ახალი ამბები

ბათუმის შოთა რუსთაველის სახელმწიფო უნივერსიტეტში პირველი აუტსორსული კომპანიის Georgian Service Group 2007-ის ფილიალის წარდგინება გაიმართა. დაწესებულების წარმომადგენლებმა სტუდენტებს ორგანიზაციის საქმიანობა და დასაქმების შესაძლებლობები გააცნეს. წარდგინების დასრულების შემდეგ, ინგლისური, გერმანული, ფრანგული, ესპანური ენის მცოდნე სტუდენტებსა და კურსდამთავრებულებს ტესტირებასთან ერთად გასაუბრება ჩაუტარდათ. Georgian Service Group 2007-ის ფილიალმა ვაკანსია 100 ადგილზე, უცხოელ მომხმარებელთან ურთიერთობის სპეციალისტის პოზიციაზე გამოაცხადა. კომპანია 2007 წელს თბილისში დაარსდა და ამჟამად 260 თანამშრომლით ევროპული ბაზრის 9 ენობრივ ჯგუფს ემსახურება.

თანამშრომლობის მემორანდუმი გაფორმდა განათლების საერთაშორისო ცენტრს, ბათუმის შოთა რუსთაველის სახელმწიფო უნივერსიტეტს, კავკასიის უნივერსიტეტს, გრიგოლ რობაქიძის სახელობის უნივერსიტეტს, ივ. ჯავახიშვილის სახელობის თბილისის სახელმწიფო უნივერსიტეტს, ილიას სახელმწიფო უნივერსიტეტსა და საქართველოს საზოგადოებრივ საქმეთა ინსტიტუტს შორის. ხელშეკრულება ხელს შეუწყობს ქვეყნის აკადემიური სივრცისთვის საჭირო აკადემიური, სამეცნიერო და ადმინისტრაციული პერსონალის მომზადებასა და საქართველოში უმაღლესი განათლების ინტერნაციონალიზაციას.

ბათუმის შოთა რუსთაველის სახელმწიფო უნივერსიტეტში მრავალფუნქციური ფსიქოლოგიის კლინიკა ფუნქციონირებს. ბსუ-ს ფსიქოლოგები ფსიქო-სოციალურ დახმარებას უწევენ ძალადობის მსხვერპლ ან რისკის ქვეშ მყოფ ბავშვებს, ახალგაზრდებს, მათი ოჯახის წევრებს, შშმ და გსსმ პირებს. კლინიკის ბაზაზე გახსნილია სპეციალურად აღჭურვილი ზრდასრულთა ინდივიდუალური და ჯგუფური თერაპიის ოთახები. ასევე მოქმედებს საქართველოს საზოგადოებრივი ჯანდაცვის ფონდის ევროკომისიის მიერ დაფინანსებული პროექტის ფარგლებში შექმნილი „ბავშვთა და ახალგაზრდების ადვოკატირების ცენტრი“. ფსიქოლოგიის კლინიკაში მუშაობა მიმდინარეობს შემდეგი პროგრამებით: ABA თერაპია, ადრეული განვითარების ინდივიდუალური და ჯგუფური პროგრამა, მშობელთა გაძლიერების პროგრამა, ენისა და მეტყველების თერაპია. ცენტრს უკვე ჰყავს 20-მდე ბენეფიციარი.

საბუნებისმეტყველო მეცნიერებათა და ჯანდაცვის ფაკულტეტის ბიოლოგიისა და ეკოლოგიის სპეციალობის მეორე კურსის 37-მა სტუდენტმა ბოტანიკისა და ზოოლოგიის სასწავლო საველე პრაქტიკის ფარგლებში საველე ექსპედიციაში მიიღო მონაწილეობა, ახალგაზრდები ერთი კვირის განმავლობაში გოდერძის უღელტეხილის, ვარძიის, ბორჯომ-ხარაგაულის ეროვნული პარკის, აბასთუმნის, ბეშუმის ფლორასა და ფაუნას ეცნობოდნენ. სტუდენტებმა ბუნებრივ პირობებში შეისწავლეს მცენარეთა და ცხოველთა ტაქსონომიური მრავალფეროვნება, გავრცელების კანონზომიერებები. ექსპედიციის მონაწილეებს ჩამოუყალიბდათ საველე ხელსაწყოების გამოყენების, მცენარეთა და ცხოველთა იდენტიფიცირების უნარ-ჩვევები, დაეუფლნენ ჰერბარიუმის მომზადებისა და ეთიკეტირების მეთოდებს.

ბათუმის შოთა რუსთაველის სახელმწიფო უნივერსიტეტს ართვინის ჭოროხის უნივერსიტეტის დელეგაცია ეწვია. ართვინის ჭოროხის უნივერსიტეტის რექტორის მოადგილე ჰუსეინ ფექერი და სატყეო ფაკულტეტის დეკანი, პროფესორი ზაფერ ოლმეზი ბსუ-ს რექტორის მოადგილეებს ნათია წიკლაშვილს, თამარ სირაძეს, დეკანებს, პროფესორ-მასწავლებლებსა და მკვლევარებს შეხვდნენ. მხარეებმა უმაღლეს საგანმანათლებლო დაწესებულებებს შორის გაფორმებული მემორანდუმის ფარგლებში ერთობლივი სასწავლო-სამეცნიერო პროექტების განხორციელება დაგეგმეს. პირველ ეტაპზე უნივერსიტეტის ტექნოლოგიური და საბუნებისმეტყველო მეცნიერებებისა და ჯანდაცვის ფაკულტეტის აკადემიური პერსონალი ართვინის ჭოროხის უნივერსიტეტის სატყეო მიმართულების სამეცნიერო პროექტში ჩაერთვება. ქართველი და თურქი მკვლევარები ერთობლივად იმუშავებენ მცენარეთა თესლის ბანკის შექმნისა და დამუშავების საკითხებზე.