ახალი ამბები

დღეს, ბათუმის შოთა რუსთაველის სახელმწიფო უნივერსიტეტში ივანე ჯავახიშვილის სახელობის თბილისის სახელმწიფო უნივერსიტეტის პროფესორის, ლექსიკოგრაფიული ცენტრის სამეცნიერო ხელმძღვანელის თინათინ მარგალიტაძის საჯარო ლექციათა ციკლი დაიწყო. პირველი მოხსენება თანამედროვე ქართულ ენაში მიმდინარე პროცესებსა და მშობლიური და უცხო ენების სწავლების მეთოდოლოგიას შეეხებოდა. თინათინ მარგალიტაძემ მოძრაობის "არა ბარბარიზმებს" ფარგლებში შექმნილი ინგლისურენოვანი ბარბარიზმების ელექტრონული ლექსიკონი წარუდგინა დამსწრე საზოგადოებას. შემდეგი მოხსენება „სიტყვის მნიშვნელობა და მისი სწავლებისა და კვლევის მეთოდები’ ’ ბსუ-ში, ხვალ,12:00 საათზე გაიმართება.

განათლების სახლის მოსწავლეები ბათუმის შოთა რუსთაველის სახელმწიფო უნივერსიტეტს ესტუმრნენ. შეხვდნენ სხვადასხვა მიმართულების პროფესორ-მასწავლებლებსა და ადმინისტრაციის წარმომადგენლებს, დაათვალიერეს უნივერსიტეტის ინფრასტრუქტურა და ლაბორატორიები, მოისმინეს დეტალური ინფორმაცია მათთვის საინტერესო საკითხებზე.

საქართველო-უკრაინას შორის დიპლომატიური ურთიერთობების დამყარების 25 წლისადმი მიძღვნილი ერთობლივი საერთაშორისო სამეცნიერო კონფერენცია გაიხსნა თემაზე: „უკრაინა და საქართველო, დიპლომატიური ურთიერთობები, საერთაშორისო კავშირები, კულტურული დიპლომატია“. ორდღიან სამეცნიერო სესიაზე ქართველი, უკრაინელი, პოლონელი, რუმინელი პროფესორ-მასწავლებლები და დიპლომატიური კორპუსის წარმომადგენლები დარგის აქტუალურ საკითხებს განიხილავენ. სამეცნიერო კონფერენციის მუშაობა სამ სექციაში წარიმართება და წარმოდგენილი იქნება 40-მდე სამეცნიერო მოხსენება.

ბათუმის შოთა რუსთაველის სახელმწიფო უნივერსიტეტში საკონსტიტუციო ცვლილებების საყოველთაო განხილვა გაიმართა. სტუდენტებს, პროფესორ-მასწავლებლებს, არასამთავრობო ორგანიზაციებს, ექსპერტებს და საზოგადოების წარმომადგენლებს პრეზიდენტის არჩევის წესი, საარჩევნო სისტემასთან დაკავშირებული ცვლილებები და სხვა აქტუალური საკითხები საქართველოს პარლამენტის თავმჯდომარემ ირაკლი კობახიძემ გააცნო. სახელმწიფო კომისიის მიერ შემუშავებული დოკუმენტის დეტალურ განხილვას საქართველოს პრეზიდენტი გიორგი მარგველაშვილი, საპარლამენტო უმრავლესობისა და უმცირესობის წევრები დაესწრნენ. შეხვედრა კითხვა-პასუხის რეჟიმში წარიმართა. საკონსტიტუციო ცვლილებების საყოველთაო განხილვა 5 მაისს დაიწყო და 15 მაისს დასრულდება.

ევროპის დღეები ბათუმის შოთა რუსთაველის სახელმწიფო უნივერსიტეტში რამდენიმე ღონისძიებით აღინიშნა. სოციალურ და პოლიტიკურ მეცნიერებათა ფაკულტეტის სტუდენტებმა ფლეშმობი - საზღვრის გადაკვეთის იმიტაცია გამართეს. ასისტენტ პროფესორმა ლაშა ბაჟუნაიშვილმა და გელა ირემაძემ საჯარო ლექცია წაიკითხეს თემაზე: ევროპის გაერთიანების იდეა და ევროკავშირის თანამედროვე გამოწვევები“. ღონისძიების ფარგლებში ჰუმანიტარულ მეცნიერებათა ფაკულტეტის ევროპეისტიკის, სლავისტიკის და ქართული ფილოლოგიის დეპარტამენტებმა საინფორმაციო კუთხეები მოაწყვეს ევროპის ქვეყნების შესახებ.