ახალი ამბები

ბათუმის შოთა რუსთაველის სახელმწიფო უნივერსიტეტში საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის საჯარო შეხვედრა გაიმართა. კომიტეტის თავმჯდომარემ სოფიო კილაძემ და ბათუმის 69-ე ოლქის მაჟორიტარმა დეპუტატმა საქართველოს პარლამენტში ლევან ბეჟანიძემ მოქალაქეებს სოციალური მუშაობის შესახებ საქართველოს კანონის და ოჯახში ძალადობის პრევენციისკენ მიმართული საკანონმდებლო ცვლილებები გააცნეს.

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა და საქართველოს რაგბის მხარდამჭერთა კლუბის თავმჯდომარემ ილია როდონაიამ თანამშრომლობის მემორანდუმს მოაწერეს ხელი. ხელშეკრულება მიზნად ისახავს ახალგაზრდებში რაგბის პოპულარიზაციას, ერთობლივი სპორტული ღონისძიებების, ტრენინგების, სემინარების ჩატარებასა და პროექტების განხორციელებას. მემორანდუმის გაფორმების შემდეგ სხვადასხვა ფაკულტეტის სტუდენტებთან გამართულ შეხვედრაზე ილია როდონაიამ სამომავლო თანამშრომლობის მიმართულებებზე ისაუბრა.

განათლების საერთაშორისო დღე აღინიშნა ბათუმის შოთა რუსთაველის სახელმწიფო უნივერსიტეტში. ბათუმის N1 და N2 საჯარო სკოლის მოსწავლეებმა ფლეშმობი მოაწყვეს, უმაღლესი საგანმანათლებლო დაწესებულების ეზო მოხატეს, განათლების თემაზე ნახატები შექმნეს და სიმბოლურად ბუშტები გაუშვეს. ღონისძიება უნივერსიტეტისა და აჭარის ა.რ. განათლების, კულტურისა და სპორტის სამინისტროს ორგანიზებით გაიმართა. 24 იანვარი განათლების საერთაშორისო დღედ გაეროს გენერალური ასამბლეის გადაწყვეტილებით გამოცხადდა.

„წითელი ჯვრის“ ბათუმის ფილიალის მოხალისეებმა და ტრენერებმა ბათუმის შოთა რუსთაველის სახელმწიფო უნივერსიტეტის სტუდენტებს ტრენინგი ჩაუტარეს პირველადი სამედიცინო დახმარების თემაზე. სწავლება მიზნად ისახავდა პირველადი დახმარებისათვის აუცილებელი უნარ-ჩვევების ჩამოყალიბებასა და გადაუდებელი სიტუაციების შემთხვევაში პირველადი სამედიცინო დახმარების გაწევისათვის საჭირო ცოდნის მიღებას. პროექტის ფარგლებში ბათუმის შოთა რუსთაველის სახელმწიფო უნივერსიტეტის იურიდიულ და სოციალურ მეცნიერებათა ფაკულტეტის ბაკალავრიატის პირველი საფეხურის სტუდენტთა ინიციატივით, უნივერსიტეტის ყველა კორპუსსა და სართულზე თებერვალში მოეწყობა პირველადი სამედიცინო დახმარების კუთხეები.

ბათუმის შოთა რუსთაველის სახელმწიფო უნივერსიტეტი 2015-2018 წლებში დაფინანსებული ერაზმუს+-ის გაცვლითი პროგრამებისა და პროექტების განაწილების მიხედვით, საქართველოს უმაღლეს საგანმანათლებლო დაწესებულებებს შორის მესამე ადგილზეა. ერაზამუს+-ის საქართველოს ეროვნული ოფისის სტატისტიკის მიხედვით, ამ დროის განმავლობაში ბსუ-მ განახორციელა გაცვლითი პროგრამები სტუდენტების, პროფესორ-მასწავლებლებისა და ადმინისტრაციული პერსონალის მონაწილეობით 45 პარტნიორული ხელშეკრულების ფარგლებში. უნივერსიტეტი ასევე ჩაერთო უმაღლესი საგანმანათლებლო დაწესებულებების ინსტიტუციური განვითარების 9 პროექტში და ყოველწლიურად ატარებს ჟან მონეს საზაფხულო სკოლას.