ახალი ამბები

ბათუმის შოთა რუსთაველის სახელმწიფო უნივერსიტეტის ეზოში საქართველოს პარლამენტის ეროვნული ბიბლიოთეკის დირექტორმა გიორგი კეკელიძემ მოძრაობა „ეკვილიბრიუმის“ ფარგლებში „წიგნის ბუდე“ გახსნა. სტუდენტებსა და პროფესორ-მასწავლებლებს შესაძლებლობა აქვთ ორიგინალური სათავსოდან წიგნი აიღონ, წაიკითხონ და უკან დააბრუნონ, ან წაღებული წიგნის ნაცვლად ახალი დატოვონ. პროექტი მიზნად ისახავს წიგნის კითხვის პოპულარიზაციას. ბსუ სოციალურ კამპანიაში „ეკვილიბრიუმი“ რამდენიმე თვის წინ ჩაერთო და სოციალური ქსელით დაწყებული აქციის „გაიღე წიგნი“ ეგიდით, შუახევის რაიონის სოფელ ჭვანის ბიბლიოთეკას 400-მდე წიგნი გადასცა.

IX საერთაშორისო ფორუმი „გეო-კულტურული სივრცე: სმარტ-ტექნოლოგიები განათლებასა და სოციუმში“ გაიხსნა ბათუმის შოთა რუსთაველის სახელმწიფო უნივერსიტეტში. ფორუმი სხვადასხვა ქვეყნის ლინგვისტებს, მეთოდისტებს, კულტურულოგებს, ლიტერატურათმცოდნეებსა და პედაგოგებს აერთიანებს ეროვნულ სოციუმთა ჰუმანიტარულ სფეროში წარმოქმნილი აქტუალური პრობლემების გამოსაკვლევად. სესია ასევე ითვალისწინებს ქვეყნებს შორის თანამშრომლობის გასაუმჯობესებას, რეალურ და ვირტუალურ ფორმატში ურთიერთბის კულტურის ამაღლებას, სპეციალისტთა მეცნიერული და პედაგოგიური პოტენციალის ინტეგრაციას ინოვაციური კულტურათშორისი საგანმანათლებლო და სამეცნიერო გარემოს შექმნის გზით.

ბათუმის შოთა რუსთაველის სახელმწიფო უნივერსიტეტში კურსდამთავრებულთა 79-ე საზეიმო გაცილება გაიმართა. მანტიებში გამოწყობილ კურსდამთავრებულებს უნივერსიტეტის რექტორმა მერაბ ხალვაშმა, პროფესორ-მასწავლებლებმა, მთავრობისა და უმაღლესი საბჭოს წარმომადგენლებმა სწავლის დასრულება მიულოცეს. უმაღლესი საგანმანათლებლო დაწესებულება წელს 1000-მდე სტუდენტმა დაამთავრა. წარჩინებული სწავლის, სამეცნიერო კონფერენციებში მონაწილეობისათვის, სტუდენტურ ცხოვრებაში შეტანილი წვლილისა და უნივერსიტეტის პოპულარიზაციისათვის 150-მდე სტუდენტი სპეციალური სიგელებით დაჯილდოვდა.

ბათუმის შოთა რუსთაველის სახელმწიფო უნივერსიტეტში ბათუმის მე-6 საერთაშორისო სკოლა-სემინარი გაიხსნა ბიომედიცინის აქტუალურ თემებზე. ქართველი და უცხოელი პროფესორები 3 დღის განმავლობაში ჩაატარებენ ლექციებს, მასტერ-კლასებსა და ლაბორატორიულ მეცადინეობებს დარგის მნიშვნელოვან საკითხებზე. საქართველოს უმაღლესი სასწავლებლების ბიოლოგიური და სამედიცინო პროფილის სტუდენტები, დოქტორანტები და რეზიდენტები გაეცნობიან დაბერების პროცესისა და სხვადასხვა დაავადების ბიოლოგიური მექანიზმების კვლევაში არსებულ თანამედროვე სამეცნიერო მიღწევებს, ბიოსუფრთხოების, ბიოეთიკური პრინციპებისა და ნორმების დაცვის მნიშვნელობას ბიოსამედიცინო საქმიანობაში.

დღეს, ბათუმის შოთა რუსთაველის სახელმწიფო უნივერსიტეტში საქართველოს უსაფრთხოებისა და განვითარების ცენტრმა (GCSD) პრეზენტაცია და დისკუსია გამართა თემაზე - ‘‘შემდგომი ნაბიჯები ევროკავშირში ინტეგრაციის გზაზე’’.
შეხვედრის მიზანი იყო სხვადასხვა დაინტერესებული მხარეების ინფორმირება და დისკუსიების ორგანიზება საქართველოს ევროკავშირში გაწევრიანების გზაზე ყველაზე მნიშვნელოვან და აქტუალურ საკითხებთან დაკავშირებით.
შეხვედრაში მონაწილეობა მიიღეს ბსუ-ს სტუდენტებმა, არასამთავრობო ორგანიზაციების, აკადემიური წრეებისა და ადგილობრივი მედიის წარმომადგენლებმა.