ახალი ამბები

პროექტის „ციფრული სკოლა – საქართველოს“ შემაჯამებელი კონფერენცია გაიხსნა ბათუმის შოთა რუსთაველის სახელმწიფო უნივერსიტეტში. ორი დღის განმავლობაში პროექტის მონაწილე 60 სკოლის 120 წარმომადგენელი საკუთარ ინოვაციურ პროექტს წარმოადგენს სკოლაში ციფრული სტრატეგიის დანერგვის თემატიკაზე. პროექტს 2018 წლიდან პროექტს ტალინის უნივერსიტეტი ესტონეთის საგარეო საქმეთა სამინისტროს ფინანსური მხარდაჭერით და საქართველოს განათლების, მეცნიერების, კულტურისა და სპორტის სამინისტროსთან მჭიდრო თანამშრომლობით ახორციელებს. „ციფრული სკოლა – საქართველო“ ესტონურ გამოცდილებას ეფუძნება და საქართველოს საჯარო სკოლებში განათლების ხარისხის გაუმჯობესებას ისახავს მიზნად თანამონაწილეობითი დიზაინის, მონაცემებზე დაფუძნებული გადაწყვეტილებების, თანამედროვე ციფრული სასწავლო პრაქტიკის დანერგვით.

ბათუმის შოთა რუსთველის სახელმწიფო უნივერსიტეტში ვიქტორინის „ბსუ-ს ინტელექტუალი - 2019“ ფინალური ტური გაიმართა. ვიქტორინაში უნივერსიტეტის სხვადასხვა ფაკულტეტის სტუდენტებისაგან დაკომპლექტებული 30 გუნდი მონაწილეობდა. ბსუ-ს 2019 წლის გაზაფხულის სეზონის ინტელექტუალური ვიქტორინის ფინალურ შეხვედრაში პირველობისთვის 10 ფინალისტი გუნდი იბრძოდა. პირველი ადგილი გუნდმა „ატარაქსიამ“ დაიკავა, მეორე ადგილი „ინკვიზიციამ“, ხოლო მესამე საპრიზო ადგილზე „ბონზუ პიპინ პოდლი ოპსო კოპოლისი“ გავიდა. ვიქტორინის დასასრულს 10 ფინალისტ გუნდს, ჟიურის წევრებს და პირველობის მხარდამჭერ მაია ბარამიძეს სიგელები გადაეცათ. შეჯიბრი უნივერსიტეტის სტუდენტთა კარიერული განვითარების, კულტურისა და სპორტის დეპარტამენტის ორგანიზებით და პროფესორ გიორგი მასალკინის ხელმძღვანელობით გაიმართა.

ბათუმის შოთა რუსთაველის სახელმწიფო უნივერსიტეტმა მონაწილეობა მიიღო თბილისში გამართულ პროფესიული განათლების ქართულ-გერმანულ დღეებში. ღონისძიების ფარგლებში ორდღიანი კონფერენცია „უნარები საქართველოსთვის - პროფესიული განათლების ქართულ-გერმანული დღეები“ ჩატარდა. სესიაზე, რომელსაც 200-მდე ექსპერტი და მოწვეული სტუმარი ესწრებოდა პროფესიული განათლების მნიშვნელოვანი საკითხები განიხილეს. გერმანელმა ექსპერტებმა ქართველ კოლეგებს პროფესიული განათლების მიმართულებით გამოცდილება გაუზიარეს.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის 70 სტუდენტი სასწავლო პრაქტიკით გერმანიაში მიემგზავრება. ახალგაზრდებს პროექტში გამარჯვება მიულოცეს და წარმატებები უსურვეს ბსუ-ს რექტორმა მერაბ ხალვაშმა, აჭარის ა.რ. განათლების, კულტურისა და სპორტის მინისტრის მოადგილემ ალექსანდრე დავითაძემ და ტურიზმის ფაკულტეტის მასპინძლობის მენეჯმენტის დეპარტამენტის ხელმძღვანელმა როსტომ ბერიძემ. სტუდენტები 3 თვის განმავლობაში პრაქტიკას გერმანიის მაღალი კლასის სასტუმროებში გაივლიან და გაეცნობიან სასტუმროს ყველა ძირითადი სტრუქტურული ერთეულის ფუნქციონირებას.

ბათუმის შოთა რუსთაველის სახელმწიფო უნივერსიტეტში საუნივერსიტეტო სპორტული ტურნირი ჩატარდა. შეჯიბრში სხვადასხვა უმაღლესი საგანმანათლებლო დაწესებულების სტუდენტებთან ერთად აბიტურიენტები მონაწილეობდნენ. პირველობა მკლავჭიდში, წოლჭიმსა და ბაგირის გადაწევაში გაიმართა და მიზნად ისახავდა ჯანსაღი ცხოვრების წესის ხელშეწყობას. მკლავჭიდში I ადგილი 75 კგ წონით კატეგორიაში აბიტურიენტმა რამინ მარკოიძემ მოიპოვა, მძიმე წონით კატეგორიაში I ადგილი ბსუ-ს ეკონომიკისა და ბიზნესის ფაკულტეტის სტუდენტს გიორგი საფარიძეს ერგო. ბაგირის გადაწევაში ბათუმის შოთა რუსთაველის სახელმწიფო უნივერსიტეტის შვიდი სტუდენტისგან დაკომპლექტებულმა გუნდმა გაიმარჯვა. წოლჭიმში I ადგილი დაიკავა (140 კგ. ) და უნივერსიტეტის რეკორდი დაამყარა ბსუ-ს ტექნოლოგიური ფაკულტეტის სტუდენტმა მანუჩარ მარკოიძემ.