ახალი ამბები

ბათუმის შოთა რუსთაველის სახელმწიფო უნივერსიტეტში ინსტიტუციური თანამშრომლობის „საქართველოს უმაღლესი საგანმანათლებლო დაწესებულებების კვლევითი შესაძლებლობების ამაღლება კვლევისა და განვითარების ერთეულების განვითარების გზით/უმაღლესი განათლების ხარჯები კვლევასა და განვითარებაზე (HERD)“ (Erasmus+Capacity Building in Higher Education (CBHE) პროექტის ფარგლებში ვორქშოფი დაიწყო. პროექტი მიზნად ისახავს ქვეყნის მასშტაბით არსებული კვლევითი შესაძლებლობების გაუმჯობესებას საქართველოს უნივერსიტეტებში კვლევითი სამსახურების განვითარების მეშვეობით. სამდღიან ვორქშოპში საქართველოსა და უცხოეთის უნივერსიტეტების 30-მდე წარმომადგენელი მონაწილეობს.

ბულგარეთის რესპუბლიკის საგანგებო და სრულუფლებიანი ელჩი საქართველოში დესისლავა ივანოვა ბათუმის შოთა რუსთაველის სახელმწიფო უნივერსიტეტს ეწვია. დიპლომატიური კორპუსის წარმომადგენელი ბსუ-ს რექტორს მერაბ ხალვაშს შეხვდა და სამომავლო თანამშრომლობის მიმართულებებზე ისაუბრა. მხარეთა შეთანხმებით, დაიგეგმა ბსუ-სა და ბულგარეთის უნივერსიტეტებს შორის ერაზმუს+-ის პროექტის ფარგლებში გაცვლითი პროგრამების ამოქმედება და ბულგარეთის უნივერსიტეტებთან თანამშრომლობის გაღრმავება.

ბსუ-ში შოთა რუსთაველის პოემის „ვეფხისტყაოსნის“ მრავალენოვანი ონლაინპორტალის წარდგენა ჩატარდა. ონლაინპორტალი ბსუ-სა და ფრანკფურტის უნივერსიტეტს შორის დადებული მემორანდუმის საფუძველზე იხსნება და იგეგმება ერთობლივი საერთაშორისო სამეცნიერო პროექტის ფარგლებში „ვეფხისტყაოსნის“ თარგმანების სრული ვერსიის პარალელური კორპუსის შექმნა. პოემა მსოფლიოს 55 ენაზეა ნათარგმნი, რაც არაჩვეულებრივი რესურსია მრავალენოვანი პარალელური კორპუსის შესაქმნელად.

ბათუმის შოთა რუსთაველის სახელმწიფო უნივერსიტეტში მსოფლიო ბანკის პროექტის „ეროვნული ინოვაციების ეკოსისტემა” (GENIE) პრეზენტაცია გაიმართა. საქართველოს ეკონომიკისა და მდგრადი განვითარების სამინისტროს ინოვაციების და ტექნოლოგიების სააგენტოს თავმჯდომარემ ავთანდილ კასრაძემ და სააგენტოს წარმომადგენლებმა სტუდენტებს, ადგილობრივ ბიზნეს-კომპანიებს და სხვა დაინტერესებულ პირებს პროექტის ფარგლებში მიმდინარე ორი საგრანტო პროგრამა წარუდგინეს. პროექტი ფორმირების ეტაპზე მყოფ, ასევე მზარდ ადგილობრივ ბიზნეს-კომპანიებს 100 000-ლარიან და 650 000-ლარიან თანადაფინანსების გრანტებს სთავაზობს. საგრანტო პროგრამების მიზანია საქართველოში საერთაშორისო პოტენციალის მქონე ინოვაციური პროდუქტების და მომსახურების შემუშავება-ათვისების და კომერციალიზაციის გზით ინოვაციების და ინოვაციური საწარმოების წარმოქმნის სტიმულირება. დაინტერესებულ პირებს განაცხადის შევსება და დამატებითი ინფორმაციის მიღება შეუძლიათ მითითებულ ბმულზე: www.grants.gov.ge

ბსუ-ს აკადემიურმა საბჭომ განიხილა უნივერსიტეტის ადმინისტრაციის ხელმძღვანელის თანამდებობაზე ალექსანდრე მითაიშვილის კანდიდატურა და ფარული კენჭისყრით, სიითი შემადგენლობის უმრავლესობით (ცხრა ხმით) წარმომადგენლობით საბჭოს წარუდგინა დასამტკიცებლად. ფარული კენჭისყრით, სიითი შემადგენლობის უმრავლესობით მასვე დაუჭირეს მხარი წარმომადგენლობითი საბჭოს წევრებმა.