ახალი ამბები

ბათუმის შოთა რუსთაველის სახელმწიფო უნივერსიტეტის მონაწილეობით ინსტიტუციური თანამშრომლობის (Erasmus+Capacity Building in Higher Education (CBHE) ორი პროექტი განხორციელდება. TEMPUS -ის პროგრამის საგრანტო კონკურსის შედეგების მიხედვით, გამარჯვება მოიპოვა პროექტებმა: „საქართველოს უმაღლესი სასწავლებლების კვლევის შესაძლებლობების გაზრდა სამეცნიერო-კვლევითი სამსახურების მეშვეობით“ და „მედიაცია: ტრენინგი და საზოგადოების ტრანსფორმაცია“. პროექტი „საქართველოს უმაღლესი სასწავლებლების კვლევის შესაძლებლობების გაზრდა სამეცნიერო-კვლევითი სამსახურების მეშვეობით“ მიზნად ისახავს ქვეყნის მასშტაბით არსებული კვლევითი შესაძლებლობების გაუმჯობესებას საქართველოს უნივერსიტეტებში კვლევითი სამსახურების განვითარების მეშვეობით. პროექტის ფარგლებში საქართველოს უნივერსიტეტებს შორის ერთობლივი კვლევითი პლატფორმა ჩამოყალიბდება, რაც ითვალისწინებს საქართველოს უნივერსიტეტებში სამეცნიერო საქმიანობის დაგეგმვას, განხორციელებასა და შეფასებას. ევროპული პარტნიორი უნივერსიტეტები ჩაატარებენ ტრენინგებს, რაც ხელს შეუწყობს უნივერსიტეტის ადმინისტრაციული პერსონალის კვლევის მართვისა და მონაცემთა ანალიზის უნარ-ჩვევების გაუმჯობესებას.

ბათუმის შოთა რუსთაველის სახელმწიფო უნივერსიტეტში შოთა რუსთაველის სამეცნიერო ფონდის ფუნდამენტური კვლევების სამეცნიერო საგრანტო პროექტის „ოპტიკურად მკვრივი, შემთხვევითი ფაზური ეკრანის ფლუორესცენციული მახასიათებლების რაოდენობრივი და გაბნეული ლაზერული გამოსხივების ინტენსივობის კორელაციური ფუნქციის სტატისტიკური მომენტების სპექტრალური ანალიზი“ სადემონსტრაციო დღე გაიმართა. სამეცნიერო პროექტის ხელმძღვანელმა, პროფესორმა ნუგზარ ღომიძემ პროექტის მონაწილეებთან ერთად, სამწლიანი კვლევის შედეგები წარმოადგინა და მის მნიშვნელობაზე ისაუბრა. პროექტის განხორციელებაში მონაწილეობდა კონსტრუქტორთა ჯგუფი (ხელმძღვანელი ზაზა დავითაძე), ექსპერიმენტატორთა ჯგუფი (ხელმძღვანელი ზურაბ შაშიკაძე), თეორეტიკოსთა ჯგუფი (ხელმძღვანელი იზოლდა ჯაბნიძე) და მოდელირების ჯგუფი (ხელმძღვანელი მირანდა ხაჯიშვილი). სადემონსტრაციო დღის დასასრულს, მკვლევარები პროექტის ფარგლებში შეძენილ სამეცნიერო აპარატურასა და ლაბორატორიას გაეცნენ.

ბათუმის შოთა რუსთაველის სახელმწიფო უნივერსიტეტი საზაფხულო სკოლას - „მულტილინგვიზმი და თარგმანის როლი ცოდნის გლობალიზაციაში“ მასპინძლობს. სკოლა ტარდება ევროკავშირის კვლევისა და ინოვაციის ჩარჩო პროგრამის - „ჰორიზონტი 2020“ პროექტის KEAC-BSR „ცოდნისა და აკადემიური კულტურის გაცვლა ჰუმანიტარულ სფეროში: ევროპა და შავი ზღვის აუზი, XVIII-XXI სს“ ფარგლებში. მასში საპროექტო კონსორციუმში მონაწილე უნივერსიტეტების დოქტორანტურისა და მაგისტრატურის სტუდენტები და პროფესორ-მასწავლებლები მონაწილეობენ საქართველოდან, უკრაინიდან, აზერბაიჯანიდან, მოლდოვიდან, რუსეთიდან, მაკედონიიდან და ბულგარეთიდან.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ისტორიის სადოქტორო საგანმანათლებლო პროგრამამ წარმატებით გაიარა პროგრამული აკრედიტაცია. მიმდინარე წელს ასევე, წარმატებით გაიარა აკრედიტაცია ჰუმანიტარულ მეცნიერებათა ფაკულტეტის თარგმანმცოდნეობის საბაკალვრო პროგრამამ. ბათუმის შოთა რუსთაველის სახელმწიფო უნივერსიტეტი ულოცავს აკადემიურ პერსონალსა და სტუდენტებს მნიშვნელოვან წარმატებას!

ბათუმის შოთა რუსთაველის სახელმწიფო უნივერსიტეტმა თაფლის ფესტივალში მიიღო მონაწილეობა. ფესტივალზე ბსუ-ს პროფესიული მოდულური საგანმანათლებლო პროგრამა „მეფუტკრის“ სტუდენტებმა, ლექტორთან მანანა ბოლქვაძესთან ერთად, უნივერსიტეტის ბაზაზე არსებულ საფუტკრე მეურნეობაში წარმოებული თაფლი წარადგინეს. სტუდენტები სასწავლო პრაქტიკის ფარგლებში ფუტკრის მოვლის წესებსა და მეფუტკრეობის პროდუქტების წარმოებას სწავლობენ. ბსუ-ს სტენდმა ვიზიტორების დიდი ინტერესი გამოიწვია, მათ შესაძლებლობა ჰქონდათ დეტალურად გასცნობოდნენ პროფესიული პროგრამის პირობებს და ადგილზე დაეგემოვნებინათ სხვადასხვა სახეობის თაფლი.