ახალი ამბები

„გააზიარე ცოდნა“ - ქუთაისში, ცისფერყანწელების ქუჩაზე, ვერიკო ანჯაფარიძის სკვერში, განათლების, მეცნიერების, კულტურისა და სპორტის სამინისტროს ორგანიზებითა და უმაღლესი და პროფესიული სასწავლებლების მონაწილეობით შემეცნებით-გასართობი ღონისძიებები გაიმართა.
ბათუმის შოთა რუსთაველის სახელმწიფო უნივერსიტეტი ქუთაისში დამოუკიდებლობის დღის აღნიშვნას მრავალფეროვანი პროგრამით შეუერთდა და დამთვალიერებლებს ინტერაქტიული და სამეცნიერო აქტივობები შესთავაზა.

ბათუმის შოთა რუსთაველის სახელმწიფო უნივერსიტეტში საქართველოს პირველი დემოკრატული რესპუბლიკის პარლამენტის დაარსებიდან 100 წლის იუბილესადმი მიძღვნილი სტუდენტთა სამეცნიერო კონფერენცია გაიხსნა. ორი დღის განმავლობაში სხვადასხვა ფაკულტეტის 150 სტუდენტი სამეცნიერო მოხსენებებს ცხრამეტი სექციის მიმართულებით წარმოადგენს. კონფერენციის მიზანია, ხელი შეუწყოს ახალგაზრდების სამეცნიერო საქმიანობაში ჩართვას, მეცნიერული უნარ-ჩვევების ჩამოყალიბებასა და განვითარებას.

ბსუ-ს თავისუფალ სივრცეში „სარდაფი 21“ ბათუმის შოთა რუსთაველის სახელმწიფო უნივერსიტეტის დასის „თეატრონის“ მსახიობის, ლევან გორგილაძის მონოსპექტაკლი „ფერონი“გაიმართა. პიესის ავტორი გიორგი გიოვანია. ნაწარმოები სოციალური რეალობის ანარეკლია და ნათლად გამოხატავს ადამიანურ სისუსტეებსა და ძალადობის ფაქტებს.

ბათუმის შოთა რუსთაველის სახელმწიფო უნივერსიტეტში წიგნის „მცირე ადგილები, ვრცელი საკითხები” (შესავალი სოციალურ და კულტურულ ანთროპოლოგიაში) ქართულენოვანი გამოცემის პრეზენტაცია და საჯარო ლექცია თემაზე: „რატომ არის ანთროპოლოგია მნიშვნელოვანი დღეს, ვიდრე ოდესმე” გაიმართა. ოსლოს უნივერსიტეტის პროფესორმა თომას ჰილანდ ერიქსენმა სტუდენტებსა და პროფესორ-მასწავლებლებს თანამედროვე ანთროპოლოგიის აქტუალური საკითხები და სამეცნიერო კვლევის შედეგები გააცნო. წიგნი აჭარის ა.რ. განათლების, კულტურისა და სპორტის სამინისტროს უმაღლესი განათლების დახმარების პროგრამის ფარგლებში ითარგმნა და გამოიცა.

ფონდის „საერთაშორისო განათლების ცენტრის“ ორგანიზებით ბათუმის შოთა რუსთაველის სახელმწიფო უნივერსიტეტში ამერიკული განათლების გამოფენა გაიმართა. ფორუმზე სტუდენტები და მოსწავლეები ამერიკის შეერთებულ შტატებში განათლების მიღების შესაძლებლობებს, მთავრობის გაცვლით პროგრამებს, ამერიკულ უმაღლეს საგანმანათლებლო დაწესებულებებში ჩარიცხვის კრიტერიუმებს, დაფინანსებისა და სტიპენდიების მოპოვების წესებს გაეცნენ. გამოფენის მონაწილეებს აშშ-ის უნივერისტეტების ამერიკელმა და ქართველმა კურსდამთავრებულებმა უცხოეთში სწავლის გამოცდილება გაუზიარეს და კარიერული განვითარების პოტენციალი წარუდგინეს.