ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის აგრარულმა მიმართულებამ ბორჯომის ტყის აღსადგენად ნაძვის, სოჭის და ფიჭვის ნერგების გამრავლება დაიწყო.
გაზაფხულზე, ბსუ-ს სტუდენტები და პროფესორ-მასწავლებლები ბორჯომის ტყეში , მწვანე საფარის აღსადგენად უნივერსიტეტის სათბურში გამოყვანილ 1000-მდე წიწვოვანს დარგავენ.
ბათუმის შოთა რუსთაველის სახელმწიფო უნივერსიტეტში უსინათლოთა და მცირე მხედველ ადამიანთა გადაადგილების, ორიენტაციისა და საყოფაცხოვრებო უნარების განვითარების ტრენინგი მიმდინარეობს.
ტრენინგის ფარგლებში, მრავლობითი დარღვევის მქონე მცირემხედველი და უსინათლო ბავშვების ადრეული ჩარევის სპეციალისტები, ბსუ-ს განათლების ფაკულტეტის პროფესორ-მასწავლებლები და ფსიქოლოგიის სპეციალობის სტუდენტები ეუფლებიან ტექნიკას, რომელიც უსინათლო ბავშვებთან მუშაობისას, მათი დამოუკიდებლობისა და სოციალიზაციის გასაზრდელად გამოადგებათ. გაკვეთილები მოიცავს როგორც თეორიულ, ასევე პრაქტიკულ ცოდნას . ტრენინგის ფარგლებში, თვალახვეული მონაწილეები სივრცეში ორიენტირებასა და საყოფაცხოვრებო დავალებების შესრულებას ცდილობენ. პრაქტიკულ დავალებებში მონაწილეობა ბსუ-ს რექტორმა მერაბ ხალვაშმა და აჭარის ავტონომიური რესპუბლიკის განათლების, კულტურისა და სპორტის მინისტრმა ინგა შამილიშვილმა მიიღეს.
საქართველოში ჩინეთის საგანგებო და სრულუფლებიანი ელჩი ძი იანჩი ბათუმის შოთა რუსთაველის სახელმწიფო უნივერსიტეტს ეწვია. ჩინელი დიპლომატი უნივერსიტეტის რექტორს მერაბ ხალვაშს, საქართველოს პარლამენტის თავმჯდომარის მოადგილეს ილია ნაკაშიძეს, აჭარის ა.რ განათლების, კულტურისა და სპორტის მინისტრს ინგა შამილიშვილს და აჭარის ა.რ. ჯანმრთელობის და სოციალური დაცვის მინისტრს ზაალ მიქელაძეს შეხვდა. მხარეებმა შეხვედრაზე განათლების, ჯანდაცვის, ეკონომიკისა და სოფლის მეურნეობის მიმართულებით თანამშრომლობის პრიორიტეტები განსაზღვრეს და ერთობლივ პროექტებზე ისაუბრეს. ასევე შეაფასეს ქვეყნებს შორის არსებული დიპლომატიური ურთიერთობების 25-წლიანი ისტორია.
დღეს, ბათუმის შოთა რუსთაველის სახელმწიფო უნივერსიტეტში ილიას სახელმწიფო უნივერსიტეტის პროფესორის, მარჯანიშვილის თეატრის დრამატურგის ლაშა ბუღაძის საჯარო ლექციათა ციკლი დაიწყო თემაზე: „ცენზურა და ტექსტი“.
ლაშა ბუღაძემ ბსუ-ს სტუდენტებს, პროფესორებსა და დაინტერესებულ საზოგადოებას ცენზურის ფენომენზე ესაუბრა ანტიკური პერიოდიდან თანამედროვეობამდე: ცენზურა ანტიკურობაში, ცენზურა და საზოგადოება, ცენზურა და რელიგია, თვითცენზურა და უცენზურობა და ა.შ.
დღეს, ბათუმის შოთა რუსთაველის სახელობის სახელმწიფო უნივერსიტეტში ლექცია-დისკუსია გაიმართა თემაზე : „გენდერული უთანასწორობის კულტურული, ეკონომიკური და სოციალური ასპექტები". საჯარო ლექციას ბსუ-ს სხვადასხვა კურსისა და სპეციალობის სტუდენტები ესწრებოდნენ.სემინარი გენდერული უთანასწორობის კულტურულ, ეკონომიკურ და პოლიტიკურ ასპექტებს შეეხებოდა. მკვლევარმა სოციალურ მეცნიერებებში მაია ტაბიძემ პასუხი გასცა კითხვებს თუ როგორ ხდება და ხდებოდა ქალების დამორჩილება სხვადასხვა ინსტიტუტების და სისტემების მიერ, აგრეთვე მიმოიხილა სქესის და გენდერის მიმართ მიდგომების ცვლილება დროთა განმავლობაში.
