ახალი ამბები

საქართველოს იურიდიული ფირმების ასოციაციის პროექტის „იურიდიული კლინიკების გაძლიერება უმაღლეს განათლებაში“ ფარგლებში ბათუმის შოთა რუსთაველის სახელმწიფო უნივერსიტეტში შეხვედრა გაიმართა. ასოციაციის აღმასრულებელმა დირექტორმა თინათინ შუღაროვამ და პროექტის ექსპერტმა, პროფესორმა ნინო ბოგვერაძემ იურიდიული და სოციალურ მეცნიერებათა ფაკულტეტის იურიდიული კლინიკის სტუდენტებს საქართველოში არსებული იურიდიული კლინიკების კვლევის შედეგებთან ერთად სწავლების მეთოდოლოგია გააცნო და საერთაშორისო პრაქტიკა გაუზიარა. შეხვედრის ფარგლებში პროფესორმა ნინო ბოგვერაძემ მომავალ სამართალდამცავებს ხელშეკრულების შედგენის მეთოდიკის მოკლე კურსი ჩაუტარა.

ეკონომიკისა და მდგრადი განვითარების სამინისტროს ინოვაციების და ტექნოლოგიების სააგენტოს თავმჯდომარის მოვალეობის შემსრულებელმა ავთანდილ კასრაძემ ბსუ-ში მსოფლიო ბანკის პროექტის „ეროვნული ინოვაციების ეკოსისტემის” (GENIE) ფარგლებში თანადაფინანსების გრანტების პროგრამის პრეზენტაცია გამართა. პროგრამის მიზანია საქართველოში საერთაშორისო პოტენციალის მქონე ინოვაციური პროდუქტების, მომსახურების შემუშავება-ათვისების და კომერციალიზაციის გზით ინოვაციური საწარმოების წარმოქმნის სტიმულირება. GENIE-ი პროექტი ითვალისწინებს თანადაფინანსების გრანტების გაცემას სტარტაპებისთვის. საგრანტო კონკურსის ბიუჯეტი ორ მილიონ ლარს შეადგენს, მოთხოვნილი გრანტის მაქსიმალური ოდენობა არ უნდა აღემატებოდეს ასი ათას ლარს და მასში მონაწილეობა შეუძლიათ დამწყებ/ორ წლამდე კერძო, მცირე საწარმოებს.

ბათუმის შოთა რუსთაველის სახელმწიფო უნივერსიტეტში ევროპის საბჭოს პროექტის „დისკრიმინაციის, სიძულვილის ენის და სიძულვილის მოტივით ჩადენილი დანაშაულების წინააღმდეგ ბრძოლა საქართველოში“ ფარგლებში საინფორმაციო შეხვედრა ჩატარდა თემაზე: „არა სიძულვილის ენას: ცნობიერების ამაღლების ახალგაზრდული კამპანიის საუკეთესო მაგალითები“. სპიკერებმა, ევროპის საბჭოს არა სიძულვილის ენის ცნობიერების ამაღლების კამპანიის აქტივისტებმა მარია ანდრეევამ და გუბაზ კობერიძემ სტუდენტებს ისეთი მნიშვნელოვანი საკითხები გააცნეს, როგორიცაა: სიძულვილის ენა, მასთან ბრძოლის საშუალებები, ცნობიერების ამაღლების კამპანიის მეთოდები ევროპის საბჭოს არა სიძულვილი ენის კამპანიის მაგალითზე და სამომავლო გეგმები. პროექტი მიზნად ისახავს გამოცდილების გაზიარებას, შესაძლებლობების განვითარებას, ადვოკატირებასა და ცნობიერების ამაღლებას.

ბათუმის დემოკრატიის სკოლის განათლების პროგრამის წარდგენა გაიმართა ბათუმის რუსთაველის სახელმწიფო უნივერსიტეტში. სკოლის კოორდინატორმა თამარ მამეიშვილმა სტუდენტებს პროგრამის მიზნები, ამოცანები და კონკურსში მონაწილეობის პირობები გააცნო. დემოკრატიის სკოლა ითვალისწინებს ხუთთვიან საგანმანათლებლო პროგრამას დემოკრატიული მმართველობის, დემოკრატიული პოლიტიკისა და საჯარო მმართველობის საკითხებზე. საგანმანათლებლო პროგრამა ხორციელდება ჰოლანდიის მთავრობისა და სხვადასხვა დონორი ორგანიზაციების დაფინანსებით.

ბათუმის შოთა რუსთაველის სახელმწიფო უნივერსიტეტის რექტორის მოადგილე, პროფესორი ნათია წიკლაშვილი და ეკონომიკისა და ბიზნესის ფაკულტეტის ასოცირებული პროფესორი ბადრი გეჩბაია უკრაინის ეროვნულ საავიაციო უნივერსიტეტში იმყოფებოდნენ. შეხვედრაზე მხარეებმა განიხილეს სამომავლო თანამშრომლობის მიმართულებები. დაიგეგმა ერთობლივი კვლევითი პროექტების განხორციელება, სამეცნიერო კონფერენციების ორგანიზება, სამეცნიერო-კვლევითი ბაზების განვითარება, სხვა პარტნიორებთან ქსელის ხელშეწყობა, ერთობლივი მრგვალი მაგიდების გამართვა, ერთობლივი სამეცნიერო სტატიების მომზადება, სადისერტაციო ნაშრომების ექსპერტიზა, საჯარო ლექციების, ტრენინგებისა და მასტერკლასების ჩატარება. ვიზიტის ფარგლებში ხელი მოეწერა თანამშრომლობის მემორანდუმს ბათუმის შოთა რუსთაველის სახელმწიფო უნივერსიტეტსა და კიევის ეროვნულ საავიაციო უნივერსიტეტს შორის.