ახალი ამბები

ბათუმის შოთა რუსთაველის სახელმწიფო უნივერსიტეტისა და ფრანკფურტის იოჰან ვოლფგანგ გოეთეს უნივერსიტეტის ერთობლივი V საერთაშორისო საზაფხულო სკოლა „დიგიტალური ჰუმანიტარია - ენისა და კულტურის ელექტრონული დოკუმენტაცია“ გაიხსნა. საზაფხულო სკოლის მიზანია დიგიტალური ჰუმანიტარიის განვითარება საქართველოში, ენისა და კულტურის ელექტრონული დოკუმენტაციის ძირითადი პრინციპებისა და მეთოდების შესწავლა, აღნიშნული პროფილის ქართული და საერთაშორისო ელექტრონული რესურსების გაცნობა, საველე სამუშაოების ჩატარების უნარ-ჩვევების გამომუშავება.

ბათუმის შოთა რუსთაველის სახელმწიფო უნივერსიტეტს პოლონეთის, მალოპოლსკას სამთავრობო დელეგაცია ეწვია. დელეგაციის წევრები მალოპოლსკას რეგიონის ვიცე მარშალის ვოიცეხ კოზაკის ხელმძღვანელობით ბსუ-ს რექტორს მერაბ ხალვაშს შეხვდნენ. შეხვედრაზე რექტორმა სტუმრებს უნივერსიტეტის ისტორია, საგანმანათლებლო პროგრამები და საერთაშორისო თანამშრომლობის პროექტები წარუდგინა. პოლონურმა სამთავრობო დელეგაციამ ორ რეგიონს შორის აკადემიური და კულტურული თანამშრომლობის გაღრმავების შესახებ გამოთქვა სურვილი.

დღეს, ბათუმის ბულვარში თაფლის ფესტივალი გაიხსნა. ფესტივალზე ბათუმის შოთა რუსთაველის სახელმწიფო უნივერსიტეტი პროგრამის ‘’მეფუტკრეობის განვითარების ხელშეწყობა შუახევისა და ხულოს მუნიციპალიტეტებში’’ ფარგლებში მონაწილეობს, სადაც ბსუ-ს სტუდენტების ჩართულობით, მაღალმთიანი აჭარის მეფუტკრეთა ნაწარმია წარმოდგენილი.

დღეს, ბათუმის შოთა რუსთაველის სახელმწიფო უნუივერსიტეტის ტურიზმის ფაკულტეტის 35 სტუდენტი სასწავლო პრაქტიკით გერმანიაში გაემგზავრა. ახალგაზრდები 2 თვის განმავლობაში პრაქტიკას გერმანიის მაღალი კლასის სასტუმროებში გაივლიან, გაეცნობიან სასტუმროს ყველა ძირითად სტრუქტურულ ერთეულს. თეორიული ცოდნის მიღებასთან ერთად, ჩაერთვებიან სასტუმროს ყოველდღიურ საქმიანობაში, მიიღებენ პრაქტიკულ უნარ-ჩვევებსა და კომპეტენციებს, რაც სამომავლოდ, საერთაშორისო ტურისტული მომსახურების ბაზარზე წარმატებით დასაქმების საშუალებას მისცემს.

დღეს, 2008 წლის რუსეთ-საქართველოს ომში დაღუპული გმირის, ბათუმის შოთა რუსთაველის სახელმწიფო უნივერსიტეტის სტუდენტის, ვახტანგ გორგასლის I ხარისხის ორდენოსან ამირან მამალაძის საფლავი ბსუ-ს სტუდენტებმა, პროფესორ-მასწავლებლებმა და ადმინისტრაციის წარმომადგენლებმა გვირგვინით შეამკეს. უნივერსიტეტელებმა კიდევ ერთხელ პატივი მიაგეს საქართველოს ტერიტორიული მთლიანობისათვის დაღუპული მებრძოლის ხსოვნას და მის ღვაწლზე ისაუბრეს. V ქვეითი ბრიგადის კაპრალი ამირან მამალაძე ერთადერთი სტუდენტი იყო აჭარის რეგიონიდან, რომელიც 9 აგვისტოს დაიღუპა. იგი საცეცხლე ზონაში დაჭრილი თანამებრძოლებისა და მეთაურის გამოსაყვანად დაბრუნდა და გმირულად დაეცა. ომში დაღუპული გმირის უკვდავსაყოფად ბათუმის შოთა რუსთაველის სახელმწიფო უნივერსიტეტში დაწესებულია სტუდენტ ამირან მამალაძის სახელობის სტიპენდია და ასევე მცირე სპორტულ დარბაზს მინიჭებული აქვს მისივე სახელი.