ახალი ამბები

აჭარის ა.რ. სოფლის მეურნეობის მინისტრი ლაშა კომახიძე და აგროსერვის ცენტრის დირექტორი გოჩა ბერიძე ბათუმის შოთა რუსთაველის სახელმწიფო უნივერსიტეტის რექტორს მერაბ ხალვაშს, რექტორის მოადგილეებს: ნათია წიკლაშვილსა და ინგა შამილიშვილს, აგრარული მიმართულების საგანმანათლებლო პროგრამების პროფესორ-მასწავლებლებსა და სამეცნიერო ინსტიტუტების ხელმძღვანელებს შეხვდნენ. ვიზიტი მიზნად ისახავდა აგრარული დარგების განვითარებისთვის ერთობლივი პროექტების განხორციელებასა და სამეცნიერო კვლევის შედეგების პრაქტიკაში დანერგვას. შეხვედრაზე ბსუ-ს ფიტოპათოლოგიისა და ბიომრავალფეროვნების ინსტიტუტის, აგრარული და მემბრანული ტექნოლოგიების ინსტიტუტისა და დასავლეთ საქართველოს რეგიონული ქრომატოგრაფიული ცენტრის მეცნიერ-თანამშრომლებმა ბოლო რამდენიმე წლის განმავლობაში განხორციელებული სამეცნიერო პროექტების შედეგები წარმოადგინეს. ღონისძიების დასასრულს, სტუმრები უნივერსიტეტის ბაზაზე არსებულ ლაბორატორიებს გაეცნენ.

შოთა რუსთველის დარბაზში ევროკავშირის გაცვლითი პროგრამის Erasmus + Credit Mobility-ის წარდგინება გაიმართა. ბათუმის შოთა რუსთაველის სახელმწიფო უნივერსიტეტის საგარეო ურთიერთობათა სამსახურის უფროსმა, პროგრამა Erasmus + -ის კოორდინატორმა ნანა ყურშუბაძემ საინფორმაციო შეხვედრაზე სტუდენტებს გაცვლით პროგრამაში მონაწილეობის პირობები გააცნო. უცხოეთში სწავლის შესაძლებლობა ეძლევა ყველა საფეხურის სტუდენტს, პროფესორ-მასწავლებლებსა და ადმინისტრაციულ პერსონალს. დაწვრილებითი ინფორმაცია იხილეთ ბსუ-ს საგარეო ურთიერთობათა სამსახურის ვებგვერდზე.

ვალენსიის (ესპანეთი) პოლიტექნიკური უნივერსიტეტის სამოქალაქო ინჟინერიის დეპარტამენტის პროფესორმა ხულიან ალკალა გონსალესმა თემაზე: „თანამედროვე მიდგომები საიჟინრო გაანგარიშებებში, საუკეთესო გადაწყვეტლების მიღების მიზნით, ოპტიმიზაციის მეტაევრისტიკული მეთოდებისა და სასრულ ელემენტთა მეთოდების გამოყენებით“ საჯარო ლექციების ციკლი დაიწყო. ბათუმის შოთა რუსთაველის სახელმწიფო უნივერსიტეტის სტუდენტებსა და პროფესორ-მასწავლებლებს საინჟინრო გაანგარიშებებსა და დაპროექტებაში საუკეთესო გადაწყვეტილების მიღებისათვის ოპტიმიზაციის მეტაევრისტიკული მეთოდებს გააცნობს. მომხსენებელი ყურადღებას გაამახვილებს ასევე გრადიენტის გენეტიკური მეთოდების გამოყენებასა და ანალიზზე.

ბათუმის შოთა რუსთაველის სახელმწიფო უნივერსიტეტში გეოლოგია-მინერალოგიის მეცნიერებათა დოქტორის, საქართველოს ეკოლოგიის აკადემიის აკადემიკოს ალექსანდრე თვალჭრელიძის საჯარო ლექციათა ციკლი დაიწყო თემაზე: „ნედლეულის ეკონომიკა (ნედლეულის როლი მსოფლიო ეკონომიკაში)“. მომხსენებელი სტუდენტებსა და პროფესორ-მასწავლებლებს თანამედროვე ეკონომიკის აქტუალურ საკითხებს გააცნობს. მეცნიერი სამი დღის განმავლობაში ისაუბრებს ნავთობისა და გაზის ეკონომიკასა და გეოპოლიტიკაზე, ოქროს ეკონომიკასა და გეოპოლიტიკაზე; ალმასის ეკონომიკასა და გეოპოლიტიკაზე. აკადემიკოსი ალექსანდრე თვალჭრელიძე ყურადღებას გაამახვილებს აგრეთვე ისეთ მნიშვნელოვან თემებზე, როგორიცაა: ნედლეულის როლი გლობალიზებულ სამყაროში, საქართველო და აჭარის ავტონომიური რესპუბლიკა მსოფლიო სანედლეულო ბაზრებზე: გამოწვევები და პერსპექტივები. საჯარო ლექციათა ციკლი აჭარის არ.განათლების, კულტურისა და სპორტის სამინისტროს ხელშეწყობით იმართება.

ბათუმის შოთა რუსთაველის სახელმწიფო უნივერსიტეტის აგრარული და მემბრანული ტექნოლოგიების ინსტიტუტის მთავარი მეცნიერი მერაბ არძენაძე, ინსტიტუტის სპეციალისტი, აგრონომი თემურ გორგილაძე და საქართველოს აგრარული უნივერსიტეტის მკვლევარი, ამპელოგრაფი ვაჟა გოცირიძე სამდღიანი სამეცნიერო მივლინებით, ისტორიულ სამხრეთ საქართველოში იმყოფებოდნენ. ექსპედიცია მიზნად ისახავდა შემორჩენილი ძველი ქართული ვაზის ჯიშების მოპოვებას, სანამყენე და საძირე მასალების შეგროვებას, მათ შემდგომ შესწავლასა და იდენტიფიკაციას. მკვლევარებმა შეისწავლეს კლარჯეთისა და შავშეთის ტერიტორიები - მურგული, ართვინი, ბორჩხა, იმერხევი, ბაზგირეთი და მათი მიმდებარე სოფლები. ექსპედიციის წევრებმა ასევე მოიძიეს 30-მდე ვაზის კულტურული და ველური სახეობა.