ახალი ამბები

დღეს, ბათუმის შოთა რუსთაველის სახელმწიფო უნივერსიტეტის აკადემიურმა საბჭომ, იტალიის ფერარას სახელმწიფო უნივერსიტეტის პროფესორი ლივიო ძებრინი ბსუ-ს საპატიო დოქტორად აირჩია. კლასიკური არქეოლოგიის პროფესორს ლივიო ძებრინის დიდი დამსახურება მიუძღვის საქართველოს და კერძოდ აჭარის არქეოლოგიის შესწავლის საქმეში. მისი თაოსნობით ქ. ბათუმში დაარსდა „შავიზღვისპირეთის კვლევების საერთაშორისო ცენტრი“, რომელიც კოორდინაციას გაუწევს ქართულ-იტალიურ ერთობლივ კვლევებსა და საგანმანათლებლო პროგრამებს.

ბათუმის შოთა რუსთაველის სახელმწიფო უნივერსიტეტში ჰუმანიტარულ მეცნიერებათა ფაკულტეტის დოქტორანტთა III სამეცნიერო კონფერენცია გაიმართა. სამეცნიერო სესია 4 სექციაში მუშაობდა და მასში საქართველოს სხვადასხვა უმაღლესი საგანმანათლებლო დაწესებულების 40-მდე დოქტორანტი მონაწილეობდა.

საქართველოს პრეზიდენტის ადმინისტრაციის უფროსი გიორგი აბაშიშვილი ბათუმის შოთა რუსთაველის სახელმწიფო უნივერსიტეტის რექტორს მერაბ ხალვაშს შეხვდა. საქართველოს პრეზიდენტის ადმინისტრაციის უფროსი უმაღლესი საგანმანათლებლო დაწესებულების სასწავლო-სამეცნიერო პროექტებს, საგანმანათლებლო პროგრამებსა და მატერიალურ ბაზას გაეცნო. საქართველოს პრეზიდენტს გიორგი მარგველაშვილსა და უმაღლეს საგანმანათლებლო დაწესებულებას შორის გაფორმებული მემორანდუმის ფარგლებში, პრეზიდენტის ფონდი ბსუ-ს ათ საუკეთესო სტუდენტს სახელობით სტიპენდიას დაუნიშნავს.

ბათუმის შოთა რუსთაველის სახელმწიფო უნივერსიტეტში პირველი აუტსორსული კომპანიის Georgian Service Group 2007-ის ფილიალის წარდგინება გაიმართა. დაწესებულების წარმომადგენლებმა სტუდენტებს ორგანიზაციის საქმიანობა და დასაქმების შესაძლებლობები გააცნეს. წარდგინების დასრულების შემდეგ, ინგლისური, გერმანული, ფრანგული, ესპანური ენის მცოდნე სტუდენტებსა და კურსდამთავრებულებს ტესტირებასთან ერთად გასაუბრება ჩაუტარდათ. Georgian Service Group 2007-ის ფილიალმა ვაკანსია 100 ადგილზე, უცხოელ მომხმარებელთან ურთიერთობის სპეციალისტის პოზიციაზე გამოაცხადა. კომპანია 2007 წელს თბილისში დაარსდა და ამჟამად 260 თანამშრომლით ევროპული ბაზრის 9 ენობრივ ჯგუფს ემსახურება.

თანამშრომლობის მემორანდუმი გაფორმდა განათლების საერთაშორისო ცენტრს, ბათუმის შოთა რუსთაველის სახელმწიფო უნივერსიტეტს, კავკასიის უნივერსიტეტს, გრიგოლ რობაქიძის სახელობის უნივერსიტეტს, ივ. ჯავახიშვილის სახელობის თბილისის სახელმწიფო უნივერსიტეტს, ილიას სახელმწიფო უნივერსიტეტსა და საქართველოს საზოგადოებრივ საქმეთა ინსტიტუტს შორის. ხელშეკრულება ხელს შეუწყობს ქვეყნის აკადემიური სივრცისთვის საჭირო აკადემიური, სამეცნიერო და ადმინისტრაციული პერსონალის მომზადებასა და საქართველოში უმაღლესი განათლების ინტერნაციონალიზაციას.