ახალი ამბები

ეკონომიკისა და ბიზნესის ფაკულტეტის პროფესორ-მასწავლებლებისა და სხვადასხვა ორგანიზაციის წარმომადგენლების მორიგი შეხვედრა გაიმართა ბათუმის შოთა რუსთაველის სახელმწიფო უნივერსიტეტში. ფაკულტეტის აკადემიურმა პერსონალმა კურსდამთავრებულ დამსაქმებლებს მოქმედი საგანმანათლებლო პროგრამები, ახალი საბაკალავრო პროგრამის მოთხოვნები, დარგობრივი მახასიათებლები, სტრუქტურა და სასწავლო კურსების განვითარების დინამიკა გააცნო. მხარეებმა შეხვედრაზე ასევე შეაფასეს პროგრამების მიზნები, ამოცანები და სწავლის შედეგების პრაქტიკასთან დაახლოების ხელშემწყობი რეკომენდაციები წარმოადგინეს. შეხვედრას ესწრებოდნენ უნივერსიტეტის რექტორის მოადგილე სამეცნიერო დარგში ნათია წიკლაშვილი, ხარისხის უზრუნველყოფის სამსახურის უფროსი ანზორ ბერიძე და 30-მდე სხვადასხვა საჯარო და კერძო დაწესებულების წარმომადგენლები.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ისტორიის სპეციალობის II კურსის 55 სტუდენტი სასწავლო პრაქტიკის ფარგლებში გონიო-აფსაროსის მუზეუმ-ნაკრძალში მიმდინარე არქეოლოგიურ გათხრებში მონაწილეობს.

ბათუმის შოთა რუსთაველის სახელმწიფო უნივერსიტეტის სტუდენტურ თვითმმართველობას ახალი პრეზიდენტი ჰყავს. ახლადარჩეულმა 95-წევრიანმა სტუდენტურმა თვითმართველობამ მხარი დაუჭირა ეკონომიკისა და ბიზნესის ფაკულტეტის მესამე კურსის სტუდენტ ზურაბ პაპუნიძეს. კენჭისყრაში მონაწილეობა 76-მა წევრმა მიიღო, მათგან საარჩევნო კომისიამ 7 ბიულეტენი ბათილად სცნო. სტუდენტურმა თვითმმართველობამ პრეზიდენტი ორი წლის ვადით აირჩია.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის 30 სტუდენტი გერმანიაში გაემგზავრა. ახალგაზრდები 75 დღის განმავლობაში პრაქტიკას გერმანიის მაღალი კლასის სასტუმროებში გაივლიან, გაეცნობიან სასტუმროს ყველა ძირითად სტრუქტურული ერთეულის ფუნქციონირებას. ახალგაზრდები თეორიული ცოდნის მიღებასთან ერთად, ჩაერთვებიან სასტუმროს ყოველდღიურ საქმიანობაში, გაიუმჯობესებენ პრაქტიკულ უნარ-ჩვევებსა და კომპეტენციებს, რაც მათ მომავალში, საერთაშორისო ტურისტული მომსახურების ბაზარზე წარმატებით დასაქმების საშუალებას მისცემს.

საქართველოს პარლამენტის ეროვნული ბიბლიოთეკის გენერალურმა დირექტორმა, მწერალმა გიორგი კეკელიძემ ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა თემაზე: „განმანათლებლობა და საქართველოს ევროპული არჩევანი მხატვრულ ლიტერატურაში“. მომხსენებელი სხვადასხვა უმაღლესი საგანმანათლებლო დაწესებულების სტუდენტებსა და საზოგადოების წარმომადგენლებს მხატვრული ლიტერატურის ფასეულობებზე, დემოკრატიული არჩევანის მნიშვნელობასა და ღირებულებებზე ესაუბრა. საჯარო ლექცია მაჟორიტარ დეპუტატ ფატი ხალვაშის ორგანიზებით გაიმართა.