29 ივლისიდან 3 აგვისტოს ჩათვლით, კომპანია „ბიოლოგიკა“ და ბათუმის შოთა რუსთაველის სახელმწიფო უნივერსიტეტი ერთობლივად ატარებს საერთაშორისო საზაფხულო სკოლას ბიოსამედიცინო მიმართულებით. სწავლების განმავლობაში მსმენელებს უტარდებათ, როგორც თეორიული, ისე პრაქტიკული მეცადინეობები მიკრობილოგიაში, იმუნოლოგიასა და ბიოქიმიაში. სწავლების საბაზო მასალას წარმოადგენს უნიკალური კრებულები, რომლებიც არის კომპანიის მიერ შექმნილი.
26-30 ივლისის ჩათვლით „დოიჩე ველეს“ ტრენერებმა - თინა ცისკარაძემ და ნინო ორჯონიკიძემ ბსუ-ს პროფესიული პროგრამის ჟურნალისტიკის მიმართულების ლექტორებისთვის ტრენინგები ჩაატარეს. ტრენინგი მიზნად ისახავდა ბათუმის შოთა რუსთაველის სახელმწიფო უნივერსიტეტის პროფესიული საგანმანათლებლო პროგრამის განვითარების ხელშეწყობას, პროგრამების სტრატეგიასა და დიზაინზე მუშაობას, თანამედროვე სასწავლო ინსტრუმენტების გაცნობასა და მეთოდოლოგიას. ტრენინგის ფარგლებში, სამუშაო ჯგუფების მიხედვით შეიქმნა სამი ახალი პროგრამა.
ბათუმის შოთა რუსთაველის სახელმწიფო უნივერსიტეტში კონფერენცია „პრაქტიკული კვლევა საბუნებისმეტყველო საგნების სწავლების ინოვაციისთვის“ გაიხსნა. კონფერენცია ERASMUS+ის პროექტის ARTIST (Action Research to Innovate Science Teaching & Career Orientation - პრაქტიკული კვლევა მეცნიერების სწავლების ინოვაციისა და კარიერული ორიენტაციისათვის) დასკვნით, შემაჯამებელ ღონისძიებას წარმოადგენს. პროექტის ARTIST კოორდინატორია პროფესორი ინგო აილკსი (ბრემენის უნივერსიტეტი), თანა -კოორდინატორი პროფესორი მარიკა კაპანაძე (ილიას სახელმწიფო უნივერსიტეტი). პროექტის განხორციელებაში მონაწილეობს შვიდი ქვეყნის: გერმანიის, ავსტრიის, ნიდერლანდების, ისრაელის, თურქეთის, ფილიპინების, საქართველოს სხვადასხვა უმაღლესი სასწავლებელი. პროექტი მიზნად ისახავს მეცნიერებით სტუდენტთა დაინტერესებას, პრაქტიკული სწავლების გზით საბუნებისმეტყველო საგნების შესწავლის მოტივაციის ამაღლებასა და სწავლების ხარისხის გაუმჯობესებას.
ბსუ-ში ფაკულტეტების მიხედვით კურსდამთავრებულთა საზეიმო გაცილება გაიმართა. უნივერსიტეტის რექტორმა მერაბ ხალვაშმა, ფაკულტეტების დეკანებმა და პროფესორ-მასწავლებლებმა სტუდენტებს სწავლის დამთავრება მიულოცეს და წარმატებები უსურვეს. ღონისძიებაზე სტუდენტები სპეციალური სიგელებით დაჯილდოვდნენ, ასევე თითოეულ კურსდამთავრებულს რექტორის მისალოცი ღია ბარათი გადაეცა. ცერემონიის დასასრულს მანტიებში გამოწყობილმა ბაკალავრებმა ქუდების აყრით აღნიშნეს მათთვის ახალი ცხოვრების დაწყება, ხოლო ჯანდაცვის მიმართულების თეთრ ხალათებში გამოწყობილმა კურსდამთავრებულებმა ტრადიციულად ექიმის ფიცი დადეს. უმაღლესი საგანმანათლებლო დაწესებულება წელს 1000-მდე სტუდენტმა დაასრულა.
ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა მონაწილეობა მიიღო რექტორთა მუდმივმოქმედ კონფერენციაში. კონფერენციის პირველ სხდომას საქართველოს განათლების, მეცნიერების, კულტურისა და სპორტის მინისტრი მიხეილ ბატიაშვილი, ხარისხის განვითარების ეროვნული სააგენტოს ხელმძღვანელი გიორგი ვაშაკიძე, სამინისტროს წარმომადგენლები და სახელმწიფო უნივერსიტეტების რექტორები დაესწრნენ. ამავე სხდომაზე წევრებმა 2 წლის ვადით თავმჯდომარედ, ხმათა უმრავლესობით თსუ-ს რექტორი გიორგი შარვაშიძე აირჩიეს.
