ახალი ამბები

მოდულური სწავლების საკითხებზე ბათუმის შოთა რუსთაველის სახელმწიფო უნივერსიტეტში ტრენინგები დაიწყო. ერთი კვირის განმავლობაში ექსპერტი და კონსულტანტი შორენა ჯაფარიძე პროფესიული პროგრამების პროფესორ-მასწავლებლებსა და სხვადასხვა დარგის სპეციალისტებს ისეთ აქტუალურ საკითხებს გააცნობს, როგორიცაა: პროფესიული საგანმანათლებლო პროგრამის ჩარჩო დოკუმენტი, მოდულის სტრუქტურა და მოდულური სწავლების არსი, პროფესიული სწავლების თანამედროვე მიდგომები, პროფესიულ კვალიფიკაციათა ჩარჩო, კომპეტენციებზე დაფუძნებული სწავლების არსი, პროფესიული სტანდარტი, მოდულების ნაირსახეობანი (ზოგადი, პროფესიული სავალდებულო, არჩევითი).

არასამთავრობო ორგანიზაციის „ხელმისაწვდომი გარემო ყველასათვის“ აღმასრულებელმა დირექტორმა გიორგი ახმეტელმა ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა თემაზე: „საქართველოში შშმ პირთა უფლებრივი მდგომარეობა“. მომხსენებელმა სტუდენტებს საქართველოში შშმ პირთა უფლებრივი მდგომარეობა გააცნო და ისაუბრა სამედიცინო და სოციალურ მიდგომებს შორის არსებულ განსხვავებაზე. გიორგი ახმეტელმა მსმენელებს გაუზიარა ამერიკის შეერთებულ შტატებში, მაკკეინის ინსტიტუტში მიღებული გამოცდილება. ორგანიზაცია „ხელმისაწვდომი გარემო ყველასათვის“ შშმ პირთა მოძრაობას წარმოადგენს და 2010 წლიდან შეზღუდული შესაძლებლობების მქონე პირების უფლებრივი მდგომარეობის გაუმჯობესებაზე მუშაობს.

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა, დეკანებმა, პროფესორ-მასწავლებლებმა და სტუდენტებმა მონაწილეობა მიიღეს პარლამენტში გამართულ ახალმიღებულ კონსტიტუციაში დაგეგმილი ცვლილებების პროექტის საყოველთაო-სახალხო განხილვაში. პროექტი კონსტიტუციის ახალი რედაქციიდან ე.წ. ბონუსის სისტემის ამოღებას ითვალისწინებს. ასევე განიხილება გაუნაწილებელი საპარლამენტო მანდატები, რომლებიც თანმიმდევრობით უკეთესი შედეგის მქონე პოლიტიკურმა პარტიებმა უნდა მიიღონ.

ბათუმის შოთა რუსთაველის სახელმწიფო უნივერსიტეტს ჩინეთის ჩრდილო-დასავლეთის აგრარული და სატყეო უნივერსიტეტის საერთაშორისო განათლების ინსტიტუტის დელეგაცია ეწვია. დელეგაციის წევრებმა ბსუ-ს აკადემიურ პერსონალთან, მკვლევრებთან, ადმინისტრაციის წარმომადგენლებთან და სტუდენტებთან გამართულ შეხვედრაზე უმაღლეს საგანმანათლებლო დაწესებულებებს შორის თანამშრომლობის გაღრმავებასა და ერთობლივი სასწავლო-სამეცნიერო პროექტების განხორციელების მნიშვნელობაზე ისაუბრეს.

1938 წლის 7 თებერვალს ბათუმის სამასწავლებლო ინსტიტუტს შოთა რუსთაველის სახელი მიენიჭა და უნივერსიტეტის ეზოში იაკობ ნიკოლაძის მიერ შექმნილი შოთა რუსთაველის ბიუსტი დაიდგა. გაურკვეველი გარემოებების გამო, XX საუკუნის 90-იან წლებში ძეგლი ბათუმის ერთერთ საჯარო სკოლას გადაეცა. მიმდინარე წლის ნოემბერში აჭარის ავტონომიური რესპუბლიკის განათლების კულტურისა და სპორტის სამინისტროს დახმარებით ბიუსტი ისევ უნივერსიტეტს დაუბრუნდა. ძეგლს რესტავრაცია მოქანდაკე დავით ბოლქვაძემ ჩაუტარა.