ბათუმის შოთა რუსთაველის სახელმწიფო უნივერსიტეტი ბათუმის ცენტრალურ პარკში სიყვარულის ხეივნის გაშენების აქციას შეუერთდა. ბსუ-ს რექტორის მოადგილემ თამარ სირაძემ და უნივერსიტეტის სტუდენტებმა იაპონური ალუბლის ხეები დარგეს. სიყვარულის ხეივანში 135 იაპონური ალუბლის ხე დაირგო. აქცია ბათუმის გამწვანებისა და ლანდშაფტური დაგეგმარების სამსახურის ორგანიზებით გაიმართა.
„მეგობრები არ ითვლიან ქრომოსომებს!“ - ამ სლოგანით ბათუმის შოთა რუსთაველის სახელმწიფო უნივერსიტეტში დაუნის სინდრომის საერთაშორისო დღისადმი მიძღვნილი ღონისძიებები გაიმართა. საბუნებისმეტყველო მეცნიერებათა და ჯანდაცვის ფაკულტეტის სტუდენტებმა და პროფესორ-მასწავლებლებმა დაუნის სინდრომის შესახებ ცნობიერების ამაღლების მიზნით კონფერენცია ჩაატარეს. ბიოლოგიის II კურსის სტუდენტებმა ღონისძიებაზე წარადგინეს თემატური პრეზენტაციები: „დაუნის სინდრომის გენეტიკა“, „დაუნის სინდრომის მქონე ადამიანთა ფენოტიპური თავისებურებანი“, „დაუნის სინდრომის მქონე ცნობილი ადამიანები“ და „დაუნის სინდრომის მქონე ადამიანების სწავლების სტრატეგიები“. ახალგაზრდებმა ასევე ვიდეორგოლების ჩვენება მოაწყვეს და სხვადასხვა ტიპის აქტივობები გამართეს. იურიდიული და სოციალურ მეცნიერებათა ფაკულტეტის სტუდენტებმა მე-18 საჯარო ბაღის მასწავლებლებთან შეხვედრა ჩაატარეს დაუნის სინდრომის საკითხებზე და აღსაზრდელებთან ერთად ხეები დარგეს.
ბათუმის შოთა რუსთველის სახელმწიფო უნივერსიტეტში ინტელექტუალური ვიქტორინის „ბსუ-ს ინტელექტუალი“ გაცნობითი ხასიათის თამაში გაიმართა. ვიქტორინაში სხვადასხვა ფაკულტეტის სტუდენტებისაგან დაკომპლექტებული 27 გუნდი მონაწილეობდა. შეჯიბრი თვეში ორჯერ გაიმართება და სემესტრის ბოლოს გამარჯვებულ სამ საუკეთესო გუნდს სამახსოვრო საჩუქრები გადაეცემა. „ბსუ-ს ინტელექტუალი“ უნივერსიტეტის სტუდენტთა კარიერული განვითარების, კულტურისა და სპორტის დეპარტამენტის ორგანიზებით ტარდება.
უვიზო მიმოსვლის თემაზე ბათუმის შოთა რუსთაველის სახელმწიფო უნივერსიტეტში საინფორმაციო კამპანია გაიმართა. საქართველოს საგარეო საქმეთა სამინისტროს საკონსულოს დეპარტამენტის დირექტორმა გოგა ტაბატაძემ და დიპლომატიური ინსტიტუტის მკვლევარმა, ელჩმა მიხეილ უკლებამ სტუდენტებსა და პროფესორ-მასწავლებლებს ევროკავშირის ზონაში უვიზო მიმოსვლის წესები და მასთან დაკავშირებული აქტუალური საკითხები გააცნეს. ღონისძიება საქართველოს საგარეო საქმეთა სამინისტროსა და ნატოსა და ევროკავშირის შესახებ საინფორმაციო ცენტრის ორგანიზებით ჩატარდა.
თბილისში, საგამოფენო ცენტრ „ექსპო-ჯორჯიაში” გამართული ბელარუსიის რესპუბლიკის გამოფენის „Made in Belarus”-ის ფარგლებში ბათუმის შოთა რუსთაველის სახელმწიფო უნივერსიტეტსა და ბელარუსიის მეცნიერებათა ეროვნული აკადემიის მინსკის ცენტრალურ ბოტანიკურ ბაღს შორის თანამშრომლობის მემორანდუმი გაფორმდა. დოკუმენტი ითვალისწინებს ერთობლივი სასწავლო-სამეცნიერო პროექტების განხორციელებას, სამეცნიერო კონფერენციების, სემინარების, საზაფხულო სკოლების ჩატარებას, გაცვლითი პროგრამების ამოქმედებას და ერთობლივი სადოქტორო საგანმანათლებლო პროგრამების შექმნას. მემორანდუმი ბსუ-ს ფიტოპათოლოგიისა და ბიომრავალფეროვნების ინსტიტუტის ინიციატივით გაფორმდა.
