ახალი ამბები

მიმდინარე წლის 27 აგვისტოს უმაღლესი საგანმანათლებლო დაწესებულებების ავტორიზაციის საბჭომ საჯარო სამართლის იურიდიულ პირს - ბათუმის შოთა რუსთაველის სახელმწიფო უნივერსიტეტს ავტორიზაცია მიანიჭა. ავტორიზაციის პროცესი ქართველი და უცხოელი ექსპერტების მონაწილეობით წარიმართა. უნივერსიტეტი განახლებული შვიდი სტანდარტისა და პროცედურების მიხედვით შეფასდა. ექსპერტების დასკვნაში უნივერსიტეტის ძლიერ მხარედ განისაზღვრა: განვითარების მაღალი შესაძლებლობა, მომავალზე ორიენტირება, რეფორმების კუთხით მუდმივი აქტიურობა, უნივერსიტეტის ხარჯ-ეფექტიანობის ზრდა, კვლევით პროექტებში სტუდენტების ჩართულობა, სტუდენტური სერვისების განვითარება და მხარდაჭერა, ლაბორატორიებისა და კლინიკების გაფართოების მიზნით პროაქტიური და ინოვაციური მიდგომა.

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა, საქართველოს ინოვაციებისა და ტექნოლოგიების სააგენტოს თავმჯდომარის მოვალეობის შემსრულებელმა ავთანდილ კასრაძემ და უნივერსიტეტის ადმინისტრაციის ხელმძღვანელმა ჯემალ ანანიძემ ლეონიძის ქუჩაზე მდებარე საუნივერსიტეტო კამპუსის მშენებლობა დაათვალიერეს. 2019 წელს, ახალ სასწავლო კორპუსში ბათუმის შოთა რუსთაველის სახელმწიფო უნივერსიტეტისა და საქართველოს ინოვაციებისა და ტექნოლოგიების სააგენტოს თანამშრომლობის ფარგლებში ტექნოპარკი გაიხსნება. რეგიონის ახალგაზრდებს შესაძლებლობა ექნებათ სახელმწიფოს მხარდაჭერით ტექნოპარკში ინოვაციური იდეები რეალურ ბიზნესად აქციონ და განავითარონ თავიანთი სტარტაპიდეები.

VII საერთაშორისო საზაფხულო სკოლა „დიგიტალური ჰუმანიტარია, ქართველოლოგია, კორპუსლინგვისტიკა, დოკულინგვისტიკა“ გაიხსნა ბათუმის შოთა რუსთაველის სახელმწიფო უნივერსიტეტში. სწავლების მიზანია დიგიტალური ჰუმანიტარიის განვითარება საქართველოში, ენისა და კულტურის ელექტრონული დოკუმენტაციის ძირითადი პრინციპებისა და მეთოდების შესწავლა, ქართული და საერთაშორისო ელექტრონული რესურსების გაცნობა, საველე სამუშაოების ჩატარების უნარ-ჩვევების გამომუშავება. საქართველოს, რუმინეთის, თურქეთის, ირანის სხვადასხვა უნივერსიტეტის ბაკალავრიატის, მაგისტრატურისა და დოქტორანტურის სტუდენტები ინტერდისციპლინური პროგრამის ფარგლებში გაეცნობიან დიგიტალური ჰუმანიტარიის მულტიდისციპლინურ მეთოდებს, ინსტრუმენტებსა და სტანდარტებს, დიგიტალური ქართველოლოგიის მიღწევებსა და განვითარების პერსპექტივებს.

ბათუმის შოთა რუსთაველის სახელმწიფო უნივერსიტეტის მიზნობრივი სამეცნიერო კვლევითი პროექტის „გოდერძის უღელტეხილის ისტორია და ეთნოარქეოლოგია“ ფარგლებში, გოდერძის უღელტეხილის მიდამოებში, ბეშუმსა და მის მიმდებარე წიწვოვანი ტყის ტერიტორიაზე დაზვერვითი ეთნოარქეოლოგიური კვლევა ძიება მიმდინარეობს. კურორტის ჩრდილო აღმოსავლეთით, ჭედელეთის ტყეში მდებარე ძველ ნამოსახლარებში მიწური და ნახევრად მიწური მშრალი ქვის წყობით ნაგები საცხოვრებელი კომპლექსებია განლაგებული. არქეოლოგიური კვლევა-ძიების შედეგად მიკვლეულია ღია კერები, ხარო, თონე, მრავალფეროვანი დანიშნულების კერამიკული ჭურჭლის ფრაგმენტები.

ბათუმის შოთა რუსთაველის სახელმწიფო უნივერსიტეტს ფრანგული ინსტიტუტის სამეცნიერო და საუნივერსიტეტო თანამშრომლობის ატაშე ტერი ბურტე, რენი 1-ის უნივერსიტეტის რექტორის მოადგილე საერთაშორისო ურთიერთობების დარგში პიერ ვან დე ვეგი და რენი 1-ის უნივერსიტეტის საგარეო ურთიერთობათა სამსახურის ევროპული პროექტების კოორდინატორი ელის გოტიე ეწვივნენ. უნივერსიტეტის რექტორთან მერაბ ხალვაშთან გამართულ შეხვედრაზე დაიგეგმა თანამშრომლობა რენი 1-ის უნივერსიტეტთან და კონსორციუმის შექმნა საფრანგეთის სხვა ხუთ უმაღლეს საგანამანთლებლო დაწესებულებასთან როგორც სასწავლო, ასევე კვლევითი მიმართულებით. მომავალი კონსორციუმი ითვალისწინებს პროფესორების, სტუდენტებისა და ადმინისტრაციული პერსონალის გაცვლას.