ახალი ამბები

ბათუმის შოთა რუსთაველის სახელმწიფო უნივერსიტეტში საერთაშორისო სამეცნიერო კონფერენცია ბიზანტინოლოგია საქართველოში - 5 გაიხსნა თემაზე: „შავი ზღვა და შავიზღვისპირეთის ქვეყნები - კულტურათა და ცივილიზაციათა გზაჯვარედინი IV-XV საუკუნეებში“. სამდღიანი კონფერენციის მიზანია თანამედროვე ბიზანტინოლოგიასა და ზოგადად ჰუმანიტარულ მეცნიერებებში არსებული ახალი მიმართულებებისა და კვლევების უახლესი, ინოვაციური მეთოდების, ციფრული ჰუმანიტარიის მიღწევების წარმოჩენა და მათი პოპულარიზება საქართველოში. 110 ქართველი, ბერძენი, გერმანელი, ინგლისელი, ამერიკელი და თურქი მკვლევარი სამეცნიერო მოხსენებებს წარმოადგენს შემდეგ რვა სექციაში: ისტორია, წყაროთმცოდნეობა; ხელოვნების ისტორია, არქიტექტურა, არქეოლოგია, ნუმიზმატიკა; ენა და ლიტერატურა; კოდიკოლოგია, ტექსტოლოგია, თარგმანი და ფილოსოფია, რელიგია, თეოლოგია.

ბათუმის შოთა რუსთაველის სახელმწიფო უნივერსიტეტის რექტორის მოადგილემ, პროფესორმა ნათია წიკლაშვილმა და სამეცნიერო კვლევების სამსახურის მთავარმა სპეციალისტმა თამარ ფოლადაშვილმა მონაწილეობა მიიღეს 7-11 ოქტომბერს, ნიცის სოფია ანტიპოლის უნივერსიტეტში გამართულ Erasmus+-ის საგრანტო პროექტის „საქართველოს უმაღლეს საგანმანათლებლო დაწესებულებებში სამეცნიერო კვლევების განვითარების ხელშეწყობის“ მონაწილე ინსტიტუციების შეხვედრაში. ღონისძიების მონაწილეები გაეცნენ მასპინძელი უნივერსიტეტის მუშაობის სპეციფიკას.

„ბავშვის უფლებათა კოდექსის“ საინფორმაციო კამპანიის ფარგლებში ბათუმის შოთა რუსთაველის სახელმწიფო უნივერსიტეტში სტუდენტებთან, პროფესორ-მასწავლებლებთან, პედაგოგებთან და საზოგადოების წარმომადგენლებთან შეხვედრა გაიმართა. საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ სოფო კილაძემ შეხვედრაზე საკანონმდებლო ორგანოს წარმომადგენლებთან ერთად „ბავშვის უფლებათა კოდექსის“ ფარგლებში მომზადებული პროგრამები წარადგინა. ახალი კოდექსი უზრუნველყოფს ბავშვთა ძალადობის პრევენციას, კეთილდღეობასა და განათლების უფლებას. „ბავშვის უფლებათა კოდექსი“ ძალაში 2020 წლის 1 ივნისიდან შევა.

ბათუმის შოთა რუსთაველის სახელმწიფო უნივერსიტეტს შვედეთის სამეფოს ელჩი საქართველოში ულრიკ ტიდესტრომი ეწვია. ბსუ-ს რექტორთან მერაბ ხალვაშთან, პროფესორ-მასწავლებლებთან და სტუდენტებთან გამართულ შეხვედრაზე დიპლომატმა ორი ქვეყნის კულტურულ-საგანმანათლებლო ურთიერთობებზე, სამომავლო თანამშრომლობის მიმართულებებსა და გაცვლით პროგრამებზე ისაუბრა. შეხვედრის დასასრულს შვედეთის სამეფოს ელჩმა საქართველოში ულრიკ ტიდესტრომმა სტუდენტების შეკითხვებს უპასუხა. ვიზიტის ფარგლებში ბსუ-ში შვედი დიპლომატის რაულ ვალენბერგის მოღვაწეობის ამსახველი ფოტოგამოფენა მოეწყო, რომელმაც მეორე მსოფლიო ომის წლებში, ჰოლოკოსტის დროს, 10 ათასამდე ებრაელის სიცოცხლე იხსნა.

ევროკომისიის მიერ დაფინანსებული ერთობლივი სამაგისტრო პროგრამების (Erasmus Mundus JMD) წარდგენა გაიმართა ბათუმის შოთა რუსთაველის სახელმწიფო უნივერსიტეტში. საქართველოს ერაზმუს+-ის ოფისის წარმომადგენლებმა თათა ლორთქიფანიძემ და ნინო ურუშაძემ სხვადასხვა ფაკულტეტის სტუდენტებს ერთობლივ სამაგისტრო პროგრამებზე სწავლებისა და კონკურსში მონაწილეობის პირობები გააცნეს. ევროკაშირი ერაზმუს+-ის პროგრამის ფარგლებში მიღებას აცხადებს 123 ერთობლივ სამაგისტრო საგანმანათლებლო პროგრამაზე, რომლის განხორციელებაშიც ჩართულია ევროპის სხვადასხვა ქვეყნის უნივერსიტეტი.