ს ფაბლაბის მიერ დამზადებული საქართველოს რუკა გადასცა, რომელზეც ნატოს ლოგოა გამოსახული.
წარმატებით გაიარა პროგრამული აკრედიტაცია ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის საჯარო მმართველობის საბაკალავრო საგანმანათლებლო პროგრამამ. ვულოცავთ ფაკულტეტის სტუდენტებსა და პროფესორ-მასწავლებლებს ამ მნიშვნელოვან გამარჯვებას.
