ახალი ამბები

ბათუმის შოთა რუსთაველის სახელმწიფო უნივერსიტეტში საერთაშორისო სამეცნიერო კონფერენცია გაიხსნა თემაზე: „ჰუმანიტარული მეცნიერებები ინფორმაციულ საზოგადოებაში-III“. ქართველი და უცხოელი მკვლევარები სამი დღის განმავლობაში განიხილავენ ისეთ აქტუალურ თემატიკას, როგორიცაა: ინტერდისციპლინური და ინტერკულტურული მიდგომები, ეროვნული თვითმყოფადობა და კულტურული მრავალფეროვნება, კორპუსული ლინგვისტიკა და დიგიტალური ჰუმანიტარია. სესიის მუშაობაში მონაწილეობას ღებულობს 200-ზე მეტი ქართველი მეცნიერი საქართველოს სხვადასხვა უნივერსიტეტიდან, 20-მდე უცხოელი (იაპონიიდან, იტალიიდან, დიდი ბრიტანეთიდან, პოლონეთიდან, ბულგარეთიდან, თურქეთიდან, აზერბაიჯანიდან, უკრაინიდან) და 40-მდე დოქტორანტი. ახალგაზრდა მკვლევარებისათვის დაგეგმილია პოსტერ-მოხსენებათა სესია და მრგვალი მაგიდა.

საფრანგეთის გაცვლითი პროგრამების წარდგენა გაიმართა ბათუმის შოთ რუსთაველის სახელმწიფო უნივერსიტეტში. საქართველოს ფრანგული ინსტიტუტის წარმომადგენელმა ნათია მსხალაძემ და საფრანგეთის საელჩოს საუნივერსიტეტო და სამეცნიერო ატაშემ ელეონორ გარნიემ სტუდენტებსა და პროფესორ-მასწავლებლებს საფრანგეთის უმაღლესი განათლების სისტემა, სასწავლო პროგრამები და სტიპენდიები გააცნეს. ღონისძიების დასასრულს მომხსენებლებმა ახალგაზრდებს საფრანგეთში სწავლის გამოცდილება გაუზიარეს და შეკითხვებს უპასუხეს.

გაეროს ადამიანის უფლებათა უმაღლესი კომისრის წარმომადგენლობის კამპანიის „ადამიანის უფლებები ყველასთვის“ ეგიდით ექსპერტებმა გიორგი მშვენიერაძემ და გიორგი ჩხეიძემ ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხეს თემაზე: „ადამიანის უფლებათა საყოველთაო დეკლარაცია და ადამიანის უფლებების მნიშვნელობა“. გაეროს ადამიანის უფლებათა უმაღლესი კომისრის ექსპერტებმა სტუდენტებს ადამიანის თავისუფლებისა და უფლებების დაცვის ისტორია გააცნეს და აქტუალურ შეკითხვებს უპასუხეს.

სასტუმრო „რედისონში“ წარჩინებულ სტუდენტთა დაჯილდოება გაიმართა. აჭარის ა.რ. განათლების, კულტურისა და სპორტის სამინისტროს „სტუდენტთა დახმარების“ ქვეპროგრამის მონაწილე ბათუმის შოთა რუსთაველის სახელმწიფო უნივერსიტეტის 22 წარჩინებულ სტუდენტს სამახსოვრო საჩუქრები გადაეცა. ქვეპროგრამის ფარგლებში, 2018 წელს 2017-2018 სასწავლო წლის გაზაფხულის სემესტრში აჭარაში მცხოვრები 454 სტუდენტი დაფინანსდა, მათგან 296 სტუდენტს დაფინანსება 2018-2019 სასწავლო წლის შემოდგომის სემესტრში გაუგრძელდება.

საქართველოს საგარეო საქმეთა სამინისტროს ლევან მიქელაძის სახელობის დიპლომატიური სასწავლო და კვლევითი ინსტიტუტის მკვლევარებმა, ელჩებმა ლევან ბოძაშვილმა და თეიმურაზ შარაშენიძემ ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხეს თემაზე: „საქართველოს საგარეო პოლიტიკა და პრიორიტეტები“. მომხსენებლებმა ისაუბრეს ქვეყნის სამეზობლო პოლიტიკაზე, სამხედრო უსაფრთხოებაზე, საერთაშორისო ურთიერთობებსა და ჩრდილოატლანტიკურ სივრცეში საქართველოს ინტეგრაციის პროცესზე. ლექციის დასასრულს, დიპლომატებმა ლევან ბოძაშვილმა და თეიმურაზ შარაშენიძემ სტუდენტების შეკითხვებს უპასუხეს.