ახალი ამბები

საქართველოს პარლამენტის აპარატის უფროსი გივი მიქანაძე ბათუმის შოთა რუსთაველის სახელმწიფო უნივერსიტეტის სტუდენტებს შეხვდა. გივი მაქანაძემ ახალგაზრდებს საქართველოს პარლამენტის აპარატში მიმდინარე რეფორმები და პრაქტიკისა და სტაჟირების პროგრამა გააცნო. შეხვედრისას ყურადღება გაამახვილა ისეთ საკითხებზე, როგორიცაა: პარლამენტის კვლევითი ცენტრის ჩამოყალიბება და საქმიანობა, მაჟორიტარი დეპუტატების ბიუროების გაძლიერება, პარლამენტის სასწავლო ცენტრის რეფორმირება, სტაჟირების ახალი სისტემა პარლამენტში, პარლამენტის აპარატის აქტიური საგარეო ურთიერთობები და საქართველოს დისტანციური სტაჟირების მოდელი. შეხვედრა საქართველოს პარლამენტის აპარატის ორგანიზებით გაიმართა.

ხელოვნებათმცოდნეობის დოქტორმა, ბათუმის ხელოვნების სასწავლო უნივერსიტეტის ასოცირებულმა პროფესორმა ოლღა ჟღენტმა ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა თემაზე: „ჯონ სტაინბეკი - მწერალი და მოგზაური“. მომხსენებელი სტუდენტებს ჯონ სტაინბეკის ცხოვრების, შემოქმედებისა და საბჭოთა კავშირში მოგზაურობის შესახებ ესაუბრა. ოლღა ჟღენტმა ლექციაზე ყურადღება გაამახვილა ასევე მწერლის ნაწარმოებზე „რუსული დღიურები“ და მის მოგზაურობაზე საქართველოში, კერძოდ თბილისსა და ბათუმში. საჯარო ლექცია საქართველოში ამერიკის შეერთებული შტატების საელჩოს ორგანიზებით გაიმართა.

ბათუმის შოთა რუსთაველის სახელმწიფო უნივერსიტეტი აგრძელებს საქართველოს სხვადასხვა ტერიტორიაზე ხანძრის შედეგად განადგურებული ტყეების მწვანე საფარის აღდგენის კამპანიას. ბსუ-ს ფიტოპათოლოგიისა და ბიომრავალფეროვნების ინსტიტუტის მეცნიერ-თანამშრომლებმა ლაითურში, გადამწვარ ტერიტორიაზე ლაფანის, ჰართვისის მუხის, იაპონური კრიპტომერიის, კედარის და მურყანის ნერგები დარგეს. გლობალური წითელი ნუსხის სახეობები, ლაფანის (30 ძირი) და ჰართვისის მუხის (2 ძირი) ნერგები ინსტიტუტის სანერგეში კოლხეთის ტორფნარებისა და წყლის ეკოსისტემების კონსერვაციის განყოფილებამ გამოიყვანა, ხოლო ქობულეთის სატყეოს თიკერის სანერგე მეურნეობაში გამოყვანილი იაპონური კრიპტომერიის, კედარის და მურყანის 100-მდე ნერგი უნივერსიტეტს აჭარის სატყეო დეპარტამენტმა ლაითურის ტყის მწვანე საფარის აღსადგენად უსასყიდლოდ გადასცა.

ბსუ-ს ქორეოგრაფიულმა ანსამბლმა „ტბეთმა“ მონაწილეობა მიიღო ცეკვის საერთაშორისო დღისადმი მიძღვნილ სტუდენტურ ქორეოგრაფიულ ფორუმ-ფესტივალში „ტერფსიქორე - 2019“. პროექტი მიზნად ისახავდა ახალგაზრდების პროფესიული ცოდნის გაღრმავებას, ქორეოგრაფიული ხელოვნების პოპულარიზაციასა და განვითარების ხელშეწყობას. ფესტივალი საქართველოს შოთა რუსთაველის თეატრისა და კინოს სახელმწიფო უნივერსიტეტის ორგანიზებით 2013 წლიდან იმართება და მასში საქართველოს უმაღლესი საგანმანათლებლო დაწესებულებების ქორეოგრაფიული ანსამბლები მონაწილეობენ.

ბათუმის შოთა რუსთაველის სახელმწიფო უნივერსიტეტის ახალი სტუდენტური საცხოვრებელი რექტორმა მერაბ ხალვაშმა და აჭარის ა.რ. მთავრობის თავმჯდომარემ თორნიკე რიჟვაძემ ოფიციალურად გახსნეს. გახსნის ცერემონიას აჭარის ა.რ. განათლების, კულტურისა და სპორტის მინისტრი ინგა შამილიშვილი, აჭარის ა.რ. უმაღლესი საბჭოს თავმჯდომარე დავით გაბაიძე, ქალაქ ბათუმის მერი ლაშა კომახიძე, აჭარის ა.რ. უმაღლესი საბჭოს განათლების, კულტურისა და სპორტის საკითხთა კომისიის თავმჯდომარე ვლადიმერ მგალობლიშვილი, პროფესორ-მასწავლებლები და სტუდენტები ესწრებოდნენ.