ახალი ამბები

ბათუმის შოთა რუსთველის სახელმწიფო უნივერსიტეტში საზეიმოდ გაიხსნა სტუდენტური თეატრების საერთაშორისო ფესტივალი „დებიუტი“. ხუთი დღის განმავლობაში საუნივერსიტეტო სცენა დაეთმობა ბათუმის შოთა რუსთაველის სახელმწიფო უნივერსიტეტის, ივანე ჯავახიშვილის სახელობის თბილისის სახელმწიფო უნივერსიტეტის, ლატვიის ქალაქ ელგავას აგრარული უნივერსიტეტის, ლიტვის ქალაქ ვილნიუსის სახელმწიფო უნივერსიტეტისა და ქუთაისის აკაკი წერეთლის სახელმწიფო უნივერსიტეტის სტუდენტურ თეატრებს. სტუდენტური თეატრების საერთაშორისო ფესტივალის მიზანია ხელი შეუწყოს თეატრალური ღირებულებების დამკვიდრებას, კულტურულ-შემეცნებითი პროექტების განხორციელებასა და სტუდენტთა შორის ურთიერთობების გაღრმავებას.

მწერლისა და საზოგადო მოღვაწის, ეროვნულ-განმათავისუფლებელი მოძრაობის ლიდერის ილია ჭავჭავაძის 180 წლის იუბილე ბათუმის შოთა რუსთველის სახელმწიფო უნივერსიტეტში რამდენიმე ღონისძიებით აღინიშნა. ჰუმანიტარულ მეცნიერებათა ფაკულტეტის სტუდენტებმა და პროფესორ-მასწავლებლებმა მსვლელობა მოაწყვეს და ეროვნული გმირის ძეგლი გვირგვინით შეამკეს. ღონისძიების ფარგლებში უმაღლეს საგანმანათლებლო დაწესებულებაში ილიას ხსოვნისადმი მიძღვნილი ლიტერატურული საღამო გაიმართა. ქართული ფილოლოგიის სპეციალობის სტუდენტებმა კიდევ ერთხელ შეაფასეს ილია ჭავჭავაძის ღვაწლი, მოხსენებები წაიკითხეს მის ფენომენსა და ლიტერატურულ მემკვიდრეობაზე. ახალგაზრდებმა ღონისძიებაზე ასევე წარმოადგინეს მწერლის მოღვაწეობის ამსახველი ფოტოკოლაჟი.

კონკურსის „ეფექტიანი ცვლილებების სესიები“ წარდგინება გაიმართა ბათუმის შოთა რუსთაველის სახელმწიფო უნივერსიტეტში. პროგრამა ნარჩენების მართვის ტექნოლოგიები რეგიონებში აცხადებს და მისი მიზანია სტუდენტების ჩართვა გარემოსდაცვითი აქტივობებში, ინიციატივების წამოწყებისა და ინოვაციური მიდგომების განვითარების ხელშეწყობა ახალგაზრდებში. კონკურსში მონაწილეობა შეუძლია აქტიურ და გარემოს დაცვის თემატიკით დაინტერესებულ სტუდენტებს აჭარიდან. WMRT II პროგრამა ხელს უწყობს საქართველოს მთავრობას ქვეყნის ნარჩენების მართვის სექტორის მოდერნიზებაში და მხარს უჭერს მდგრად განვითარებასა და ინკლუზიურ ეკონომიკურ ზრდას. პროექტი ასევე უზრუნველყოფს ნარჩენების ისეთ მართვას, რომელიც მინიმუმამდე დაიყვანს ადამიანის ჯანმრთელობისა და ბუნებრივ რესურსებზე მიყენებულ ზიანს.

ბათუმის შოთა რუსთაველის სახელმწიფო უნივერსირტეტის ეკონომიკისა და ბიზნესის ფაკულტეტის პროფესორ-მასწავლებლებმა მონაწილეობა მიიღეს საერტაშორისო სტაჟირებაში თემაზე: „სწავლების თანამედროვე მეთოდები და ინოვაციური ტექნოლოგიები უმაღლეს განათლებაში:ევროპული გამოცდილება და არსებული ტენდენციები“. სწავლება 24-30 ოქტომბერს მიხაილ ბალუდიანსკის სამეცნიერო აკადემიური საზოგადოების მიერ სლოვაკეთის და სხვა ევროპული ქვეყნების უნივერსიტეტებთან ერთად ჩატარდა და მიზნად ისახავდა სწავლა/სწავლების და კვლევების ინოვაციური მეთოდების შესწავლა და გამოცდილების გაზიარებას. სტაჟირების ფარგლებში მონაწილეებმა განიხილეს ეფექტური პრაქტიკის, განათლებისა და მეცნიერე¬ბის აქტუალური პრობლემები, შესაბამისი მარეგულირებელი და სამართლებრივი დოკუ¬მენტები.

ბათუმის შოთა რუსთაველის სახელმწიფო უნივერსიტეტის სტუდენტებისათვის ბათუმის მუნიციპალიტეტის ქვეპროგრამის „კულტურის სფეროში თავისუფალი ინიციატივების მხარდაჭერის“ ფარგლებში საჯარო ლექციების ციკლი დაიწყო თემაზე: „ჭკვიანი ქალაქი“. პროექტის მიზანია, დააინტერესოს ახალგაზრდები, რათა თანამედროვე ტექნოლოგიებისა და ხელოვნების საშუალებით დადებითი გავლენა მოახდინონ ქალაქის ყოველდღიურ ცხოვრებაზე და „გამოაცოცხლონ“ ურბანული სივრცე - ე.წ. „ბეტონის ჯუნგლები“. თეიმურაზ დიასამიძე სტუდენტებს გააცნობს მსოფლიოს „ჭკვიანი ქალაქის“ წარმატებულ მაგალითებს, მსოფლიო ტენდენციებს და ბათუმის განვითარების პერსპექტივებს.