ახალი ამბები

ბათუმის შოთა რუსთაველის სახელმწიფო უნივერსიტეტმა აბიტურიენტებისათვის ღია კარის დღეები დაიწყო. უმაღლესი საგანმანათლებლო დაწესებულების პროფესორ-მასწავლებლებმა და სტუდენტებმა ბათუმის საჯარო და კერძო სკოლების მეთორმეტე კლასის მოსწავლეებს უნივერსიტეტის საგანმანათლებლო პროგრამები, საუნივერსიტეტო ცხოვრება, სოციალური პროგრამები, სტიპენდიები, გაცვლითი პროგრამები და სიახლეები გააცნეს. 2019-2020 სასწავლო წელს ბსუ-ში 35-მდე საბაკალავრო საგანმანათლებლო პროგრამაზე 1315 პირველკურსელი ჩაირიცხება, მათგან 460 სახელმწიფო დაფინანსებით ისწავლის. აბიტურიენტებს ბათუმის შოთა რუსთაველის სახელმწიფო უნივერსიტეტის საინფორმაციო ბუკლეტები და სამახსოვრო საჩუქრები გადაეცათ.

საქართველოს იუსტიციის სამინისტროს მონაცემთა გაცვლის სააგენტოს წარმომადგენლებმა ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხეს ელექტრონული მმართველობის თემაზე. სტუდენტები ელექტრონული ხელმოწერისა და ელექტრონული სანდო მომსახურების, სერვისების ერთიანი პორტალის www.my.gov.ge-ისა და კიბერუსაფრთხოების აქტუალურ საკითხებს გაეცნენ. საჯარო ლექცია USAID-ის დემოკრატიული მმართველობის პროგრამის GGI-ის ფარგლებში გაიმართა.

ბათუმის შოთა რუსთაველის სახელმწიფო უნივერსიტეტის სტუდენტური დასის „თეატრონის“ სპექტაკლის „არტ ხელოვნება“ პრემიერა გაიმართა. სპექტაკლი ფრანგი დრამატურგის იასმინა რისეს პიესის მიხედვით რეჟისორმა როინ დვალმა დადგა. ტრაგიკომედიური ჟანრის პიესა „არტ ხელოვნება“ ერთმოქმედებიანია და მასში ბსუ-ს სხვადასხვა სპეციალობის სტუდენტები: დათო შაინიძე, ლევან გორგილაძე და თორნიკე ტარიელაძე მონაწილეობდნენ. სპექტაკლში წარმოდგენილია მეგობრებს შორის გაუცხოების, ჭეშმარიტების ძიების და თანამედროვე ხელოვნების ნიმუშების აღქმის პრობლემატიკა.

საქართველოს პარლამენტმა ბათუმის შოთა რუსთაველის სახელმწიფო უნივერსიტეტს ქართული პარლამენტარიზმის საუკუნოვანი იუბილესადმი მიძღვნილი სამახსოვრო მედალიონი გადასცა. 100 წლის წინ შეიკრიბა საქართველოს დამფუძნებელი კრება, რომელმაც შექმნა იმ ეპოქისათვის გამორჩეულად პროგრესული კონსტიტუცია და კანონმდებლობა.

ბათუმის შოთა რუსთველის სახელწიფო უნივერსიტეტი პროექტის ფარგლებში „სილამაზე და ჯანსაღი გარემო ქალაქის ქუჩებში" გამწვანების აქციას შეუერთდა. ბსუ-ს რექტორის მოადგილემ თამარ სირაძემ და სტუდენტებმა ესტაკადის მიმდებარე ტერიტორიაზე 26 დეკორატიული ვაშლის, 3 ტყემლისა და 6 პალმის ხე დარგეს. პროექტი „სილამაზე და ჯანსაღი გარემო ქალაქის ქუჩებში „ა(ა)იპ" ბათუმის გამწვანებისა და ლანდშაფტური დაგეგმარების სამსახურის“ ორგანიზებით ხორციელდება.